کریمہ بلوچ ءِ ناھکیں کوش: بلوچ یکجھتی کمیٹی ءَ ترندیں رنگے ءَ زھرشانیانی جار جتگ

دی بلوچستان پوسٹ

بلوچ یکجھتی کمیٹی ءِ رھشوناں کریمہ بلوچ ءِ کوش ءِ ھلاپ ءَ زھرشانیاں بھر زیروکیں مردمانی بیھار دیگ ءِ سر ءَ ترندیں زھرشانیانی جار جتگ –

اے گپ بلوچ یکجھتی کمیٹی ءِ رھشوناں شال ءِ پریس کلب ءَ پریس کانفرنس کنان ءَ گْوشتگ اَنت –

آیاں گْوشت کہ کریمہ بلوچ ءِ کوش ءِ ھلاپ ءَ سرجمیں ڈیھ ءَ زھرشانی بندات کنگ بیتگ اَنت ءُ بلوچستان ءِ بازیں جاھاں زھرشانیانی دارگ ءِ ھاتر ءَ مردماں ترسینگ ءَ اَنت ھنچش کہ گوادر، پسنی، آواران ءُ شال ءَ ھما مردم کہ زھرشانیاں بھر زیروک بیتگ اَنت آیانی لوگاں بیڑ برگ بیتگ ءُ بیھار دیگ بیتگ اَنت کہ کریمہ بلوچ ءِ کوش ءِ ھلاپ ءَ بیوکیں زھرشانیاں بھر مہ زور اِت، کریمہ بلوچ ءِ بنکی ھنکین ءَ ھم زھرشانی دارگ ءِ جھد بیتگ ءُ جائو ءَ ھم زھرشانی دارگ بیتگ اَنت -ما انسانی ھکانی میان اُستمانی گلاں گوں دزبندی کن ایں کہ آ بلوچستان ءَ آجوئی ءِ درشانی کنگ ءَ بندش اِنت چریشی ءِ سر ءَ گامگیج بہ زور اَنت ءُ بلوچانی سر ءَ بیوکیں زُلمانی داروکی ءَ بہ کن اَنت ءُ اے درچ ءَ ما ترندیں رنگے ءَ زھرشانیانی درچ ءَ بندات کنگ ءَ ایں کہ اشی ءِ بندات آیوکیں سال ءِ دوجنوری دوھزار ءَ بیست ءُ یک ءَ چہ شال ءَ بندات بیت اِنت ءُ اے زھرشانی سرجمیں ڈیھ ءَ کنگ بیت –

بلوچ یکجھتی کمیٹی ءِ رھشوناں گْوشت کہ کریمہ بلوچ ءِ کوش ءِ بارہ ءَ ٹورنٹور پولیس ءَ گیشیں پَٹ ءُ پول نہ کرتگ چُشکہ بنداتی پَٹ ءُ پول ءَ پولیس ءَ اے کیس” نان کرائمنل ” بزانکہ اے وئیل ءَ کسے ءِ دست مان بوگ ءِ شبینگ نیست اَنت ءُ چریشی ءَ پد جون کھول ءَ دیگ نہ بیتگ اُمیت داریں کریمہ بلوچ ءِ گُڈی واب جاہ آئی ءِ بنکی ھنکین ءَ کنگ بیت –