لچہ: گُباراں گپتگیں سال شت
لچہ کار: ریاض نصیر
دی بلوچستان پوسٹ
گُباراں گپتگیں سال شت
گوں ھینّاریں دل ءِ درداں
زمین جمبیں آہ ءُ چیہانٹاں
زمین ترکّ اِت نا آزماں کپت
نا وارت دُنیا ءِ گوش مور ءَ
بلئے پہ ما تباہی، بس تباہی اَت
ھُدا زانا تئی بندہ نہ ایں ما ؟
کہ مئے بْرمشانی بْرمشاں ہم کسے نیشکنت
مئے ماتانی جگر بُریں اے چیہانٹاں
سرا زرتگ جہان ءَ را
بلَے تو چارئے ہر نیما
کہ بے ترکّ ءُ تواری اِنت
منی عہد ءِ تمردیں زال
منی راج ءِ یلیں رھشون
درانڈیھ ءَ
کُشگ ءُ دَور دیَگ بنتیں
اَیا مارا ھُدا نیستیں؟
یا ما وت مانزمانیں،
وتی اے جاورانی
وتی اے بے بسی ءِ
وتی اے بے سْرپی ءِ
وتی اے بے سری ءِ
اے سال ءُ ماہ پر گردَنت
بلَے پہ ما تپاوت نیست
چیا کہ مارا طاقت نیست
ہزاراں اُزر ءُ نیمون اَنت
بلَے چم کور وتی اَئیب ءَ
وتارا گنِد ءُ سرجم کن
وتارا پاک ءُ پلگار کن
تو پرچا چوش نیزگارئے؟
چو گاریں تولگ ءَ ھولّ ئے؟
تئی نام دپتراں ایر اِنت
چیا چہ وت شَمُشکارئے
وتا پد جن، وتا در گیج
ہمے تئی راہ ءُ رھبند انت
ہمے تئی شکّلیں سوب انت