نبشتانک: شکّلیں جنگانی پری زادگ
نبشتہ کار: نور مھمد نور
دی بلوچستان پوسٹ
دو روچ اِنت یک بدیں هالے منی گوشانی آتْراپاں گردان اِنت بلے منی دل اِنت کہ نہ منّ اِیت پہ من اِے باوری گپے نہ اِنت، وتی ءَ سرپداں کہ دیر اِنت وتی اندر ءَ مرتگ آں ، بلے مَرگ پہ ترا اِے وتسریں هالے دْروگیں گپے ، تئی پگر تئی جُهد اَنگت هم زندگ اِنت ءُ زندگ مان اِیت، کُجا تئی کردار ءُ کجا من گوں من چُشیں هچ لبز نیست کہ پہ تو نبشتہ ئی بہ کن آں بلے چُشیں هاٹیگ اوں منی تہ ءَ نیست کہ چُشیں گْرانیں گماں وتی تہ ءَ جاگہ دات بِہ کن آں ءُ چپت بہ باں ھچ مَگشاں، پمیشکہ دو لبز پہ وتی ناتوانی ءَ نبشتہ کنگ ءَ آں ءُ تئی اَکس دیما اِنت بانک! تئی گُڈّی سپر تئی زندگ بوگ ءِ مانزمان اِنت ، اِے ارس ءُ هونانی سپر انگت هما داب ءَ برجاه اِنت-
هما کِشک اَنت مردم مَٹ بیتگ اَنت هما کِسہ اَنت بلے کارست دگر اَنت، مرچی پدا دگہ شورے بنا بیتگ ، پدا آه ءُ زاری اِنت پدا اکس اَنت ءُ مناں ، نہ سگّوکیں درد اَنت اِمبری ترا کَسی اَکس دست ءَ نیست ، تئی اکس اِنت کہ همک پیر ءُ جوان همک بْرات ءُ گُهار ءَ دست ءَ اِنت ءُ تئی لُنٹانی سر ءَ شیرکنیں بچکندے تالان اِنت کہ گْریتگیں چماں توان ءُ تاگتے بکشائیت اِے کشک ءِ مساپرانی راهشونی ءَ کنت تئی توار تئی توار اَنگت هما داب ءَ مُهکم ءُ برجاه اِنت-
بانک! من هردیں لوٹاں کہ ترا بہ جیڑاں گڑا مات جمیلہ ءِ ترانگ ءَ الم کپ آں ءُ همے دمان ءَ بچکنداں کہ “شیر بلوچانی مادریں مات اَنت” کہ وتی سالونکیں بچ ءُ بانوریں جنکاں پہ واهگے رُودین اَنت پہ وتی زمین ءِ پاسداری ءَ کربان کن اَنت ءُ کنداں کندان ءَ آیانی ورنائیں جون ءَ کبرانی میار کن اَنت، پہ ما کبر زیبدار یا گلزمین ءِ آجوئیں دمگ-
تئی چمانی تہ ءِ روکیں آس اِے گْواهی دَنت کہ چنچو هزاب چینچو درد تئی چماں دیستگ اَنت اِے زنده باد ءُ مرده باد ءِ نعرهاں ترا انچوش مهکم کرتگ اَت چو کہ بولان ءِ کلندریں کوه ءَ ات ئےپہ تو سرجمیں بلوچستان ارسیگ اِنت کوه درچک ءُ دار دْراه تئی جتائی ءِ آس بُن اَنت-
وهدے کہ من ترا وتا ءُ وتئی چاگرد ءِ مردماں جیڑاں تہ بژنیگ باں کہ اِے بزگیں راج دو روچ ءَ پد اَچ تو بے هال مہ بیت اسل ءَ راج ءَ میار هم نیست بزگ اِنت شُدیگ اِنت برے برے بے نسیبیں لاپ ءِ گماں چہ همک گم ءَ بے هال بیت.. جنگ ءِ تہ ءَ اِنت در پہ در اِنت همک روچ لاشے سمبهیت همک روچ نوکیں کارستے زُلم زورانی آماچ بیت-
همک روچ آه ءُ پریات اِنت پدا همک روچ یک ساه گِریں بے تواری یے مانشان اِیت. هرکس وتی روکیں دل ءِ لَهڑیں پاهارانی سارت کَنگ ءِ هاترا وتی رنگ ءَ جُهد ءَ اِنت بلے گپے زانئے من اِے رندی نہ لوٹاں کہ پہ ارزانی منی تہ ءِ روکیں آس سارت بہ بیت ، نہ لوٹاں اِے گم چہ کریابیں ڈوبر ءَ اِیر بئیت ءُ پہ مدامی گار بہ بیت من لوٹاں کہ همے روکیں آس همے رنگ ءَ منی دل ءُ جان ءَ ابد بہ مان اِیت-
تو سرپدئے ؟ تئی هم پگریں کُل هما سنگتاں سوگند وارتگ کہ پُشت ءَ چَک جنَگی نہ اِنت، دمبرگی نہ اِنت جنگجاه ءِ بامردانی همے پگر اِنت کہ کریمہ جُهد ءِ نام اِنت جُنزگ ءِ نام اِنت دم نہ برگ ءِ نام اِنت –
من هردیں کہ ترا جیڑاں تَوَنگر باں مُهکم باں پرچا کہ تو بلوچ ءِ گُلزمیں ءِ هما لاڑُکیں کاڑ ءِ تئی چم مدام پہ زمین راج ءُ زبان ءَ هون گْریوگ ءَ اتنت تئی تْراولیں پاد اِے گپ ءِ شاهدی ءَ دَینت کہ تو پہ راستی ءَ چینچو پند بُرّ اِتگ — تئی پگر بلوچستان ءِ همک کوه ءِ دلبند ءَ چو دردے ءَ رُستگ کہ هر بلوچ ءَ مارگی اِنت، دیم ءَ برگی اِنت
شکّلیں جنگانی پری زادگ ! تئ نام راجدپتر ءِ تاکانی سرا گوں هوناں نبشتہ اِنت تئی کِشتگیں درچکاں تاک ءُ بَر جتگ ، تئی دست ءِ بیرک تئی پُشت پداں چِتگ ءُ سرا بستگ پرچا کہ اِے راه ءِ مساپراں برے برے گور ءُ کپن هم نام ءَ نہ بیت-
گُڈ سرا ترا هال دیگ لوٹاں کہ تئی کاروان راهی اِنت هما رنگ ءَ کہ تو واب دیستگ اَت
هما سر ءُ هما سِنگ اِنت جنگ انگت برجاه اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔