کراچی: بیگواھیں بلوچانی واستا زھرشانی برجاہ

دی بلوچستان پوسٹ

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ نیمگ ءَ زھرشانی برجاہ، زھرشانی بنجل ءَ چارھزار ءُ یک سد ءُ ھشتاد ءُ یک روچ سرجم بیتگ – سندھ ءِ ملاح فورم کراچی ھنکین ءِ سروک سکندر ءُ کابینہ ءَ بنجل ءِ تر ءُ تاب کرتگ ءُ کھولانی گون ءَ پدردی درشان اِتگ –

وی بی ایم پی ءِ رھشون ماما قدیر بلوچ ءَ ھمے وھد ءَ تران کنان ءَ گوشتگ کہ ھزاراں بلوچ پُسگ پاکستانی چیریں ادارھاں بیگواہ کرتگ اَنت، اے وڑی ءَ مارا مردمانی دزگیری ءُ شھیدیاں تاوان بیتگ بلے پُرایمنیں جد ءُ جھد ءَ راجی زرمبشت دریا اَنت ھچ بر ھلاس نہ بنت آ وتی راہ ءَ وت گچین کن اَنت ءُ وتی رھشون ءَ وت ودی کنت –

آئی ءَ گْوشت کہ پُرایمنیں جد ءُ جھد ءَ شکساتگیں دیمونی، بلوچ پُسگانی ھمک روچی ءِ پیم ءَ شھیدیاں مروچی مھلوک چِست بیتگیں جد ءُ جھد ءِ جزبک ءَ بے کچوئیں مھراں گل ءَ نزیکی ءِ ریشگ ءِ بدولت ءَ مروچی پُرایمنیں جد ءُ جھد تیزیں گاماں منزل ءِ نیمگ ءَ روان اِنت –

ماما قدیر بلوچ ءَ گوشت کہ بلوچ پُسگانی بیگواہ کنگ ءَ ریاست ھچبر وتی لوٹاں سرجم کرت نہ کنت، ریاست ءِ ردی پھمی اِنت کہ آئی ءَ بلوچانی گار کنگ ءَ ناں سرجمیں دنیا ءَ بلوچانی کرد ءُ دھشتی پدراھی کرتگ –

آئی ءَ دیمتر ءَ گْوشت کہ دنیا ءِ تہ ءَ اگاں زوراکیں تاکتانی سر ءَ چمشانک بہ دے گڑا زورگرانی راجدپتر گوش ایت کہ زوراکیں تاکتاں ھروھد ءَ زیردست ءُ بزگیں راجانی سروک ءُ دھشتیں سر نشانگ کرتگ اَنت تانکہ آیانی توان ءُ سیاسی زور ءَ داروکیں مردم پشت مہ کپ اَنت –