لچہ: موتکے پہ شھید بانک کریمہ ءِ ارواہ
لچہ کار: ھپیز اولیاء
دی بلوچستان پوسٹ
منی درد ءُ اندو چکاریں اے گیراں ترا پہ زھیراں
مہ بارتیں اوں کسے مئے بادگیراں ترا پہ زھیراں
وتن پسگاں تئی نوں وارتہ اوں سوگند گرنتیں تئی بیراں
بہ گواری نوں لشکر وتی بمب ءُ تیراں ترا پہ زھیراں
نہ کنزیں ما پشت ءَ روانیں پہ منزل داں آجوئی آسر
وتن ماتیں بچاں من کرباناں زیراں ترا پہ زھیراں
تئی جھدے کندیل بلانیں جھان ءِ ھمک ءُ کنڈ کُنڈ ءَ
منی راج ءِ ورنا سباہ ءُ منیراں ترا پہ زھیراں
نیار اَنت نوں موتکے منی ھلکے شانتل پہ زید ءُ بھاراں
کت ءَ پکر بلند تئی مئے ورنا ءُ پیراں ترا پہ زھیراں
گُشے کپتگ آسے دل ءَ مئے بلوکیں نوں آشوب روکیں
وتن بیرگ ءَ بُرتہ سردار ءُ میراں ترا پہ زھیراں
تئی ھون ءِ ھار ءَ کہ آورت ءَ آشوب ماں کُلیں جھان ءَ
نہ ترسیں گھار ءُ تئی برات شیراں ترا پہ زھیراں
پد ءَ مرچی واب ءَ گُڈینت ءَ تو راجے ءُ جھدے کریمہ
بچار جھد ءَ چنچو ھپیز من نوں دیراں ترا پہ زھیراں