کراچی: بیگواھیں بلوچانی واستا زھرشانی برجاہ

دی بلوچستان پوسٹ

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ نیمگ ءَ زھرشانی برجاہ، زھرشانی بنجل ءَ چارھزار ءُ یک سد ءُ ھشتاد ءُ چار روچ سرجم بیتگ – پاکستان ءِ کمیونسٹ پاٹی سکھر ھنکین ءِ سرکماش محمد یامین، کراچی ءَ چہ وھاب بلوچ، کے بی بلوچ، زاکر بلوچ ءُ دگہ مردماں بنجل ءِ تر ءُ تاب کرتگ ءُ کھولانی گون ءَ پدردی درشان اِتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ مشھوریں کول ءِ کہ مردم گرگ بنت، آ لٹ ءُ کٹ زوراکی ءِ نشانگ کنگ بنت کُشگ ھم بنت آ ساد گُٹ ءَ دیگ ءُ پاھو دیگ ھم بنت بلے نزرئیہ ءُ پگر ھیال دارگ ءُ بندیگ کنگ نہ بنت –

آئی ءِ گوشتگ کہ اے راجدپتری کول راستی ءِ بلے پد ءَ ھمے تاکتور ھمے گمان کن انت کہ اے راجدپتری راستی ءَ وتی تاکت ءِ زور ءَ گار کن انت – بلوچستان ءِ تھ ئِے انوگیں آسریچیں ھالاتاں بلوچ چاگرد ءَ راستی، راستی ءَ سربوگ ءُ وتی ھیالانی درشان کنگے ھک ءَ زبھر کنگ یکشل ءَبرجاہ انت –

ماما قدیر بلوچ ءِ گوشگ ات کہ بلوچانی جیڑہ ھمنچو دلجمی ءَ دلگوش دیگ انت پاکستانی ھاکم ءُ رسانکدر آئی نزر انداز کنگ انت – ھالانکہ بلوچستان ءَ ھمک روچ جتائیں پگرے منوگر پاکستانی چیریں ادارھانی دست آوار جنگ ءُ بیگواہ بوگ ءَ انت –

آئی ءَ گوشتگ کہ پاکستانی رسانکدرانی گندگ ءَ ھمے سما بیت بلوچ جیڑہ کجا اد ءَ بلوچ ءُ بلوچستان ءِ ھچ چیز بستارے نداریت اگاں کدی کدی رسانکدراں بلوچستان پیشدارگ بیت گڑا درستیں راستی چیردیگ بنت ءُ پہ دیمی رورٹنگ بیت –