جنرل اسلم ءِ کاروان – اکیل مراد

نبشتانک: جنرل اسلم ءِ کاروان

نبشتہ کار: اکیل مراد

نُھمی بھر

دی بلوچستان پوسٹ

جنرل اسلم ءِ بنکی واھشت جنگ کہ آئی ءَ بندات کرتگ گڑا جنگ چیر جنگی بزانکہ “گوریلا ” جنگ بیتگ آئی ءِ جنگ ءِ تہ ءَ بازیں ھسابے ءَ آئی ءِ جنگ گوریلا جنگے ءِ دروشم ءَ چِست بیتگ کہ آ جنگ ءَ ھدے ءَ تاں چیرجنگی ءَ سان زرتگ-

جنرل ءِ چیرجنگی ءِ سان ءَ بلوچستان ءِ ھمک ورنا وتی نیمگ ءَ کَشان کرتگ ءُ ھمے جنگ ءَ زیر زمین ءِ نیمگ ءَ بران کرتگ اَنت جنگ وتی داباں روان بیت سال دوھزار ءُ دوازدہ ءَ جنرل الجزیرہ چینل ءَ یک تامر بندے ءَ چیر جنگی ءِ کسھاں درشان کنت کہ آئی ءِ بے کچوئیں درور بلوچ جنز ءَ مروچی ھم جنرل ءِ سنگتانی گور ءَ دزکپ اَنت ءُ چریشی ءَ زانگ بیت کہ جنرل ءَ وتی سنگتانی تہ ءَ ھم ھنچیں گوریلا سنچ ودی کرتگ ءُ دشمن ءِ سر ءَ چو بشامی رگام ءَ کپ اَنت ءُ آس گواران اَنت –

جنرل ءِ سنگتے ءَ گپ جت کہ بازیں ھنچیں وھد بیتگ اَنت کہ جنرل ءَ گوں وتی چیر جنگ کنوکیں ھمراھاں دشمن ءِ اُرشکاری کرتگ گڑا برے برے ھنچیں وھد بیتگ اَنت دشمن ءِ زور گیش بیتگ ءُ جنرل گوں سنگتاں دشمن ءِ انگیری ءَ بیتگ، دشمن ءِ انگیر ءِ پروشگ ءَ جنرل ءَ ھنچیں رپک کارمرد کتگ ءُ دشمن ءِ انگیر پُروشتگ ءُ دشمن ھما کچ ءَ بَھ ءُ بکڑ بیتگ کہ اے کجام چیر جنگی ءِ رپک ءَ کارمرد کنگ ءَ اَنت کہ چوشیں سوھو ءُ رپکاریں مردم ءُ کسان ءُ نزوریں تاکتدار ءُ مزنیں کچے ءَ اوشتوکیں سپاھیگانی انگیر ءَ پُروش اَنت ءُ انگت ءَ سوبمندی ءِ نیمگ ءَ رو اَنت-

جنرل ءِ ھواریں سنگت ءَ پد ءَ دیم ءَ گپ جت کہ اے سال دوھزار ءُ یازدہ ءُ دوازدہ ءِ میانی وھد بیتگ گڑا ھمے وھد ءَ دشمن ءَ سوبمندی ءِ گون ءَ وتی چِن ءُ لانچ کرتگ ءُ جنرل ءُ آئی ءِ ھمراھانی سر ءَ بیڑ برگ ءِ جھد کرتگ، ما ھمے وھد ءَ بولان ءِ بنجل ءَ جاڑیگ بیتگ اِیں ھمے روچ ءَ پیسری شپ ءَ جنرل ءَ وتی توپک ءِ دراھیں تیر ساپ ءُ سوھان کرتگ اَنت من پہ وش کندی ھمے گپ جتگ کہ استاد اے تیراں تو ھروچ پہ دشمن ءَ سوھان کنگ ءَ ئے بلے دشمن ءَ تئی تیرانی بوہ گپت ءُ اتک نہ کنت تو چُش کن اے تیراں سوھان مہ کن بلکیں دشمن مہ تچ ایت ءُ تئی تیرانی زد ءَ بئیت گڑا جنرل ءَ یک گرانیں رنگے ءَ پسو داتگ کہ یک گوریلا یے ءَ ھروھد ءَ ساجو بیگی اِنت آ کجام وھد ءَ دشمن ءِ سر ءَ اُرش کُت کنت آ تری شپ بیت یا روچ مئے جنگ چیرجنگی اِنت کجام جاہ ءَ مارا وار رس ایت ھما جاہ ءَ وتی نزوریں تاکت ءَ مزن کن ایں ءُ دشمن ءِ سر ءَ کپ ایں –

دشمن ءِ سر ءَ کپگ ءَ چیر جنگ کنوک ءَ مدام وت ءَ ساجو کنگی اِنت آئی ءِ تہ ءَ ھرچ گر ءُ دار لس مردمی یا دمگی جاورھال درست گوریلا ءَ چارگ ءُ ٹپاسگی اَنت کہ گوریلا مدام کمے مردمانی کچ ءَ مزنیں اُرش کنت –

جنرل ءِ سنچ ءُ زانتانی تہ ءَ یک مزنیں زانتے اے بیتگ کہ اے جنگ مروچی منزل ءَ سر بیت یا باندات بلے اے جنگ ءَ ھروھد ءَ جنزگی اِنت گڑا سوبمندی گوریلا جنگ ءِ بیت اِنت –

چیرجنگی ءِ جھانی نامی ئیں مردم “ڈاکٹر چی ” ءِ کتاب ءِ تہ ءَ تاک دیم ھپت ءَ اولی در ءَ گوریلا جنگ ءِ زور ءِ سر ءَ جوان ءُ مزنیں رنگے ءَ نبشتگ اِنت باتستا ءِ زورآواریں سرکار ءِ سر ءَ کیوبا ءِ مھلوک ءِ سلاہ بندیں سوبمندی ءَ سرجمیں دنیا ءَ یک شریں نامے کَش اِتگ ءُ منّیتگ – اے سوبمندی ءَ لاطینی امریکہ ءِ مھلوک ءِ بارہ ءَ دراھیں گلامی ءِ دود پروشتگ ءُ گوریلا جنگ ءِ زور ءَ زوراکیں سرکار ءِ زیردستی ءِ چُٹگ ءَ مھلوک ءِ زور ءُ تمردی راست گُشتگ –

کیبوبا ءِ سلاہ بندیں آشوب سَے بنکی رھبندانی سر ءَ منّوک بیتگ – اولی مھلوک ءِ تاکت ءُ زور یک سرجمیں لشکرے ءَ چہ چُٹ اِت کنت – دومی آشوبی جاورھالانی واستا ودار کنگ المی نہ اِنت کہ ھنچیں جاور ھال ودی بہ کنت – سیمی لاطینی امریکہ ءِ دور دوریں ھند ءُ دمگاں آشوب ءِ واستا بنگپانی میداناں شور ءُ ڈاھے سرکنگی اِنت –

اولی دوئیں درور اے نام گپتیں سھڑینوکیں آشوبی دوستانی زانت ءَ رد کنت کہ آ ھمے بھانگ ءَ کن اَنت پاد ءَ پاد ءِ پُشت ءَ کن اَنت ءُ گوش اَنت یک سرجمیں لشکرے ءِ دیمپان کنگ نہ بیت ھمے وڑ ءَ اے دوئیں درور اے مردمانی گماناں رد کن اَنت کہ ھما ودار ءَ نند اَنت تھ ئِے ءُ ڈنی وڑ ءُ پیماں آشوب ءِ واستا سرجم ءَ جاروھالانی سازگاری ءِ نیمگ ءَ رو اَنت بلے اے وڑیں جاورھالانی پیداگ کنگ ءَ ھچ نہ کن اَنت گڑا اے درور ھم کیوبا ءَ ابید دراھیں لاطینی امریکہ ءِ بنگپ بنت اے راست اِنت کہ آشوب ءِ واستا جَمبینوکیں توار ءَ گوریلا آؤرت نہ کنت – ھمے واستا اے ھژدری اِنت مھلوک ءِ دل ءُ لاپاں اے گپ پِرینگی اِنت کہ چاگردی ناانساپی ءُ پُرایمنی ءِ دور کنگ ءُ اے ھم جھد کنگی اِنت زوراکیں سرکار ءِ نیمگ ءَ زانت ءُ نازانتی ءِ رنگ ءَ اے پُرکنگ ءُ گوات دیگی اَنت ءُ سرکار ءِ ھلاپ ءَ برانزگرگ ءِ آشوب گڑا ھمے وھد ءَ مھلوک ءِ تواراں گوں جکسیت اِنت –

نِی جنرل ءَ وتی آشوب مھلوک ءِ تہ ءَ زرتگ ءُ کوھی دمگاں داں وھدے ءَ چیر جنگ کرتگ ءُ وتی جنگ داں ھدے ءَ اندری دروشماں کنگ ءَ پد اے جنگ یکبر ءَ دنیا ءِ نگاھاں کم کم ءَ دیم ءَ آیان بیت –

گڑا جنرل ءِ بولان ءِ کرتگیں ھما گپ پد ءَ ھمے جاہ ءِ ڈک ءَ گپت کہ جنگ ءَ ھنچیں دابے ءَ بہ کن کہ داں منزل ءَ اے جنگ جنزان بہ کنت –

جنرل ءِ ھمک سسائیں پگر ءَ زانگ بیت کہ مروچی اگاں کم جنگ بیگ ءَ اِنت باندا اے جنگ دیم ءَ وتی گاماں ترند تر کنت اے جنگ ءَ ھنچیں آشوبی ءِ زلورت اِنت کہ آشوب ءِ نام مھلوک اِنت –

سپر روان اِنت جنرل اسلم ءِ کاروان ءَ دسمبر

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔