ایرانشھر ءَ وانگ جاہ بند، بیست استاد کرونا وائرس ءِ آماچ

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ بیست کس جھان وبا کرونا وائرس ءِ آماچ بیتگ اَنت –

گپتگیں مردم وانگجاھانی اُستاد اَنت ءُ گوستگیں روچ ءَ آیانی ٹست کنگ بیتگ اَنت ءُ آیانی ٹسٹانی تہ ءَ کرونا نادراھی پدر بیتگ –

اھوالکار ءِ رد ءَ پھرہ “ایرانشھر ” ءَ وانگ جاھانی بیست استاد کرونا نادراھی ءِ آماچ بیتگ اَنت کہ آ جتا جتا وانگ جاھانی استاد اَنت –

وانگجاھانی سروک ھسنی ءَ گوشت کہ بیست کسانی نادراھی ءِ پدر بیگ ءَ پد وانگ جاہ بند کنگ بیتگ ءُ نادراھی ءَ گپتگیں اُستادانی جاندراھی ءِ واستا ڈبگ بیتگ اَنت ءُ تانکہ وانگ جاہ ءِ آدگہ اُستاد اے نادراھی ءَ بہ رک اَنت –