بلوچستان: دگہ بیگواھیں مردمے ءِ جون دزکپتگ

ھمے سال ءِ اولی ھپتگ ءَ بلوچستان ءَ دو ورنایانی جون دست کپتگ اَنت –

دی بلوچستان پوسٹ

بلوچستان ءِ دمگ چاگی ءِ بنجاھی شھر دالبندین ءِ نزیک ءَ گوستگیں روچاں بیگواہ بوتگیں ورنایے جون دست کپتگ –

ھالانی رد ءَ چار روچ پیسر ورناء پہ سیل ءُ گرد ءَ چہ گِس ءَ دراتکگ ءُ چریشی ءَ پد واتر نہ بوتگ، مروچی کوہ ءَ آئی ءِ جون دست کپتگ –

اے درگت ءَ کیو آر ایف ءِ مستر کریم نوتیزی ءَ گوشتگ کہ جون ءِ پجار محمد انور ءِ نام ءَ بوتگ آ دالبندین ءِ نندوک انت –

جون نادراہ جاہ ءَ برگ بوتگ ءُ اژدری چار ءُ ٹپاس ءَ جون کھول ءِ ھوالگ ءَ کنگ بوتگ – دنیگتا جون ءِ درگت ءَ ھچ وڑیں سرپدی نہ رس اِتگ –

زانگ بہ بیت بلوچستان ءِ جتا جتائیں دمگاں جونانی دست کپگ یکشل ءَ برجاہ انت بازیں جون زانگول بوگ ءَ آیانی پجار ھم نہ بوگ ءِ بروبری ءَ بیتگ اَنت وھدیکہ بازیں جونانی پجار بیگواھیں مردمانی نام ءَ چہ بوتگ انت –

بلوچستان ءَ ھمے سال ءِ اولی ھپتگ ءَ اے دومی جون انت کہ دست کپگ انت – چار جنوری ءَ نوشکی ءِ دمگ ڈاک قبول ءِ نزیک ءَ ڈھاڈر ءَ دمگی پھازداراں جونے دست کپتگ –

نادراہ جاہ ءِ پھزدارانی گوشگ انت کہ اے ورنایے اُمر بیست ءُ ھپت سال انت – آئی ءِ جون ءَ ھشت تیرانی نشان ھست انت بلے آئی ءِ پجار نہ بوتگ –