ساجد ھسین ءِ بارہ ءَ سویڈن ءِ واکدارانی رپورٹ ءَ سدک نیاں – ساجد ھسین ءِ کھول

دی بلوچستان پوسٹ

بلوچ اھوالکار ساجد ھسین ءِ کھول ءَ چاگردی رسانکجاھاں شنگ کرتگیں وتی بیان ءِ تہ ءَ گْوشتگ کہ ساجد ھسین ءِ بیگواھی ءُ آئی ءِ کوش ءِ بارہ ءَ سویڈن سرکار ءَ کمک نہ کرتگ ءُ بلوچ نودربر رھشون کریمہ بلوچ ءِ وئیل ھم پدردی وئیلے –

زانگ بہ بیت اھوالکار ساجد ھسین بلوچ ھمے سال ءِ دو مارچ ءَ سویڈن ءِ شھر اپسالا ءَ اناگت ءَ بیگواہ بیتگ ءَ چریشی ءَ پد ساجد ھسین ءِ بیگواھی ءِ سر ءَ ٹک ءُ آئی ءِ سنگتاں ساجد ءِ بیگواھی ءِ ھال سویڈن سرکار ءِ گور ءَ نبشتہ کنائینتگ ءُ پد ءَ دو ماہ ءَ پد اپسلا ءِ نزیک ءَ یک کورے ءَ ساجد ھسین ءِ جون سویڈن ءِ واکداراں دزکپتگ –

ساجد ھسین ءِ کھول ءَ گوشت کہ بنداتی ءَ من ءَ ھچ رنگ ءَ اوست نہ بیتگ کہ ساجد ھسین ءِ مرگ وتکشی یا کزا ئِے ءَ بیتگ ءُ من سویڈن ءِ سرکار ءَ گوں دزبندی کرتگ ءُ گیشتریں راستیاں من ءَ بہ دے اِت۔

من ءَ سویڈن پولیس ءِ گور ءَ ھرچی دزکپتگ آیانی سر ءَ من یکیم نہ آں ءُ آیانی پَٹ ءُ پول ءَ سرجم نہ آں ءُ سویڈن ءِ سرکار گیش پَٹ ءُ پول بہ کنت –

آئی ءَ گْوشت کہ ھمے وڑ کریمہ بلوچ ھمے رنگ ءَ بے ساھیں کُنٹے دروشم ءَ دزکپتگ ھمے رنگ ءَ منی لوگ واجہ ھم دزکپتگ چہ ایشی ءَ زانگ بیت کجام ھم یک جرمے ءَ منّانکاں ابید کشگ نہ بیت اِنت –

شھناز ساجد ءَ دیمتر ءَ گْوشت کہ بانک کریمہ بلوچ ءِ شھیدی ءَ ھمل ھیدر ءُ آئی ءِ کھول گماں پدردی درشان کن آں ءُ سودمانیں دردے –

زانگ بہ بیت بلوچ اھوالکار ءُ بلوچستان ٹائمز تندجاہ ءِ سرشونگار ساجد ھسین ءِ جون اپسالا ءِ شھر ءَ یک کورے ءَ دزکپتگ ءُ آ دوماہ ءَ بیگواہ بیتگ، بلوچانی نیمگ ءَ ھردوکیں وئیلاں ترسی درشماں گمان کنگ ءَ اَنت –

ساجد ھسین ءِ وئیل ءِ سر ءَ ہیومن رائٹس کونسل آف بلوچستان (ایچ آر سی بی) ءَ وتی شنگ کرتگیان بیان ءِ تہ ءَ گْوشتگ ” ساجد ھسین سویڈن ءِ بنجاھی شھر اسٹاک ھوم ءَ جھمنند بیتگ ءُ آ وتی وانگ ءُ کار ءِ ھاتر ءَ دو مارچ ءَ اپسالا ءِ شھر ءَ شتگ – اپسالا ءَ سر بیگ ءَ پد آ روچ ءِ ساھت دو ءَ وتی سیاد ءُ سنگتانی گون ءَ رھوت ءَ بیتگ چریشی ءَ پد آئی ءِ رھوت بند بیتگ –

ساھد ھسین بلوچ ءَ پاکستانی نامی ئیں تندجاھاں کار کرتگ، وتی ساہ ءِ ترس ءِ سوب ءَ دوھزار ءَ ھبدہ ءَ سویڈن ءَ میاربندی ءَ شتگ ءُ اود ءَ آ یک میاربندی زندگی ءِ گوازینگ ءَ بیتگ –