پنجگور ءُ تمپ ءَ پوج ءِ لشکر کشی برجاہ، بالگردانی تیرگواری

دی بلوچستان پوسٹ

بلوچستان: پنجگور ءُ تمپ ءِ دمگاں پاکستانی پوج ءِ نیمگ ءَ لشکر کشی برجاہ اَنت، لشکر کشیانی میان ءَ پاکستانی پوج ءَ بازیں دمگاں بمبگواریں بالگردانی گون ءَ تیرگواری کرتگ، وھدیکہ بازیں دمگ لشکری انگیر ءَ اَنت –

گیشیں ھالانی رِد ءَ مروچی سیمی روچ ءَ پنجگور ءَ لشکر کشی برجاہ، کیلکور ءِ دمگ خدال، کاشت، بیرونٹ، کرکی، ہالی ریک، پلیمک، کلیڑی، زرد ءُ سیتوک ءَ لشکر کشی برجاہ انت-

اھوالکار ءِ رِد ءَ کاشت ءِ کوھی دمگاں بالگرداں تیرگواری کرتگ، دنیگت ءَ ھچ وڑیں جانی ءُ مالی تاوان ءِ ھال نیست –

دومی نیمگ ءَ کیچ ءِ دمگ تمپ ءَ کوھاڈ ءِ میتگ ءُ چپ ءُ چاگرداں پاکستانی پوج بازیں کساسے ءَ شُتگ، مھلوک ترس بیم ءِ آماچ –

دمگی اھوالکار ءَ ٹی بی پی ءِ گون ءَ تران کنان ءَ گوشتگ کہ گوستگیں روچ ءَ پاکستان پوج مزنیں کساسے ءَ تمپ ءِ دمگ کوھاڈ، نزرآباد، رودبن ءِ دمگاں اتکگ ءُ وھدیکہ تمبور ءِ سیل ءُ گرد جاہ ءَ پوج ءَ وتی پانگس ءِ جوڑ کرتگ –

آئی ءِ گوشگ انت کہ پوج ءَ رؤگ ءُ آیگی راہ ءُ در بند کرتگ انت – بلے دنیگت ءَ ھچ وڑیں دزگیری ءُ جانی ءُ مالی تاوان ءِ ھال نیست –