کراچی ءَ بیگواھیں مردمانی ھاتر ءَ زھرشانی برجاہ

پوج ءُ چیریں ادارھانی لشکر کشی آھانی زورانسری آوار جنی ءُ زانگولیں جونانی دور دیگ ءِ رِد یکشل ءَ برجاہ انت – ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ بیگواھیں بلوچانی ھاتر ءَ زھرشانی برجاہ، وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ ھپتاد ءُ ھپت روچ سرجم بوتگ –

بلوچ یکجھتی کمیٹی کراچی ءِ کنوینئر بانک آمنہ بلوچ، ماہ گنج بلوچ، شال ءَ چہ حوران بلوچ ءُ دگہ مردماں بنجلے تر ءُ تاب کُرتگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ وائس پار بلوچ مسنگ پرسنز ءِ وائس چئیرمین ماما قدیر بلوچ ءَ گوشتگ کہ بلوچستان ءِ تھا ھمک روچ آس ءُ ھون ریچی ءَ گیش کنگے ھاتر ءَ ریاستی تاگت ھمک روچ زلم زوراکی دیما آرگ ءَ اِنت- پاکستانی پوج ءُ چیریں ادارہ لشکر کشی ءُ زورانسری آوار جنی ءُ زانگولیں لاشانی درآھگ ھمک روچیگیں کار جوڈ بوتگ –

ماما قدیر بلوچ ءَ گوشتگ کہ راستی ءِ منّگ ءُ بلوچ راج ءَ ھونانی تھا شودگ ءُ آئی سرڈگار ءُ مال مڈیاں سرا کبزہ کنوکاں انساپ ءِ دیما اوشتگی انت ءُ وتی زوراکی ءَ پد کِنز بوھگی انت –

آئی ءَ گوشتگ کہ وھدے کہ بلوچاں زورگپت ءِ گردن ءِ سرا پاد ایر کُتگ ء آھانی دست تاب داتگ گڑا آھانی چیھال در اتکگ انت کہ بلوچ بدتمیز ءُ گیر مہزب انت – اشی ءَ نو آبادیاتی اخلاق ءُ تھذیب واست ءَ ھترہ لیکیت – بلوچ چک چینی ءَ ھواریں اسپیت پوشاکیں لبرل مزنیں لگن ءُ نرمیں گالوار بلوچ راج ءَ سوج کنگ ءَ انت –

آئی گوشتگ کہ زوراک وتی بے سوبی ءِ بدل ءَ بولان ءُ مکران ءِ دمگاں وتی انگیر کنگ انت مھلوک ءَ آوار جنگ ءُ بیگواہ کنگ انت – گوستگیں روچ ءَ شاھرگ ءَ پانزدہ مردم پاکستانی پوج ءَ آوار جتگ ناشُناسیں جاہ ءَ بندیگ کرتگ انت وھدیکے بلوچستان ءِ جنگلاں ھم لشکری بُن دئیگ انت –

گڈسر ءَ ماما قدیر بلوچ ءَ گوشتگ کہ اے وڈیں کارانی کنگ ءَ چہ بلوچ چاگرد ءِ تھا پاکستانی تاگت ءُ آئی چاریگانی بگیری ءَ زھر گیشتر بیت-