نوشکی ءَ گل ءِ اوتاگ ءِ سرا اُرش بے سوب کُتگ – بی ایل ٹی

تجابان ءَ پاکستانی پوج ءِ پانگس ءِ سرا اُرش کُتگ ءُ یک کارمندے کُشتگ ءُ بازینے زدگ کُتگ،سیمکوری ءَ پاکستانی پوج ءَ گل ءِ اوتاگ سرا اُرش بے سوب کُتگ – میران بلوچ

دی بلوچستان پوسٹ

بلوچ آجوئی لوٹوکیں سلاہ بندیں گل بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں درشان ءِ تھا گوشتگ کہ مئے سرمچاراں کیچ ءِ دمگ تجابان ءَ برجاھیں پاکستانی پوج ءِ بنجاھی پانگس ءِ سرا راکٹ ءُ دگے وتکاریں سلاھاں گوں اُرش کُتگ –

جارکش ءَ گوشتگ اُرش ءِ آسر ءَ پاکستانی پوج ءِ یک کارمندے مُرتگ ءُ بازینے زدگ بوتگ –

میران بلوچ ءَ دیمتر ءَ وتی درشان ءِ تھا گوشتگ کہ گوستگیں روچ ءَ یکشمبے ءَ پاکستانی پوج ءَ نوشکی ءُ کلات ءِ میانی دمگ سیمکوری ءَ گل ءِ اوتاگ سرا اُرش کُتگ ءُ مئے سنگتانی انگر کنگے جھد کُتگ، بلے سرمچاراں جوانیں جنگی رپک ءُ تمردی ءَ گوں دژمن پوج ءِ اُرش بے سوب کُرتگ ءُ پدکنزینتگ –

گڈسر ءَ بی ایل ٹی ءِ جارکش ءَ گوشتگ کہ بلوچ سرڈگارے آجوئی ءِ ھاتر ءَ گل ءِ جنگ مدامی برجاہ بیت –