لورالائی ءُ پشین ءَ دو مردمانی جون دزکپتگ اَنت

دی بلوچستان پوسٹ

سر بیتگیں ھالانی رد ءَ پشین ھند خانوزئی ءِ میتگ داد گزئی ءَ گوستگیں روچ ءَ یک تیرسپتگین جونے دزکپتگ –

جون ءِ پجار داد مھمد پنّام ءِ دادو ءِ نام ءَ زانگ بیتگ ءُ گوستگیں دو شپاں پیسر بیگواھی ءَ پد آئی ءِ تیرسپتگیں جون گوستگیں روچ ءَ دزکپتگ –

دمگی مردمانی رد ءَ داد مھمد ءُ آئی ءِ برات خیال مھمد گوستگیں دو شپ بزانکہ شش ءُ ھپت جنوری ءِ میانی شپ ءَ سلاہ بندیں مردماں چہ لوگ ءَ آوار جتگ ءُ برتگ اَنت –

دمگی مردمانی رد ءَ داد مھمد ءِ دست ءُ پاد پروشگ بیتگ اَنت ءُ ھمے وھد ءَ آئی ءِ برات سلاہ بندیں مردمانی دست ءَ دلگوشتگ ءُ تتکگ ءُ سلاہ بنداں داد مھمد پشین ءِ ھند خانوزئی ءِ میتگ داد گزئی ءِ نزیکیں کوھاں تیر اش جتگ ءُ کُشتگ اِت ءُ سھب ءَ آئی ءِ جون دزکپتگ –

لیویز بنشون ءَ جون چِست کرتگ ءُ کھول ءِ گور ءَ سر کرتگ ءُ وئیل ءِ ارزی ناشناسیں مردمانی نام ءَ نبشتگ کرتگ ءُ جرمکارانی ھلاپ ءَ پَٹ ءُ پول بندات کرتگ –

ھمے رنگ ءَ لورالائی ءِ ھند ملک سلیم ءِ باگ ءِ نزیک ءَ یک لاشے دزکپتگ –

دکی: لورالائی ءَ سر بیتگیں ھالانی رد ءَ لاش ءِ پجار بیگواہ بیتگیں عبدالرازق زرگر جھمنند یارو ءِ شھر ءِ نام ءَ زانگ بیتگ –

پولیس بنشون ءِ رد ءَ عبدالرازق دو روچ ءَ پیسر بیگواہ بیتگ ءُ گوستگیں روچ ءَ آئی ءِ جون دزکپتگ –

پولیس بنشون ءِ رد ءَ آئی ءَ یک تیرے جنگ ءُ کُشگ بیتگ پولیس ءِ گوشگ اِنت آئی ءِ کِسگ ءَ “سُھر ” ھم دزکپتگ اَنت –

پولیس بنشون ءِ رد ءَ دکی لورالائی ءَ زرگری ءِ کار ءَ بیتگ ءُ گوستگیں دو روچاں آوار جنگ ءُ برگ بیتگ –

کھول ءِ رد ءَ آئی ءَ گُڈی بر ءَ لورالائی ءَ روگ ءِ وھد ءَ پٹھانکوٹ ءَ رھوت کرتگ ھخ گشتگ کہ دکی ءَ کایاں بلے آئی ءِ پون ءِ بند بیگ ءَ پد مئے دیریں ودار آسر بیتگ اَنت گڈی ءَ آئی ءِ بے ساھیں جون ءِ دروشم ءَ دزکپتگ –

کھول ءَ گوشت کہ مارا کسے ءَ گوں دشمنی نہ بیتگ ءُ نانکہ کسے ءِ زاتی جنگے مئے گون ءَ بیتگ –

عبدالرزاق ءِ جون دکی ءِ نادراہ جاہ ءَ پولیس ءَ سر کرتگ ءُ اژدری پَٹ ءُ پول کنگ ءَ پد جون کھول ءِ گور ءَ رسینگ بیتگ –

زانگ بہ بیت سال دوھزار ءُ بیست ءُ یک ءِ اولی ماہ ءَ بلوچستان ءَ جتا جتائیں وئیلاں چارمی جون اِنت کہ دزکپگ اِنت –