نبشتانک: ماہ شان، دو ھزار بیست ءِ داتگیں درد
نبشتہ کار: مھروان کمبر
دی بلوچستان پوسٹ
ماھو!
وھدے بے ریائیں چول زندگی ءِ تیاب ءَ کاینت ءُ زوت واتر بنت زندگی ءِ دگہ یک سال ءِ سرجم بوت۔۔ ھمک نوکیں سال ءِ اول سرا ما نوکیں واب چماں سمبھین ایں۔ وتار ءَ منارینگے جُھد ءَ کنیں۔ بلے مئے گیشتریں واب زوراکیں وھد ءِ دست ءَ لپاشگ بنت بازیں واھشت ناسرجم بنت ءُ سال ھمے داب ءَ گوزانت۔
ماھو!
اے ساھتاں دسمبر ءِ گُڈی بیگاہ ءِ ابیتکیں ساھَت ایں، ایوکی ءِ دگ اِنت ءُ تھنائی ءِ گُباراں گِپتگیں تھنائیں من ءُ تئی جگر بُریں ھزاراں یات۔گُشے اے تھنائیں ساھَتاں منی ویرانیں چمانی دُنیا چو تاکریچ ءِ موسماں گپتگیں درچکانی پیم ءَ اِنت ءُ منی چاریں آتراپاں ویرانی ءِ ناچ ءَ اِنت۔ بیدے تئی نپس گیریں یات ءُ زھیر ءُ جُتائی ءِ درداں دگہ ھر چیز ءَ زردیں شال ءِ مانپوشتگ ءُ واب کپتگ انت۔۔۔ شالا اے یاتاں وت ءَ ھم زردیں شالے مان پوشتیں بلکیں زندگی ءَ وت ءَ گیگ ءُ گور کُتیں۔۔۔ بلے اے گُلامیں دور ءُ باریگ ءَ زندگی کُجیں کہ مردم وتار ءَ گیگ ءُ گوم بہ کنت۔
ماھو!
وھدے دسمبرئے پُژمردگ ءُ دَمبرتگیں گُڈی روچ رولہ ءِ ساھَتاں گوں گریتگیں چماں زردیں شینکانی تہ ءَ دیم پہ شپ ءِ کُٹ ءَ وپسگ ءَ سرگیپت۔۔ نہ زان ءَ پرچا دسمبرئے گُڈ سری ءُ تھنائیں شپ منا گیشتر ابیتک ءُ بیچاڈ کنت۔
اے سرانوئیں ساھَتاں گوست ءِ مِھلبیں گیرانی گرنچ پچ بیت ءُ ھما درستیں مردم یات کاینت کہ یک وھدے منی دل ءِ نزیک ءَ بیتگ اَنت بلے وھد ءِ ھَمرائی ءَ آیانی سوچ ءُ لیکہ ءِ بدل بوھگ ءَ آ اچ من ءُ من آیاں چہ دیر بیتگاں۔ یا کہ بے سوب اچ منا چے دیر بیتگ انت۔ یا کہ زوراکیں وھدے پنجگ ءَ نہ سگّیں شَھماتاں چیر تراتگ اَنت۔ بلے گیشتر ھَما یات کاینت کہ ابدمانیں زندے گوازینتگ ءُ نمیرانیں مَرگے ءِ امبازاں رپتگ انت۔
ماھو!
ھَما اِنت کہ گلامی ءِ سیائیں روچ ءَ وتی جنوزامی شال مئے سرا مانپوشتگ گُڈا ھَمک سال وشی کم دنت ءُ گم گیش۔ انگت ھما سالانی ٹپ درمان نہ بنت ءُ سال دگہ ٹپ یے دلبند ءَ ایر کنت ءُ روت۔۔ پدا ھر سال ءِ ٹپانی تورشت چہ گوستگیں سالانی ٹپاں چہ گیش تورناک انت۔ ھَمے زِہ سریں دردانی تورشت چمانی واب ءُ زرد ءِ کرار ءَ پُلنت ءُ بے وابی ءُ بیکراری ءِ سوگاتاں بکشنت۔
بلے اے سال دو ھَزار بیست چہ گوستگیں سالاں گیشتر ھون آماچیں ءُ درد چکاریں سالے اَت، اے سال ءَ دردانی رمے گون اَت ءُ واد پِر شانتگیں ٹپاں گون مئے جبین ءِ ژانبلینت۔
ماھو!
ھر سال ءِ وش اتک ءَ دری راج ڈن ءَ در کاینت ءُ شاتکامی کننت، رنگانی دنیا ءَ کیپاں گوں ملار بنت۔ بلوچ ھم وتی شھرئے دگاں در کپنت بلے پہ شاتکامی ءَ نہ بلکیں پہ وتی گارو بیگوائیں مردمانی ھاتر ءَ ڈن ءَ در کپنت ءُ ارسانی تیاب ءَ اُوژناگ کننت دو ھزار بیست ءَ کہ دنیائے ایندگہ مُلک کرونا نامیں وائرسے ءَ گوں سر ءُ چیراِتنت بلے بلوچ گوں پاکستان ءَ سر ءُ چیر کہ ھمک میتگ ءُ بازار ءَ اِیر کَپتگ اَت ءُ بلوچ ءِ لوگاں آس دیان اَت، پُسگاں آوار جنان اَت ءُ شھید کنان اَت۔
ماھو!
جنوری ءِ بے چاڈیں بیگاھانی ابیتکی گوں گوریچ ءِ شیکگاں کُلبر ءُ زامران ءِ کوھانی تہ ءَ مھتل اَت کہ دودا گوں ھمراھاں زمین ءِ امبازاں واب کپت ءُ عھد ءِ پیشانی ءَ دوری ءِ زھیر گیش کُت اِنت ئے ءُ مارچ ءَ شال ءِ برپانی آپ بوھگ ءَ پیسر یورپ ءَ ساجد ھسین آوار جنئگ بوت۔۔
بلے ماھو اے سال ءِ گرانتر ءُ نہ وشتریں ماہ اپریل اَت، کہ اے ماہ ءَ لھتیں انچیںں سر اَچ ما پُل اِت کہ کرناں چہ اے وڈیں سر ودی بنت۔۔ بلوچستان ءَ چہ دور درانڈیھ ءَ ساجد ھسین ءِ لاش دست کپت ءُ بلوچستان ءِ وش کوشیں پروم ءِ کلہ کور یار مھمد میتگ ءَ پیرک جان گوں ھمراھاں دیم پہ دیمی جنگ ءَ نمیران بوت اَنت۔۔ مئی ءَ اپریل ءِ درد گیش کُت اَنت دو وانندھیں سر اھسان ءُ شھداد شور کلات ءَ دُژمن ءِ تیرانی دیمپان بیت اَنت۔
جون ءِ لواریں گم سر ءَ ساھیل ءُ ساچان اِتنت کہ کیچ ءَ بلوچ زالبول ملک ناز پاکستان ءِ داشتگیں سلاہ بندیں مَردماں شھید کُت ءُ برمش ٹپیگ جون ءِ گڈ سر ءَ چار ھاک شیدائیں سر، سلمان ھمل، سِراج کُنگر، شھزاد بلوچ ءُ مسلم جان ءَ پاکستان اسٹاک ایکسچینچ ءِ سر ءَ فدائی اُرش کُت ریھان ءِ ڈس اِتگیں کشک ءُ جنرل اسلم ءِ داتگیں پکر زندگ کُت اَنت۔
اگست ءِ ساوڈی نودانی ساچان ءَ دردانی دراجیں رمے گون ات۔ اے درد انگت درمان نہ اِتنت کہ ستمبر ءَ نوکیں درد مار ءَ پہ سوگات بکشات اَنت۔ مشکے ءِ سالونکیں سر ءُ مزن بند ءِ ارپان ءُ نورخان دیم پہ دیمی جنگ ءَ گلزمین ءِ امبازاں واب کپتنت ءُ دژمن انچو نزور تراِت کہ آیانی لاش ھم نہ دات اَنت وتی وڈ ءَ کبرانی میار کُت اَنت ئے۔
اکتوبر ءَ شال ءِ ایوکی ءِ مارشت درچکانی تاکاں زرد کنان اَت ءُ نومبر ءِ پشکپتگیں کسہانی آس شنزیں نوبت سرا میلانک اِتنت کہ اسھاک رھمین، میرجان عاجز، مبشر شھدوست ءُ مختار کنر پہ ھاک ءَ نمیران بوتنت۔
ماھو!
تاسپیں ورناھانی، کماش مردانی، تیر دروشتگ ءُ داگ داتگیں جونانی دور دئیگ سال ءِ گُڈ سر ءَ ھم برجاہ اِتنت۔ بلے ابیتکی ءُ دوریانی ماہ دسمبر چو اپریل ءِ وڈ ءَ درستیں ماھاں چہ گیش دردناکیں ماھے اَت دسمبر ءِ زمستان گُشے زَھیرانی تبدیں مُوسمے اَت۔ کیلکور مراد مھمد میتگ ءَ پاکستانی جنگی بالگردانی شیلینگ ءَ چہ چاردہ مردم شھید بوت۔ ھونواریں سال ءَ کینیڈا ءَ بانک کریمہ ءِ وڈیں رھشون ءِ اچ ما جِتا کُت۔
ماھو!
سال گون وتی داتگیں دردانی سوگات ءَ واتر بیت نوکیں سال ءِ گون نوکیں جوزگ ءَ ودی بیت۔ الم اے شپ کپتگیں زندگی ءِ آس شنزیں نوبتانی سال ءُ سیم مٹ بنت۔ سبزیں آزمان ءَ نوکیں واھشت ءُ وابانی اِستال درپشگءَ بنت، گڈا جنوری ءِ ھنی رجیں بام گوں بچکنداں آزاتی ءِ جار ءَ جنت۔ نگیگیں جاورانی گوست ءِ کرم کپتگیں جون ءَ وشیانی کرن یے ودی بیت گلامی ءِ روچ پہ مُدامی اِیر بُکیت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔