کریمہ بلوچ ءِ “کوش”: فرانس ءَ زھرشانی

بلوچ نیشنل لیگ، بلوچ وائس ایسوسی ایشن ءُ ساؤتھ ایشیا رسانکدر ءِ نیمگ ءَ فرانس ءَ کینیڈین سفارت ءِ دیم ءَ بلوچ نودربر رھشون بانک کریمہ بلوچ ءِ “ناگتی کوش” ءِ ھلاپ ءَ ھمگرنچیں زھرشانی کنگ بیتگ –

دی بلوچستان پوسٹ

فرانس ءَ جھنندیں پشتوناں ھوار دگہ راجاں سیادی کنوکیں باسکاں زھرشانی ءَ بھر زرتگ ءُ کریمہ بلوچ ءِ “کوش” ءِ سر ءَ زھر ءِ درشان کنان ءَ گوشتگ کہ کوش ءِ درگت ءَ شریں رنگے ءَ پَٹ ءُ پول کنگ بہ بیت بلوچستان ءَ انساپ دیگ بہ بیت – آیاں گوشت کہ بلوچستان ءَ سیاسی باسکانی نشانگ کنگ ءِ کوشانی دارگ ءَ ابید نِی دنیا وتی ڈیھاں مئے کوشاں ناگتی گوشگ ءَ اِنت –

زھرشانی کنوکاں سرجمیں دنیا ءَ بلوچ سیاسی باسکانی پھریزگ ءِ دزبندی کرتگ ءُ کریمہ بلوچ ءِ کوشکارانی گرگ ءُ سزا دیگ ءِ لوٹ کرتگ –

ھمے رنگ ءَ بلوچ نیشنل لیگ ءِ آرگنائزر ڈاکٹر علی اکبر ءَ گوشت کہ ھمے رنگ ءَ شکی ئیں رنگے ءَ کوش سویڈن ءَ گوستگیں سال ءَ بلوچ اھوالکار ساجد ھسین ءِ کوش ءَ نزیک کنت اے یک ریاستی کوشکاری ءِ کہ چریشی ءِ روتگ پاکستانی چیریں ادارھاں رؤت ھوار بیت، آئی ءَ گوشت کہ بلوچ راج کینیڈا ءُ سویڈن ءِ وڑین دودمانیں ڈیھاں یک اُمیتے داریت ءُ کینیڈا ءِ سرکار اے بیتگیں وئیلانی ریشگ ءَ بہ رو اَنت ءُ پَٹ ءُ پول بہ کن اَنت-

بلوچ وائس ایسوسی ایشن ءِ سروک منیر مینگل ءَ کینیڈین سپارت ھانہ ءِ واکداراں باوست کنان ءَ گوشتگ کہ ریاست پاکستان بلوچستان ءَ بے دردی ءَ بلوچ نسل کُشی ءَ کنگ ءَ اِنت بلے اے سال ءِ گڈی ءَ ریاستی پالیسیانی تہ ءَ بدلی اتکگ ءُ چریشی ءَ اے زانگ بیت آ میان اُستمانی دنیا ءَ ھم بلوچ سیاسی لیڈر شپ ءُ باسکاں ترس آماچ بیتگ ءُ آیانی توار ءَ بند کنگ لوٹ ایت، آیاں گوشت کہ ما کینیڈین ءِ واکداراں ھوار سویڈن ءُ متھد عرب امارات ءَ گوں دزبندی کن ایں کہ آ پاکستان ءِ شیتانی ریپکاں سرپد بہ بنت ءُ راشد ھسین ءَ ھوار بانک کریمہ ءُ ساجد ھسین ءَ انساپ بہ دے اَنت – زھرشانی ءَ اھوالکار طلحہ صدیقی، پشتون تھپز مومنٹ ءِ فضل الرحمان آفریدی ءَ تران کرتگ ءَ بلوچ راج ءِ سر ءَ کپتگیں ناوشیں درد ءِ سر ءَ پدردی درشان کرتگ –