بولان ءَ بازیں روچاں پاکستانی پوج ءِ لشکر کشی برجاہ اَنت

بولان ءُ کیچ تمپ ءَ پوجی لشکر کشی برجاہ اَنت ءُ کمان ءَ پاکستانی پوج ءَ قادر بکش سمالانی ءِ لوگ ءَ بیڑ برتگ ءُ اود ءَ ساز ءُ سامانی برگ ءَ لوگ ماندارگ بوتگ –

دی بلوچستان پوسٹ

سر بیتگیں ھالانی رد ءَ بولان ءِ بازیں جاھاں گوستگیں بازیں روچاں پاکستانی پوج ءِ زمینی ءُ برزی لشکر کشی برجاہ اَنت کہ چریشی ءِ سوب ءَ داں انیگ ءَ بازیں جاھاں بازیں مردم دزگیری ءَ پد بیگواہ بیتگ اَنت ھمے وڑ بازیں جاہ تنی وھدی پوج ءِ انگیر ءِ تہ ءَ اَنت کہ چریشی ءِ سوب ءَ دمگاں رؤگ ءُ آیگ ءَ ٹوھیں جنجالانی دیمپانی اِنت گیشتر نادرہ ءُ زالبول ءُ چک ھوار اَنت کہ دمگاں ڈن روگ ءَ دار ءُ درمانی ءَ جیڑھانی آماچ اَنت-

گوستگیں روچ ءَ بولان ءَ ھواریں دمگ چیسن، پوڑ ءُ میاں کور ءَ بمبگواریں بالگرد تیرگواری کنگ ءَ گندگ بیتگ اَنت – ھمے وڑ پوج ءَ غربوگ سجاول ءِ سبزاوگیں جنگل مانداشتگ –

دومی نیمگ ءَ شاھرگ ءَ لشکر کشی ءِ وھد ءَ دزگیر کرتگیں پانزدہ مردمانی پجار کہ آیانی تہ ءَ شیر مھمد ء تاج مھمد، عطاء اللہ شیر مھمد، ملک منظور اھمد ء ھاجی منیر اھمد، طیب اھمد ء ملک منظور اھمد، سعید اھمد ء نزید اھمد، حفیظ الحمٰن ء عبدالرحمٰن، عزیز الرحمٰن، عبدالرازق ء شیر زمان، نور مھمد، صابر ھان ء گازی ھان، علی مھمد ء ظفر ھان، خالق داد ء خیرا، منڈا ء مھمد امین، شیر اھمد ء کجیر ھان، بابو دودا ء بابو زر ھان ھوار اَنت –

زانگ بہ بیت بولان ءَ لشکر کشی ءِ بندات گوستگیں روچاں جھالاوان تنک ءِ ھند ءَ پاکستانی پوج ءِ سر ءَ یک ٹوھیں اُرشے ءَ پد کنگ بیتگ – اُرش ءَ سلاہ بندیں مردماں پوج ءِ پانگس دستیگ کرتگ سِلاہ ءُ دگہ جنگی ازباب گون وت برتگ اَنت- چریشی ءَ پد پوج ءِ کُمک ءَ دمگ ءَ دگہ لشکری روگ ءَ بیتگ اَنت ءُ گاڑی آئی ای ڈی ءِ نشانگ کنگ بیتگ –

واکدارانی رد ءَ ھردوکیں اُرشاں پوج ءِ نُھ کارندہ بیران ءُ دوازدہ زدگ بیتگ اَنت – بیران ءُ زدگ بیتگیں کارندھانی تہ ءَ صوبیدارے ءَ ھوار پاکستانی پوج ءِ کیپٹنے ھوار اِنت –

ھردوکیں اُرشانی زمہ واری بلوچ لبریشن آرمی ءَ منّ اِتگ اَنت – گل ءِ جارکش جیئند بلوچ ءِ رد ءَ ھردوکیں اُرشاں پاکستانی پوج ءِ سیزدہ کارند مرتگ ءُ باز زدگ کرتگ اَنت –

ھمے وڑ کیچ ءَ ھواریں دمگ تمپ ءِ جنگل ءَ ھم پاکستانی پوج ءَ بیڑ برتگ –

دمگی مردمانی رد ءَ مروچی سھب ءَ تمپ ءِ دمگ کُنشکلات، نظر آباد ءُ ملک آباد ءِ جنگلاں پاکستانی پوج ءَ بیڑ برتگ ءُ اود ءَ پَٹ ءُ پول بندات کرتگ –

دمگی مردمانی رد ءَ پاکستانی پوج ءِ گاڑیانی ھواری ءَ پَرپٹاں سواریں کارندھاں جنگل انگیر ءَ کرتگ ءُ پَٹ ءُ پول اش بندات کرتگ –