کراچی ءَ بیگواھیں مردمانی ھاتر ءَ زھرشانی برجاہ

بلوچستان ءِ تہ ءَ نوکیں سال ءِ بندات پوجی لشکر کشی ءَ کنگ بوتگ پاکستانی پوج ءَ زوراکی کنان ءَ بلوچ راج ءَ ھمے کلوہ داتگ کہ نوکیں سال آجوئیں راجانی ھاتر ءَ پرارزشتی داریت – ماما قدیر بلوچ

دی بلوچستان پوسٹ

سندھ ءِ بنجاھی شھر کراچی ءَ بیگواھیں بلوچانی ھاتر ءَ زھرشانی برجاہ، وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ ھپتاد ءُ ھشت روچ سرجم بوتگ –
سندھ سجاگ ءِ باسکاں ءُ وکیل آں بنجل ءِ تر ءُ تاب کُرتگ ءُ بیگواھیں مردمانی کھولانی گون ءَ دلپدردی درشان اِتگ –

بیگواھیں راجداریں رھشون ڈاکٹر دین محمد بلوچ ءِ زھگ مھلب دین، انسانی ھکانی باسک راشد حسین بلوچ ءِ مات ءُ آئی ءِ برازتک، نودربر رھشون شبیر بلوچ ءِ گْوھار ءُ رحمت بلوچ ءِ کھول ءِ مردماں بنجل ءَ اتکگ ءُ وتی زھرشانی نبشتگ کنائینتگ اَنت –

وائس فار بلوچ مسنگ پرسنز ءِ رھشون ماما قدیر بلوچ ءَ تران کنان ءَ گوشتگ کہ بیست ءُ یکمی کرن ھنچوش کہ تیز رواج ءُ ٹیکنالوجی دور انت ھمے وڑ مردم ھم گُنگ ءُ کر جوڑ بوتگ انت ھمود ءَ کہ مردم بے ترک ءُ توار ءَ وتی زند ءَ گوں بندوک انت، ھمساھگ وتی جاہ ءَ وتی مات ءُ پت سیاد ءُ وارسانی دید ھم نسیبی ءِ کِسہ اَنت –

آئی ءَ دیمتر ءَ گوشتگ کہ چہ ریاستی پوج ءِ نیمگ ءَ آوار جنگ ءُ بیگواہ بوتگیں مردمانی درگت ءَ دنیا ءَ وتی نیمگ ءَ دلگوش کنگ یک جوانیں گامگیجے –

ماما قدیر بلوچ ءَ گوشتگ کہ بلوچستان ءِ تہ ءَ نوکیں سال ءِ بندات ھم پوجی لشکر کشی کنگ بوتگ – مروچی پاکستانی پوج ءَ پنجگور ءَ ھوار ایندگہ دمگاں زوراکی بندات کرتگ ءُ بلوچ راج ءَ ھمے کلوہ داتگ کہ نوکیں سال پہ آجوئیں راجانی ھاتر ءَ پرارزشت اِنت – دومی نیمگ ءَ بولان ءَ پوجی لشکر کشی ءَ شش روچ سرجم بوتگ کہ اود ءَ شکست وارتگیں پاکستانی پوج لس مھلوک ءُ جنگلانی سر ءَ وتی زھراں کشگ ءَ اِنت-

آئی ءَ گوشتگ کہ زند تھنا دھشتے ءِ کھولی شَے ءِ نہ انت بلکیں اے راجی ءُ انسانی پرزے، ھمے پرز ءُ انسانیت ءِ راہ ءَ مروچی آ لٹ ءُ کُٹ، زند ءُ مرگ ءِ دیمپان انت بلے آھاں زندانانی تہ ءَ پہ لٹ ءُ کٹ ءَ شکست دیگ ارزان نہ انت –