پنجگور:سرکار ءِ چیردستی ءَ برجاھیں ٹولی ءَ اھوالکار ءُ سیاسی رھشون ءِ لوگاں بیڑ برتگ

بونستان پنجگور ءَ پاٹی ءِ دمگی رھشون ایوب اسرار ءُ اھوالکار سفر بلوچ ءِ لوگ ءَ بیتگیں بیڑاں ایر جن آں – بی این ایم

دی بلوچستان پوسٹ

بلوچستان ءِ دمگ پنجگور ءَ سرکار ءِ چیردستی ءَ ھستیں ٹولی ءَ بلوچ اھوالکار ءُ سیاسی رھشون ءِ لوگانی سر ءَ بیڑ برتگ –

بیڑ ءَ سرکاری داشتگیں ٹولی ءَ لوگاں جاڑیگیں جنین ءُ چُک جتگ اَنت ءُ تیرگواری کرتگ، کُشگ ءِ بیھار داتگ اَنت –

گیشیں ھالانی رد ءَ بونستان ھند چونگء سر ءَ سَے جتائیں لوگاں سلاہ بندیں مردماں اُرش کرتگ ءُ لوگانی دودمان لگتمال کرتگ اَنت ءُ لوگانی تہ ءَ پُتریتگ اَنت –

دمگی مردماں گوشت کہ سلاہ بندیں مردماں زالبول جتگ اَنت ءُ تیرگواری اش کرتگ ءُ چریشی ءَ دمگ ءِ مردم مُچ بیتگ ءُ سلاہ بنداں مردمانی کُشگ ءِ بیھار داتگ ءُ تتکگ اَنت –

دمگی مردمانی رد ءَ سلاہ بندیں مردمانی سیادی سرکار ءِ چیردستی ءَ داشتگیں ٹولی ءَ اِنت کہ ڈیتھ اسکواڈ ءِ نام ءَ زانگ بیت- دمگی مردمانی رد ءَ بونستان ءِ جھمنند شکیل پنّام چکو ء ڈاکٹر عبدالحمید جنگ زدگیں دمگ ءَ ڈیتھ اسکواڈ ءِ سروکی ءَ کنگ ءَ اِنت ءُ دمگ ءَ لس مھلوک ءِ لوگاں بیڑ بر اَنت –

ھمے لوگاں کہ سلاہ بندیں ٹولی ءَ بیڑ برتگ کہ اے لوگانی تہ ءَ یکے بلوچ نیشنل مومنٹ پنجگور ھنکین ءِ گوستگیں سروک ایوب اسرار ئیگ اِنت ءُ دومی رحیم داد ء دین مھمد ءُ آئی سیادانیگ اَنت-

رحیم داد ء دین مھمد ریڈیو زرمبش اردو ءَ بندوکیں اھوالکار ءُ کالم نگار سفر خان ءِ پت اِنت –

دمگی مردمانی رد ءَ شکو وتی ٹولی ءِ ھمراھی ءَ ھونریچی ءَ اتکگ بلے میتگ ءَ جاڑیگیں مردماں تہ ءَ دور کرتگ ءُ بے سوب کرتگ اَنت آیاں ھمے ٹک ءَ بیھار داتگ ءُ گُشتگ کہ اے ٹک ءِ بیست مردماں کُش ایں-

بیھار داتگیں مردماں شکیل ء ڈاکٹر عبدالحمید ءِ ھلاپ ءَ پولیس کارگس ءَ ارزی ھم نبشتگ کنائینتگ ءُ پھزداراں وتی پھریز کنگ ءِ لوٹ کرتگ –

دومی نیمگ ءَ بلوچستان ءِ آجوئی لوٹوکیں سیاسی گل بلوچ نیشنل مومنٹ ءَ پنجگور ءَ سیاسی ءُ اھوالکار ءِ لوگاں سرکاری ءِ چیردستی ءَ ھستیں ٹولی ءِ بیڑ ایر جتگ –

جارکش ءَ گوشت کہ آدینگ ےِ سھب ءَ پنجگور ءِ دمگ بونستان ءَ پنجگور ھنکین ءِ گوستگیں سروک ایوب اسرار، سفر خان ءُ آئی ءِ کھولانی لوگانی سر ءَ شکیل ء ڈاکٹر عبدالحمید ءِ پنّام ءِ شکو نامیں ڈیتھ اسکواڈ ءِ دمگی ٹولی ءِ سروک ءَ اُرش کرتگ – دمگ ءِ مردماں ھمساھیگی ءِ سرپد بوگ ءَ زیردستیں ھمساھیگانی پھریزی کرتگ –

پاٹی ءِ جارکش ءَ گوشت کہ جرماں ھواریں مردم ڈیتھ اسکواڈ ءِ ٹولی پاکستانی پوج ءَ بلوچ آجوئی دوستانی ھلاپ ءَ برجم کرتگ – پاکستانی پوج وتی جرمانی چیر دیگ ءِ واستا ڈیتھ اسکواڈ اسپر کرتگ ءُ بلوچ آجوئی دوستانی کھولاں نشانگ کنگ ءَ اَنت ءُ مردماں زرمبشت ءَ گستا کنگ لوٹ اَنت –

آئی ءَ گوشت کہ راجدپتر گوش ایت ڈیھ ءِ پروشوک عبرتناکی بنت – ھما مردم کہ مروچی پاکستانی پوج ءِ چمچہ ءُ کمکار اَنت، باند ءَ اشاں الم اشاں بلوچ راجی آمید گس ءَ وتی ھرگناہ ءِ پسو دیگی اِنت – زیردست ءُ بے کسوریں مردمانی سر ءَ زور ءِ پیشدارگ مردی نہ اِنت بلکیں ترس ءُ بے دلی ءِ نشانی اِنت –

آئی ءَ گُشت کہ گوست ءَ ھم پاٹی ءِ رھشونانی لوگانی سر ءَ اُرش بیتگ اَنت- زرمبشت ءَ سیادی داروکیں باسک ءُ ھمدردانی میتگ سوچگ بیتگ اَنت بلے پاٹی ءَ بندوکیں باسکانی دیدانک مھکم بیتگ اَنت ءُ مھلوک ءِ پلامرزی گیش بیتگ اَنت –

آئی ءَ گُشت کہ بلوچستان ءَ زُلم ءُ زوراکی ءِ ھلاسی یک آجوئیں بلوچستانے ءِ سرجم بیگ ءَ ابید نہ اِنت -بلوچستان ءِ دراھیں تکاں بندوکیں مردم وتی دست ءَ گلزمین ءِ پھازگ ءُ وتی ھکانی واستا آجوئی ءِ زرمبشت ءَ ھوار بہ بنت –