نبشتانک: جنرل اسلم ءِ کاروان
نبشتہ کار: اکیل مراد
اولی بھر
دی بلوچستان پوسٹ
بلوچستان ءَ زندگی کنگ گران اِنت یا جنگ کنگ ؟ اے دوئیں جُست من ءَ مدام یک راھے ءِ شون ءَ دے اَنت ، ھمے جستانی پد ءَ من مدام کِسھانی شوھاز ءَ درکپ آں اے ھم نزاناں کِسہ چی اَنت چون بیاراں اِش چتور بہ گوشاں اِش ، بلے جھد مدام ھمیش اِنت کسہ ءَ تچک بہ گوش آں ساپیں رنگے ءَ کسہ ءَ بہ گوش آں ۔
” افتادگان خاک ” ءِ تاک دیمانی تہ ءَ یک تاک دیمے ءَ “فرانز فینن “نبشتگ کنت “جنرل ڈیگال زرد رنگیں مردمانی کار ءُ کارپداں کار بند ایت، ءُ فرنیکوامارپاک گوش ایت اے سیہ رنگانی مُچی ءُ زردگی مھلوک اِنت، دمگی جھمنند ایشی ءَ درست زان اَنت ءُ کجا ھم دومی مردمانی گپ ءُ ٹال دابوانی نزیکی ءَ کن اَنت آ دل ءِ تہ ءَ ھم کند ایت ھمے واستا آ زانت کہ من دابوے نیاں ۔ آ ھمے ساھت اِنت کہ چریشی ءِ سر ءَ مردم مردمے ءِ رنگ ءَ جوڑ بیت آ وتی سلاھاں تیز کنت ءُ آ سوبمند بیت ۔ ھَنچُشکہ بنکی نندوکیں مردم وتی برانز ءَ چِست کن اَنت ءُ نوک آبادکاریں مردمانی واستا تُرس شانان بنت آیاں ساپ دلیں مردمانی میار کن اَنت چُشکہ دودمانی سریچی ءُ روجھلی ءِ واھندی ءِ مال ءُ مڈی ءِ شری ءِ نیمگ ءَ آیانی دلگوش ءَ ترین اَنت ھمینکس بر ءَ روجھلی ءِ اگدو ءِ دست ءَ دے اَنت ھمینکس بر دمگی مردمانی رویش گیش ترند بیان بنت ۔ آیانی رگ ءُ پوست ھنچُش ڈَڈ ءُ تُرند بنت پروش ءِ آبادکارانی زمانگ ءَ دمگی مردم آیانی ھوش ءُ شیواری ءَ یلہ دے اَنت آیاں ترندیں واکداری ءِ پیشو کن اَنت آیاں پشت ماں پُشت ءَ گوش بیت ، اے نوک آبادکاری ءِ ھلاس کنگ واتری ءِ روگ نہ اِنت البت آیاں اے پتر ءِ اگدو ءِ سر ءَ بیسہ کنگی اِنت ۔
نوک آبادکاری ءِ ھلاپ ءَ دنیا ءِ کجام کنڈ ءَ زیردستیں راجانی توار الم برز بیتگ اَنت آیانی زورمندی ءِ یکجاھی الم یک روچے ءَ وتی سوبمندی ءِ گاماں بیتگ اَنت ۔
جنرل اسلم ءِ بامردی ءِ کسہ اگاں مروچی بلوچستان ءِ کوہ کوہ ءَ شاھیگان اَنت ءُ مروچی ھمائی ءِ جوان ءُ سوھیں پگر ءَ بلوچستان ءِ گدان گدان ءَ یک نا یک بچے ودینتگ گڑا آئی ءِ جند کَے بیتگ جھل ءِ داتگیں چندیں دانکانی تہ ءَ نبشتگیں گپ اَنت گوستگیں سال ءَ بلوچستان ءِ نامی ئیں ھالرسان تندجاہ “(دی بلوچستان پوسٹ) ءِ گچینی ءَ شنگ بیتگ اِت اَنت -”سال نوزدہ سد ءُ ھپتاد ءُ پنچ ءَ شال ءِ دمگ ٹین ٹاؤن ءَ ھاجی گیبی دگ ءَ رھیم داد دھوار ءِ لوگ ءَ چم پچ کنوکیں اسلم بلوچ ءِ بنداتی وانگ ،،اسپیشل مزن دربرجاہ،، شال ءَ بیتگ ،آ سرجمی ءَ بلوچستان ءِ آجوئی ءِ جنز ءَ سال نوزدہ سد ءُ نَود ءُ چار ءَ ھمگرنچ بیتگ ،وھدیکہ نمیرانیں سردار ھیر بکش مری درانڈیھی ءَ ھلاس کنت ءُ واتر بلوچستان ءِ شھر شال ءَ جھمنندی بیت گڑا اود ءَ ،،ھک توار ءِ نام ءَ،، زانتی دیوانے(اسٹڈی سرکلے) ” ءِ بندات کنت، اے زانتی دیوان( اسٹڈی سرکل) ءَ گیشتر چاگرد ءُ راجداری ءِ بارو ءَ گپ ءُ تران بیت، ورنایانی گیشتر دلگوش گوں جوان ءُ سوھیں سوجاں بیت، اسلم بلوچ ھم ھما ورنایاں چَہ یکے بیت کہ اے پیر مردیں “مارکسٹ ” سوھیں بلوچ سردار ءِ گوشدارگ ءَ کیت چِد ءَ چَہ آئی ءَ جیڑ اِتگ کہ من ءَ چے کنگی اِنت ءُ زانتی دیوانانی بھر زورگ ءَ پد اسلم بلوچ سرجم ءَ نوزدہ سد ءُ نود ءُ چار ءَ لھتیں سنگتانی ھمراھی ءَ بلوچ لبریشن آرمی ءِ بنھِشت ءَ ایر کنت ءُ آئی ءَ سرجمیں بلوچستان ءِ میتگ میتگ ءَ شنگ ءُ تالان کنگ ءِ ڈُبہ ءَ وتی کوپگاں زور اِیت ، پنچ سال ءِ چیر جنگی ءَ زمین پوش بیگ ءَ پد بلوچ لبریشن آرمی ءِ بُن روتگانی جنگ ءَ پد سال دو ھزار ءَ بلوچ، بی ایِل اے ءِ نام ءَ سرجم ءَ سلاہ بندیں جد ءُ جھد ءَ بندات کنت کہ روچ ء مروچی ءَ روان اِنت، اسلم بلوچ بنداتی ءَ بلوچ لبریشن آرمی ءِ مستریں اوتاک ءِ نام ءَ زانکویں بنجل بولان ءِ بنجل ءِ کماندار جوڑ بیت ، چریشی ءَ پد آ بی اِیل اے ءِ جنگی راہ ءُ رِپکاں زانوگری ءِ نام ءَ زانگ بیت، راست ءُ اشکرتگیں گپانی تہ ءَ بیست ءُ پنچ تاکشان دوھزار ءُ ھژدہ ءَ یک وتکُش تراکے ءَ پنچ ھمراھانی ھمراھی ءَ بیران بیگ ءَ یک سالے ءُ شش ماہ ءَ پیسر سال دوھزار ءُ ھبدہ ءَ بلوچ لبریشن آرمی ءِ سرکماش، یا کماندار جوڑ بیت ”-
جنرل اسلم بلوچ ءِ کرد ءُ سسّا ءَ چہ ھمے زانگ بیت آ یک پوھتہ ئیں پگرے ءِ ھواری ءَ بلوچستان ءِ آجوئی ءِ جنگی پگر ءَ ھوار بیتگ کہ آجوئی ءِ پگر چہ بابا نواب ھیربکش مری ءِ دیوانانی تہ ءَ زرتگیں سکیناں زرتگ –
روان اِنت سپر ماں جنرل اسلم ءِ کاروان ءَ
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔