بانُک تئی نام ءَ – نودان بلوچ

نمدی یے بانُک تئی نام ءَ

نبشتہ کار: نودان بلوچ

دی بلوچستان پوسٹ

دروت ءُ پُرمڑاہ ایں سلام

اُمیت انت وش ءُ سلامت ئے گوں یاگی ایں سنگتاں، بانُک تو گپّے زان ئے من ءَ تئی دْرستیں سفر دوست بنت ھمے سفراں گشاں کہ تو ھمے سفرانی تہ ءَ سفر کتگ بلے تئی گڈی سفر من ءَ ھچ دوست نہ بیت، پہ تو بہ گندئے تئی گڈی سفر چہ درستیں سفراں گیش زیبدار بہ بیت، بلے پمّن ناں۔

بلے اے گڈی سفر تو چہ ھما روچ ءَ بنا کتگ اَت کہ تو زانتگ اَت بلوچستان ءُ بلوچ ھردو تھاری ءَ زند گوازینگ ءَ اَنت۔ ہمے تھاری ءِ تہ ءَ تر ءَ چراگے دست ءَ اَت کہ بلان اَت، ملک پہ ملک شھر پہ شھر میتگ پہ میتگ دمک پہ دمک تو روان اِت ئے۔ من نوں زاناں تو ھمے جیڑگ ءَ بئے کہ تئی گڈی سفر من ءَ چی ءَ دوست نہ بیت، من ءَ ھمے واستا دوست نہ بیت کہ چہ تو پد من نہ زاناں چے بہ کناں، من ھیراناں، من وتئی راہ شمشتگ، وانگ یلہ داتگ، تو انگت پشت کپتگ ئے بانُک۔

پہل کن کہ تئی سر ءَ چیزے نبیسّگ منی وڑیں نابود ءُ ناچیزئے ءِ بستار ءَ چہ در اِنت بلئے من چے کناں کہ تو وت من ءَ پرمایگ ءَ ئے ۔ بانُک تو راست گشتگ اَت کہ ما موکہ پرست ایں، بلئے من ترا دگے چیزے گشگ لوٹاں تو کہ شُت ئے،لگوریں دژمن ءَ مارا موکہ پرستی ءَ ھم نئشت دانکہ تئی میتگے مردمے ھم نئیشت اَنت ءُ پد ءَ نوں بزگیں ھزارہ اش کُشت اَنت کہ موکہ پرست دگہ نیمگے دلگوش بہ بنت انچو مئے دژمن ءُ انچو ما بانُک پھل کن مارا، ما تئی وڑیں سرمچار نہ اِنت کہ تئی کوپگانی بار ءَ زُرت بہ کنیں، ءُ دژمن ءَ چم سُہرے پیش بدار ایں بلے کام ناکام چیزے وَ کنگ ءَ ایں۔

بانُک تو گپے زان ئے تو چہ بلوچ ءَ گیش بلوچستان ءِ رنگ اِت ئے تئی چم چو تیاب ءِ رنگ ءَ اِت اَنت، ءُ دائم پہ بلوچ ءَ چول جنگ ءَ اِت اَنت ءُ تئی کندگ چو دشت ءِ شانتلانی توار ءَ وش الھان اِت اَنت۔

بانُک ترا چیزے ھال دیگ لوٹاں، پتو سرجمیں بلوچستان پاد اتکگ ، شال ءَ بِگر داں جیونی، جیونی ءَ بِگر داں کراچی، ءُ بلوچستان ءِ کوہ ءُ کھچراں پتو موتک آرتگ، بانُک باتیل پتو پُرسیگ اِنت ، چلتن دائم تئی نام ءَ گپت، ساھجی گوں تیراں پتو نازینک جنت، سُرمگیں بولان ناز کنت تئی سر ءَ ءُ گوں وتی چُکاں کسّہ کار ایت۔

بانُک اے ساھت ءَ من تھنائی ءَ نشتگاں ءُ گوں تو گپ ءَ آں، دیگر ءِ وھد اِنت مُرگاں آزمان جلواہناک کتگ ءُ روچ دمانے بیت کہ زِر ءَ وتئی باتن ءَ جاگہ داتگ ءُ ملک نوں سارت اِنت منی دست ھم لرزگ ءَ اَنت من اے نِمدی ءَ گوں گوات ءَ گون کنگ ءَ آں دانکہ بلوچستان ءَ سر بہ بیت بلوچستان ءَ کہ سر بیت ترا لازُم سر بیت۔ بانُک دائم بلوچستان ءَ بات ئے، پرچا کہ ترا بلوچستان چہ بہشت ءَ گیش دوست بوتگ وشیں گڑا، بکول شہید سنگت ثناء ءِ، ”ھوارُن ھوارُن آزادی اسکان نن ھوارُن”
سنگتاں منی سلاماں سر کن۔

تئ ھم وتن: نودان بلوچ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔