مچھ ءِ وئیل: سروزیر بلوچستان ءُ نندانک ءَ نشتگیں مردمانی میان ءَ گپ ءُ تران بے سوب

مسلم لیگ (ن) مریم نواز شریف ءَ ھزارہ برادری ءِ نندانک ءَ نشتگیں مردمانی گون ءَ دوچار کپگ ءِ جار جتگ –

دی بلوچستان پوسٹ

بنجاھی پتر ءِ تھ ئِے کارانی وزیر ءُ دگہ وزرا ء کمیٹی ءَ پد سروزیر بلوچستان جام کمال ھم نندانک ءَ نشتگیں مردمانی گون ءَ گپ ءُ تران ءَ بے سوب بیتگ-

سروزیر بلوچستان رودراتکی شھدگ ءَ نندانک ءَ نشتگیں مردمانی گور ءَ اتکگ ءُ لھتے دماناں نندوکیں مردمانی گور ءَ نشتگ – آئی ءَ نندوکیں مردماں گوں گپ کنان ءَ گْوشت: امن ءُ ایمنی ءِ جاور اُستان ءِ سرکار ءِ واکانی تہ ءَ کاینت ءُ اگاں سروزیر بئیت آ ھم ھمے گوش ایت –

سر وزیر جام کمام ءَ نندوکیں مردماں گوں گوشت کہ زھرشانی کنوک مئے مِنت ءَ بہ زور اَنت ءُ جوناں کَل ءُ کسارات بہ کن اَنت – آیاں گوشت کہ شما جونانی کَل ءُ کسارات ءَ بہ کن اِت سروزیر ھم کیت ءُ کھولانی گون ءَ دوچار کپ ایت –

بلے زھرشانی ءَ نندوکیں مردماں ایانی گپ نہ زرتگ ءُ گوشتگ کہ تنا وھد ءَ سروزیر نئیت جونانی ھمراھی ءَ زھرشانی برجاہ مان اِت –

چریشی ءَ پیسر شال ءَ بنجاھی پتر ءِ وزرا علی زیدی ءُ زلفی بخاری ءِ ھمراھی ءَ رسانکدراں کانفرنس کنان ءَ گْوشتگ بلوچستان ءِ سروزیر جام کمال ءَ ھزارہ برادری ءِ ننداک ءَ نندوکیں مردماں گوں دزبندی کرتگ آ سروزیر عمران خان ءِ ودار ءَ کُشتگیں مردمانی کل ءُ کسارات ءِ وھد ءَ زورال مہ کن اِت –

جام کمال ءَ گوشت کہ “ما درستانی آیگ ءِ منانک ءَھمے دنت کہ ما درست دلستک اِنت “آئی ءَ دیمتر ءَ گوشت کہ “نندانک ءَ نشتگیں مردمانی گور ءَ ھم رؤئیں، آیانی گون ءَ گپ کن ایں، آ مئے برات اَنت-

آئی ءَ سدکی دیان ءَ گوشت کہ”بنجاھی پتر ءِ وزیر ھم نشتگ اَنت، سروزیر ھم کیت ءُ ڈیھ ءِ مزن سروک ھم کیت “-

ھمے رند ءَ پاکستان مسلم لیگ (ن) ءِرھشون مریم نواز شریف ءَ بانداتگیں روچ ءَ شال ءَ ھزارہ برادری ءِ نشتگیں مردمانی گون ءَ دوچار کپگ ءِ جار جتگ –

آئی ءَ گوشتگ کہ من یک اُمیتے ءَ روگ ءَ آں ءُ من امیت کن آں زھرشانی ءَ نشتگیں مردم منی گپ ءَ رد نہ کن اَنت ءُ مچھ ءَ کُشگ بیتگیں مردماں کَل ءُ کسارت کن اَنت –

زانگ بہ بیت دو ءُ سَے جنوری ءِ میانی شپ ءَ مچھ ءَ دَہ کاریزکار کوشانی وئیل دیم ءَ اتکگ اَنت چریشی ءِ ھلاپ ءَ شال ءِ روکپتی شھدگ ءَ ھزارہ برادری ءِ زھرشانی بنجل ءَ مروچی چارُمی روچ سرجم بیتگ ءُ چریشی ءَ ابید سندھ ءِ بنجاھی شھر کراچی ءِ جتا جتائیں جاھاں زھرشانی برجاہ اِنت –