دامن شاشان پبلک لائبریری گریشہ کمیٹی ءِ نیمگ ءَ دیوانے برجم دارگ بیتگ

دیوان کمیٹی ءِ چیردستی ءَ کنگ بیتگ ءُ دیوان ءَ کتابانی سر ءَ چمشانک دیگ بیتگ دیوان ءِ سروکی نصیر کیّا بلوچ ءَ کُرتگ –

دی بلوچستان پوسٹ

گریشہ: چہ دامن شاشان پبلک لائبریری گریشہ کمیٹی ءِ نیمگ ءَ کتابانی سر ءَ چمشانکی نیادے کنگ بیتگ –

دیوان ءَ لبزانکی مردماں بھر زرتگ ءُ دیوان ءِ سروکی کمیٹی ءِ جنرل سیکرٹری نصیر کیّا بلوچ بیتگ ءُ کتابانی سر ءَ عزیز شاد ءَ چمشانک داتگ –

دیوان ءَ نپولین ہل ءِ کتاب “سوچئے اور دولت کمائیے ” ءِ سر ءَ عزیز شاد ءَ چمشانک داتگ ءُ گوشتگ کہ اے کتاب پَٹ ءُ پول ءِ بنیاد ءِ سر ءَ اِنت –

آئی ءَ گوشت: نپولین ہل ءِ گوش ایت کہ اگاں کسے ءَ سوبمند بیگ لوٹ ایت گڑا آئی ءَ شرگداری ءِ دیمپاب الم بیگ لوٹ ایت –

عزیز شاد ءَ گوشت کہ ھنچش دنیا ءِ لبزانک ءِ تہ ءَ شرگداری جوانیں رنگے ءَ کنگ بیتگ اَنت ھنچش بلوچ لبزانک ءَ ھم شرگداری ءِ المی اِنت ءُ باید ندکار شرگداری ءِ تہ ءَ وتی دستاں ھم ھوار بہ کن اَنت بلے بلوچ لبزانک ءِ تہ ءَ شرگداری ءِ ھساب آرت ءِ تہ ءَ واد ءِ ھساب ءَ اِنت –

زانگ بہ بیت دامن شاشان پبلک لائبریری یک کتابی گلے ءُ وھد وھد ءِ سر ءَ چاگردی کارانی سر ءَ ھم وتی دیواناں برجم داریت ءُ دمگ ءَ ھواریں مردماں پہ وانگ ءُ زانگ ءِ نیمگ ءَ سکین دنت –

اے کتاب جاہ ءِ بنھِشت ءِ اولی دیوان دوھزار ءُ بیست ءَ بیست ءُ ھشت جون ءَ برجم دارگ بیتگ کہ آئی ءِ چیئرمین ماسٹر مسعودبلوچ، وائس چیئرمین ماسٹر ظریف امام، جنرل سیکریٹری نصیر کیّا بلوچ، ڈپٹی جنرل سیکریٹری جاوید اقبال، انپارمیشن سیکریٹری عرفان نواز ءُ فنانس سیکریٹری گل حسن بلوچ نامینگ بیتگ اَنت –