بولان ءَ پوج ءِ لشکر کشی برجاہ اَنت

چہ یک ھپتگے ءَ بولان ءَ پاکستانی پوج ءِ نیمگ ءَ لشکر کشی برجاہ اَنت، لشکر کشی ءِ وھد ءَ بیگواھی، لوگ ءُ جنگلانی سوچگ ءِ ھال سر بیتگ اَنت ءُ ھمے رنگ ءَ پنجگور ءَ پوج ءَ یک لوگے ءَ بیڑ برتگ ءُ چُک جنین لَٹ ءُ کُٹ کرتگ اَنت –

دی بلوچستان پوسٹ

بلوچستان ءِ دمگ بولان ءَ لشکر کشی مروچی ھم برجاہ اِنت چریشی ءَ پوج ءَ بازیں جاھاں چپ ءُ چاگرداں پیش گامی کنگ ءَ اِنت وھدےکہ بمبگواریں بالگرد ءُ چیریں بالیگانی برز ءَ بال برجاہ اِنت –

گیشیں ھالانی رد ءَ مروچی ھپتمی روچ ءَ بولان ءِ کش ءُ گوری دمگ بزگر، گڑانگ، یخو ءُ اُچ کمان، چیسن، پوڑ ءُ میاں کور ءَ پوج ٹوھیں لشکر کشی ءِ کنگ ءَ اِنت – لشکر کشی ءِ وھد ءَ پوج سھت ءُ دمان مارٹر گولہ ھم آس دیگ ءَ اِنت –

دومی نیمگ ءَ ھرنائی ءَ ھواریں دمگ جھالاوان، پنکی، لونج، میژداری ءُ کش ءُ گوری دمگاں پوج پیش گامی کنگ ءَ اِنت – چہ شاھرگ ءَ گوستگیں روچاں پانزدہ مردم دزگیر کنگ ءَ پد پوج ءَ ناشناسیں جاھاں برتگ اَنت کہ داں انیگ ءَ آیانی ھال نیست –

دمگی مردمانی رد ءَ گوستگیں روچ ءَ کمان ءَ پوج ءَ قادربکش سمالانی ءِ لوگانی مڈیانی برگ ءَ پد لوگ مانداشتگ اَنت- چریشی ءَ پیسر غربوک، سجاول ءِ سبزاوگیں جنگل ءِ سوچگ ءِ ھال ھم سر بیتگ اَنت –

جنگ زدگیں دمگ ءِ انگیر بیگ ءِ سوب ءَ جانی ءُ مالی تاوانی سرجمیں ھالانی رسگ مشکل اِنت، بلے دمگی مردماں گوشتگ کہ رؤ آیگ ءِ راہ ءُ درانی بند بیگ ءَ گیشتر ھما مردماں کہ نادراہ اَنت آیانی واستا مزنیں جیڑھے مِک اِنت –

واکداراں ھپتمی روچ ءَ برجاھیں پوجی لشکر کشی ءِ بارہ ءَ تنی وھدی ھچ ھال دیم ءَ نیاؤرتگ –

ھمے وڑ ءَ بلوچستان ءِ دمگ پنجگور ءَ پاکستانی پوج ءَ یک لوگے ءَ بیڑ برتگ ءُ اود ءَ چُک ءُ جنینانی سر ءَ زوراکی کرتگ –

چہ پنجگور ءَ گیشیں ھالانی رد ءَ گوستگیں شپ ءِ ساھت ھشت ءَ پاکستانی پوج ءَ بابر یوسف ء ھاجی عبدالحمید ءِ لوگانی سر ءَ بیڑ برتگ ءُ اود ءَ لوگ پَٹ ءُ ھند کرتگ ءُ جنین ءُ چکانی سر ءَ زوراکی کرتگ –