ھزارہ برادری ءُ سرکار ءِ میان ءَ گپ ءُ تران بے سوب

مچھ ءَ کُشتگیں ھزارہ برادری ءِ کاریزکارانی تہ ءَ بلوچستان شھدربر ءِ نودربر مشتاق حسین ھم ھوار اِنت کہ آئی ءَ سرجمیں بلوچستان ءَ یک ھزار ءُ پنجاہ ءُ سَے نمبر گپتگ ءُ سیمی نمبر بیتگ –

دی بلوچستان پوسٹ

بلوچستان ءِ دمگ مچھ ءَ وتگڑیں نیکراھی جنگول داعش ءِ دستاں کُشگ بیتگیں ھزارہ برادری ءِ کھولاں جونانی کَل ءُ کسارات کنگ نہ منّ اِتگ –

سر بیتگیں ھالانی رد ءَ سرکار ءِ گون ءَ گپ ءُ تران بے سوب بیگ ءَ پد ھزارہ برادری ءِ نندانک شال ءَ برجاہ اِنت –

پاکستان ءِ تھ ئِے کارانی وزیر شیخ رشید ءَ ھوار بلوچستان ءِ سرکار ءِ وزیراں زھرشانی کنوکانی گون ءَ گند ءُ نند کرتگ ءُ گُشتگ کہ وئیل ءَ شرمندگ اِنت، شما شھیدانی کَل ءُ کسارات ءَ بہ کن اِت، بلے زھرشانی کنوکاں درسیں سدکی رد کرتگ ءُ پاکستان ءِ سروزیر عمران خان شال ءِ آیگ ءِ لوٹ کرتگ –

زانگ بہ بیت مچھ ءِ دمگ گیشتری ءَ وتگڑیں نیکراھی جنگولانی ٹولی داعش ءِ اُرش ءَ کُشتگیں کاریزکارانی کھول ءُ مجلس وحدت المسلمین ءَ شال ءِ شھر ءَ رودراتکی شھدگ ءَ نندانک جتگ ءُ نشتگ اَنت –

ٹنٹیں سارتی ءَ ابید ھم ھزارہ برادری ءِ زالبول، چُک ءُ کماشانی یک مزنیں کچے نندانک ءَ ھوار اَنت، جتا جتائیں پھناتاں سیادی کنوکیں سروکاں نندانک ءَ بھر زرتگ ءُ ھزارہ برادری ءِ گون ءَ پدردی درشان کرتگ، ڈپٹی کمشنر شال اورنگزیب بادینی ءُ ایف سی ءِ واکداراں زھرشانی کنوکانی گور ءَ گپ ءُ تران ءَ سر بیتگ اَنت بلے زھرشانی کنوکاں زھرشانی ءِ ھلاس کنگ نہ منّ اِتگ –

دوشمبے ءِ شپ ءَ بلوچستان ءِ سرکار ءِ وزیر ظھور بلیدی ءُ نور مھمد دمڑ ءَ زھرشانی کنوکانی گپ ءُ تران ءَ وت ءَ رسینتگ ءُ مچھ ءِ وئیل ایر جتگ –

ظھور بلیدی ءَ کھولانی گون ءَ دزبندی کرتگ آ جوناں کَل ءُ کسارات بہ کن اَنت، بلے گوستگیں وزیر مجلس وحدت مسلمین ءِ رھشون آغا رضا ءُ زھرشانی کنوکاں گْوشت کہ جاور کجام ھم رنگ ءَ بہ بنت نِی گپ بس بنجاھی پتر ءَ گوں بیت، بنجاھی پتر ءِ نمائندگ بیاینت ءُ نشتگیں مردمانی گون ءَ گپ ءُ تران بہ کن اَنت –

آیاں گوشت کہ بلوچستان ءِ سرکار اے رویش سک بژنیگ اِنت کہ دو روچ گوزگ اِنت بلے بلوچستان ءِ سرکار ھچ کس نیاتکگ ءُ کھولانی گون ءَ دوچار نہ کپتگ اَنت،بے دردی ءَ کُوش ءِ وئیل ءِ سر ءَ بلوچستان ءِ سرکار ءِ گوشاں مورے ھم نہ وارت، کُشندھانی دزگیری ءَ داں جونانی ھمراھی ءَ زھرشانی برجاہ مان اِت –

مجلس وحدت مسلمین سید آغا رضار مھمد رھشون گوستگیں وزیر سید آغا رضا مھمد ءُ شھیدانی ایکشن کمیٹی ءِ رھشوناں مچھ ءِ آمیدگسی پَٹ ءُ پول کنگ، مچھ پھزداراں یکر کنگ ءُ سرجمیں پَٹ ءُ پول ءُ شھیدانی کھولاں ھونانی دیگ ءِ لوٹ کرتگ اَنت –

دومی نیمگ ءَ پاکستان ءِ تھ ئِے کارانی وزیر شیخ رشید دراھیں ایکیم کنگ ءَ پد ھم زھرشانی کنوکاں نندانک ءِ ھلاس کنگ رد کرتگ ءُ لوٹ کرتگ کہ سروزیر عمران خان وت شال ءَ بئیت ءَ مارا درستاں گند ءُ نند بہ کنت ءُ جاورھالاں بہ چار اِت –

پاکستانی تھ ئِے کارانی وزیر شیخ رشید ءَ وتی درشان ءِ تہ ءَ گوشتگ کہ مچھ ءَ بزگانی گون ءَ زُلم بیتگ ءُ من اے وئیل ءِ سر ءَ شرمندگاں –

شیخ رشید ءَ زھرشانی کنوکاں گوشتگ کہ سر وزیر ءَ کلوہ کرتگ کہ کجام رنگ ءَ مچھ ءِ وئیل ءَ جرمکاریں مردماں یلہ کرت نہ کن آں، سدکی دے آں کہ مچھ ءِ ھواریں وئیل ءَ دزمانجنیں مردم نہ رک اَنت –