بلوچستان ءِ نامی ئیں گشندہ منھاج مختار ءِ پیتبند زرمبش زیمر ءِ نیمگ ءَ شنگ بیگی اِنت

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ بلوچی زبان ءِ وشتواریں گشندہ منھاج مختار ءِ پیتبند مسکیں ھاک پانزدہ دسمبر ءَ شنگ کنگ بیگ ءَ اِنت –

اے پیتبند ءَ منھاج مختار ءَ خالق ارمان ءُ ایس میر ءِ نبشتگیں کرتگین لچہ گْوشتگ اَنت ءُ جوانیں زیمری ازم کاربندگ بیتگ –

زرمبش زیمر ءِ نیمگ ءَ شنگ بیتگیں ھالانی رد ءَ گوشگ بیتگ کہ اے پیتبند پانزدہ دسمبر ءَ زرمبش یوٹوب چینل ءَ شنگ کنگ بیت اِنت –

شنگ بیتگیں جار ءَ گوشگ بیتگ کہ اے پیتبند ءَ تامری ازمکاری غفور گمگین ءُ یاسر بلوچ ءَ کرتگ اَنت ءُ اے تامر ءِ تہ ءَ گوادر ءِ جاورھال ءُ بلوچانی سر ءَ ناگیگیں سیاسی ءُ چاگردی جیڑھانی پدر کنگ ءِ ازم درانگازگ بیتگ اَنت –

زانگ بہ بیت منھاج مختار بلوچی زبان ءِ مزن نامیں گشندھانی لڑ ءَ ھوار اِنت ءُ آئی ءِ سوت بلوچستان ءَ گیش گوشدارگ بنت –

لس مردمانی درنگازی ھمیش اِنت کہ منھاج مختار ءِ سوتاں تاھیری ءَ ابید زیردستی ءِ بگیری ءَ سکین ءُ بلوچستان ءِ سر ءَ کپتگیں جیڑھانی سکین ءِ پدراھی ءَ کنگ ءَ اَنت –

زرمبش زیمر ءِ نیمگ ءَ گوشگ بیتگ کہ اے زرمبش ءِ تہ ءَ بازیں کساسے ءَ اے سال ءَ جتا جتائیں گشندھانی گوشتگیں سوت شنگ کنگ بیتگ اَنت ءُ بازیں وھدے ءَ پد منھاج مختار ءِ پیتبند پد ءَ زرمبش زیمر ءِ نیمگ ءَ شنگ کنگ بیگ ءَ اِنت –

زرمبش زیمر ءَ وتی جار ءِ تہ ءَ گْوشتگ کہ پانزدہ دسمبر ءَ اے سوت زرمبش یوٹوب چینل ءَ شنگ کنگ بیت اِنت ءُ دراھیں گوشداروک اے سوت ءَ گوش بہ دار اَنت ءُ مئے جوڑ کرتگیں چینل ءَ الم سب اسکرائب بہ کن اَنت ءُ اشی ءِ ڈانلوڈ کنگ ءُ دگہ تندجاھاں شنگ کنگ ءِ بندش جنگ بیتگ ءُ داں زرمبش زیمر ءِ نیمگ ءَ وت شنگ کنگ بیت اِنت –