بولان ءَ پوج ءِ سر ءَ اُرشاں پد بازیں کچے ءَ لشکر کشی برجاہ

دی بلوچستان پوسٹ

بازیں ھند ءُ دمگاں چہ گوستگیں روچ ءَ بمبگواریں بالگردانی سر ءَ تیرگواریاں ھوار مارٹر آس دیگ ءَ اِنت –

بلوچستان ءِ دمگ بولان ءَ پاکستانی پوج ءِ سر ءَ دو مزنیں اُرشاں پد پاکستانی پوج ءِ نیمگ ءَ لشکر کشی برجاہ اَنت کہ چریشانی تہ ءَ بمبگواریں بالگرد بھر زورگ ءَ اَنت ءُ اُرشاں پد زمینی لشکر تر ءُ گردانی سوب ءَ جنجالانی دیمپانی اِنت –

دمگی مردمانی رد ءَ بمبگواریں بالگرد جمبرو، تلانگ ءُ کمان ءِ کوھی دمگانی سر ءَ بال اَنت ءُ تیرگواری کنگ ءَ ھم گندگ بیتگ اَنت ھمے وڑ ءَ ھرنائی ءَ پوج ءِ بنجل ءَ پوجی سپاھیاں ھوار بازیں کچے ءَ بمبگواریں بالگرد سر بیتگ اَنت –

اشی ءَ ابید ھم جھالاوان، پنکی، لونی، میژداری ءَ ھوار کش ءُ گوری دمگاں چہ گوستگیں روچاں بازیں جاھاں پوج وھد وھد ءِ سر ءَ مارٹر آس دیگ ءَ اِنت – ءُ زمینی لشکر ءِ تر ءُ گرداں دمگ ءَ جانی ءُ مالی تاوانانی ھال سر نہ بیتگ اَنت –

زانگ بہ بیت گوستگیں ھپتگ ءَ بولان ءِ دمگ جھالاوان ءَ پاکستانی پوج ءِ بنجل ءِ سر ءَ ترندیں اُرش ءَ پد بنجل دستیگ کنگ بیتگ ءُ اُرش ءَ پاکستانی پوج ءَ جانی ءُ مالی تاوانانی دیمپانی کنگ کپتگ –

ھمے رنگ ءَ گوستگیں روچ ءَ جنگ زدگیں دمگ ءَ پوج ءِ گیشیں سپاھی اتکگ اَنت کہ اود ءَ پوج ءِ گاڑی کَل کرتگیں شوروانی گون ءَ نشانگ کنگ بیتگ –

گوستگیں تھ ئِے کارانی وزیر ءُ سینیٹر سرفراز بگٹی اُرشکارانی بگیری ءَ برزی لشکر کشی ءِ پرمان کرتگ – سرفراز بگٹی ءَ دزبندی کرتگ کہ اُرشکار ءُ آیانی کُمکارانی سوھازگی ءَ لشکر کشی کنگ بہ بیت اے درچ ءَ برزی لشکر ءِ کمک زور بہ بیت –

واکدارانی رد ءَ ھردوکیں اُرشاں پاکستانی پوج ءِ سوبیدارے ءَ ھوار نُھ کارندہ بیران وھدےکہ یک کیپٹنے ءُ سوبیدارے ءَ ھوار چارد کارندہ زدگ بیتگ اَنت-

ھردوکیں اُرشانی زمہ واری بلوچستان ءِ آجوئی ءِ لوٹوکیں سلاہ بندیں گل بلوچ لبریشن آرمی ءَ منّ اِتگ اَنت – گل ءِ جار جیئند بلوچ ءَ گوشتگ اَت پوج ءِ یازدہ کارندہ کُشتگ ءُ دومی اُرش ءَ دو کارندہ کُشتگ ءُ کیپٹنے ءَ ھوار ھپت کارندہ زدگ بیتگ اَنت –

جیئند بلوچ ءِ گوشگ اَت کہ اگاں مئے لس مردم ءُ زالبول ءُ چک دشمن ءِ زوراکیاں بلوچستان ءُ درملکاں پھریز نہ اَنت گڑا دشمن ءِ شھری ءُ زالبول ھم پھریز نہ بنت دشمن ھما رنگیں جنگ بلوچانی سر ءَ ایرگیجگ ءَ اِنت ما ھما رنگیں جنگ ءَ دشمن ءِ سرڈگار پنجاب ءَ ھم بندات کنگ ءِ زور ءخ داشت کن ایں –

بلوچستان ءِ دمگاں دو روچانی تہ ءَ اے دومی مزنیں اُرش اِنت چریشی ءَ پیسر پنجگور ءَ بمب تراکے ءَ دو مردم بیران ءُ ھشت زدگ بیتگ اَنت –

پنجگور ءِ بمب اُرش ءِ زمہ واری بلوچ ریپبلکن آرمی ءِ جارکش بیبگر بلوچ ءَ منّ اِتگ اَت –

بیبگر بلوچ ءَ گوشتگ اَت کہ ڈیتھ اسکواڈ ءِ کارندھانی گاڑی بمب تراکے ءِ نشانگ کرتگ ءُ سَے کارندہ کُشتگ ءُ یکے زدگ کرتگ –

ھمے وڑ ءَ کیچ ءِ دمگ مند ءِ کوھی دمگ سھریں کوہ ءَ پاکستانی پوج گوستگیں بازیں روچاں روگ ءَ گندگ بیتگ-

دمگی مردمانی رد ءَ گوستگیں شپ ءَ پاکستانی پوج بیست گاڑی ءَ دَہ پرپٹانی ھمراھی ءَ کوھی دمگانی تہ ءَ روگ ءَ گندگ بیتگ ءُ لاش کشیں گاڑی ھم ھمے دمگ ءَ روگ ءَ گندگ بیتگ انت –

دمگی مردمانی رد ءَ پوج دمگ ءَلشکر کشی کنگ ءَ اِنت ءُ سرکاری بنشونانی نیمگ ءَ تنی وھدی اے وڑیں ھال دیم ءَ نیاتکگ اَنت –