مچھ ءِ وئیل: زھرشانی نندانک ششمی روچ ءَ برجاہ، نشتگیں مردمانی چم سروزیر ءَ راھیگ اَنت

مچھ ءَ جنگ بیتگیں ھزارہ برادری ءِ دہ کاریزکارانی کھول جوناں کل ءُ کسارات بہ کن اَنت مروچی شال ءَ سر باں – عمران خان

دی بلوچستان پوسٹ

مچھ ءِ وئیل ءَ اسرمند بیتگیں مردمانی گم کم نہ بیتگ اَنت، شال ءَ مچھ ءِ وئیل ءِ ھلاپ ءَ ھزارہ برادری جونانی ھمراھی ءَ زھرشانی نندانک ششمی روچ ءَ برجاہ، شھیدانی کمیٹی ءَ نندانک ءِ ھلاس کنگ نہ منّ اِتگ – زھرشانی کنوک انگت ءَ سروزیر ءِ ودار ءَ اَنت –

گوستگیں روچ ءَ نصیر آباد ءِ شھت اوستہ مھمد ءُ مستونگ ءَ مستونگ ءُ بی ایس او ءِ نیمگ ءَ بیران بیتگیں کاریزکارانی پدردی ءِ واستا ڈیوا روک کرتگ ءُ گوشتگ کہ کاریزکارانی کوش پدردی درشان کنان ءَ گوشتگ کہ بلوچ ءُ ھزارہ برداری ءِ کوشکار یکین اِنت، کریمہ بلوچ ءِ کوش ءِ دلگوش دور کنگ ءِ واستا کاریزکار اش کُشتگ انت ئِے –

ھمے رنگ ءَ پیپلز پاٹی ءِ چیئرمین بلاول بھٹو زرداری پاٹی ءِ ھمراھی ءَ گوستگیں شال ءَ سر بیتگ ءُ اسرمندیں مردمانی گون ءَ پدردی ءِ درشانے کرتگ وھدیکہ مسلم لیگ ن ءِ رھشون مریم نواز ءِ چیردستی ءَ شال ءَ ھم سر بیتگ اَنت اسرمندیں کھول ءُ ھزارہ برادری ءِ کھولانی گون ءَ پدردی اش کرتگ –

جماعت اسلامی ءِ امیر سراج الحق ھم پدردی ءِ واستا شال ءِ آیگی بیتگ -دومی نیمگ ءَ نندانک ءَ نشتگیں مردم سروزیر عمران خان ءِ ودار ءَ نشتگ اَنت –

پاکستان ءِ سروزیر عمران ءَ گْوشتگ کہ بلوچستان ءِ دمگ مچھ ءَ کُشگ بیتگیں کاریزکارانی کھول جوناں کل ءُ کسارات بہ کن اَنت ءُ شال ءَ کایاں –

اے گپ عمران خان ءَ مروچی عمران خان ءَ اسپیشل ٹیکنالوجی زون اتھارٹی ءِ نیاد ءَ کرتگ اَنت ھمے وھد ءَ تران کنان ءَ آئی ءَ گُشتگ کہ کَل ءُ کسارات کنگ ءَ سر وزیر ءِ شرت ایر کنگ جوان نہ اِنت –

آئی ءَ گُشتگ کہ سروزیر ءِ شال ءَ آیگ ءِ لوٹ ءَ آئی ءَ گُشت ھرکس سروزیر ءَ بلیک میل کن اَنت –

آئی ءَ گُشت سرکار ھزاری ءِ گون ءَ ھمکوپگ اِنت ءُ کھولاں سدکی دے آں کہ آیاں ایوک نہ کن آں –

آئی ءَ گُشت کہ ھمینکس زُلم ھزارہ برادری ءِ گون ءَ بیتگ پاکستان ءَ کسے ءِ گون ءَ نہ بیتگ، نائن الیون ءَ پد ھزارہ برادری زُلم ءُ زوراکیانی نشانگ بیگ ءَ اِنت –

ھمک وھدانی پیم ءَ آئی ءَ یک رندے پد ءَ ھندوستان ءِ سر ءَ ایراد گپتگ ءَ گُشتگ ھندوستان پاکستان ءِ ھلاپ ءَ پندل سازگ ءَ اِنت –

زانگ بہ بیت ھمے سال ءِ سَے جنوری ءِ شپ ءَ بلوچستان ءِ دمگ بولان ءِ ھند مچھ ء کُشگ بیتگیں ھزارہ برادری دَہ کاریزکارانی کھول گوستگیں شش روچاں شال شال ءَ جونانی ھمراھی ءَ نندانک ءَ نشتگ اَنت ءُ ٰآیانی لوٹ اِنت کہ عمران خان بئیت ءُ مارا دوچار بہ کپ اِیت –