کریمہ بلوچ ءِ بیرانی ءَ راجداری پاٹیاں چِل روچ ءِ پرس دارگ ءِ جار جتگ

کریمہ بلوچ ءِ بیرانی ءَ سرجمیں بلوچستان پرسیگ ءُ چاگردی رسانکجاھاں بلوچ مھلوک ءَ ھوار جتا جتائیں ڈیھاں بندوکیں مردم پدردی درشان کنگ ءَ اَنت –

دی بلوچستان پوسٹ

کریمہ بلوچ وانندہ گل آزاد ءِ گوستگیں چیرپرسن ءُ بلوچ نیشنل مومنٹ ءِ باسک بیتگ ءُ گوستگیں یکشمبے ءَ بیگواھی ءَ پد دوشیگیں شپ ءَ آئی ءِ جون کینیڈا ءِ شھر ٹورنٹو ءَ دزکپتگ –

کریمہ بلوچ ءِ بیرانی ءَ بلوچستان ءَ بندوکیں جتا جتائیں پاٹیاں آئی ءِ بیرانی ءَ پدردی درشان اِتگ ءُ چِل روچ ءَ پرس دارگ ءِ جار جتگ –

بلوچستان ءِ آجوئی ءِ واستا راجداری جد ءُ جھد کنوکیں گل بلوچ نیشنل مومنٹ ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ کینیڈا ءَ درانڈیھی زند گوازینوکیں بی این ایم ءِ رھشون ءُ بی ایس او آزاد ءِ گوستگیں چیئرپرسن بانک کریمہ بلوچ ءِ شھیدی بلوچ راج ءُ راجی جنز ءِ واستا ءَ مزنیں تاوانے ءُ بانک کریمہ ءِ مرگ ءَ ما یک شریں ءُ زانتکاریں رھشون ءُ راجی چیدگے ءَ زبھر بیتگیں ءُ اے جوانیں سر ءِ کمی ءَ کرناں پرکُرت نہ کن ایں –

جارکش ءَ گوشت کہ بانک کریمہ بلوچ یک روچے ءَ بیگواہ بیگ ءَ پد مروچی آئی ءِ جون کینیڈا ٹورنٹو ءِ پولیس ءَ دزکپتگ ءُ بلوچ نیشنل مومنٹ وتی رھشون ءُ بی ایس او آزاد ءِ گوستگیں چیئرپرسن ءُ راجی رھشون بانک کریمہ بلوچ ءِ اناگتی مرگ ءَ چِل روچ ءَ پرس ءِ پتر داریت ءُ دراھیں ھنکیناں اے کڈنی ءَ کنت داں چِل روچ ءَ دراھیں پرکاریاں یلہ بہ کن اَنت پرس بہ دار اَنت –

جارکش ءَ گْوشت کہ کریمہ بلوچ نا ایوک ءَ پاٹی ءِ رھشون ءُ بی ایس او ءِ گوستگیں چیئرپرسن بیتگ بلکیں بلوچ وانندہ گل ءِ راجدپتر ءَ اولی زالبول چیئرپرسن بیتگ ءُ آئی ءَ ھما وھد ءَ بی ایس او ءِ کمان داشتگ وھدیکہ پاکستانی زوراکی گیش بیان بیتگ اَنت – گل ءِ وائس چیئرمین، چیئرمین، انفارمیشن سیکریٹری ءُ بنجاھی پتر ءِ دگہ باسک مھتریانی دست ءَ بیگواہ کنگ بیتگ اَنت – بلے بلوچ ءِ شیرزالیں رھشون ءَ جوانیں گامگیجانی زورگ ءَ گل دیم ءَ بران کرتگ ءُ بلوچ راجی جنز ءَ زالبولانی ھوار گیجگ ءَ مزنیں کرد آئی ءَ پیلو کرتگ –

ھمے وڑ ءَ بی ایس او آزاد ءَ وتی درشان ءِ تہ ءَ ھم چِل روچ ءَ پرس دارگ ءِ جار جتگ ءُ گْوشتگ گوستگیں چیئرپرسن کریمہ ٹورنٹو کینیڈا ءَ کُشگ میان اُستمانی ادارھانی دیم ءَ شھماتے-

آئی ءَ گْوشت کہ بلوچستان ءَ ریاست ءِ زوراکیاں درانڈیھی ءِ زند ءِ گوازینگ ءَ لاچاریں بلوچ سیاسی باسک یورپ ءَ ھوار کجا ھم ڈیھہ ءَمھکم نہ اَنت ءُ انسانیت ءُ انسانی ھکانی ٹاہ دیوکیں ادارہ بلوچ باسکانی کُشت ءُ کوش ءِ بگیری ءَ بے تواری ءُ چمبستگی ءِ مزنیں ادارھانی کار ءُ کسب ءِ سر ءَ ابکھی یے –

جارکش ءَ گوشت شھید بانک کریمہ بلوچ دوھزار ءُ پانزدہ ءَ گل ءِ سروک نامینگ بیتگ ءُ گل ءِ شور ءُ سِلاہ ءَ پد بلوچستان ءَ ریاستی زُلم ءُ زوراکیاں میان اُستمانی ادارھاں سرکنگ ءَ کینیڈا ءَ درانڈیھی ءَ شتگ، شھید چیئرپرسن کریمہ بلوچ ءَ بلوچستان ءَ برجاھیں ریاستی زُلم ءُ زوراکی میان اُستمان ءُ دگہ ادارھانی گور ءَ جوانیں کرد پیلو کنگ ءَ بیتگ –

جارکش ءَ گوشت کہ بانک کریمہ بے بھائیں جد ءُ جھد ءِ برکت ءَ گل مروچی مھکم ءُ مھکمیں جاھے ءَ اوشتیت ءُ بلوچ راجی جد ءُ جھد ءِ رھشونی ءَ کنگ ءَ اِنت –

ھمے وڑ ءَ بلوچ اسٹوڈنس ایکشن کمیٹی ءِ بنجاھی جارکش ءَ وتی شنگ کرتگیں درشان ءِ تہ ءَ بانک کریمہ بلوچ ءِ بلوچ نودربر راجداری ءَ آئی ءِ دیمونی ءُ بلوچ زالبولانی واستا جد ءُ جھد ءَ چیدگ بیگ ءَ ستاشانی پیش کرتگ ءُ گوشتگ کہ مروچی سرجمیں روچ پرسیگ اِنت ءُ بلوچ راج یک زانتکار ءُ نہ ترسیں سیاسی رھشونے ءَ زبھر بیتگ –

آئی ءَ گْوشت کہ بانک کریمہ بلوچ ءِ شیرزالی ءُ نہ ترسیں کردانی تیز کنان ءَ بلوچ نودربر گل ھما وھد ءَ آئی ءَ رکینتگ کہ بلوچستان ءِ ھمک نیمگ ءَ بلوچ نودربر رھشون ءُ باسکانی زُلم ءُ زوراکی سر ءَ مِک بیتگ اَنت –

ھمے وڑ ءَ نیشنل ڈیموکریٹک پاٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ سیاسی باسک بانک کریمہ ءِ شھیدی پہ بلوچ راج ءَ مزنیں تاوان ءُ نااوپاری یے –

بانک کریمہ بلوچ ساہ ءِ رکینگ ءَ بلوچستان ءَ درکپتگ ءُ کینیڈا ءَ شتگ بلے اود ءَ ھم آئی ءِ ساہ رکینگ نہ بیتگ –

درشان ءِ تہ ءَ گوشگ بیتگ کہ این ڈی پی سدکی ءَ ایشی ءَ گْوش ایت کہ بانک کریمہ ءِ شھیدی یک پندلے ءِ رنگ ءَ کنگ بیتگ شھیدی ءِ یک روچے ءَ پیسر بیگواہ بیگ اے گپ ءِ منانک ءَ دنت کہ آ کینیڈا ءَ ھماھانی مردماں آوار جتگ کہ ھمایانی سوب ءَ آئی ءَ بلوچستان یلہ کرتگ ءُ کینیڈا ءَ شتگ –

زانگ بہ بیت کریمہ بلوچ یکشمبے ءَ کینیڈا ءِ شھر ٹورنٹو ءَ بیگواہ بیتگ ءُ گوستگیں شپ ءَ آئی ءِ جون پولیس ءَ دزکپتگ ءُ کھول ءِ گور ءَ پجار کنگ ءَ پد آئی ءِ بیرانی ءِ ھال چاگردی رسانکجاھاں شنگ کنگ بیتگ ءُ نیم ادارے تہ ءَ چاگردی رسانکجاہ ٹوئیٹر ءَ اے گپ جھان ءَ برزتر بیتگ ءُ مروچی ھم انگت ءَ ھما ھساب ءَ آئی ءِ بیرانی ءِ سر ءَ زھردرشان بیگ ءُ کشندھانی پٹ ءُ پول کنگ ءِ لوٹ بیگ ءَ اِنت –