نبشتانک: بلوچی تامر بلوچ آباد ریویو
نبشتہ کار: بکتیار رھیم بلوچ
دی بلوچستان پوسٹ
بلوچ آباد ءُ رسول آباد دو میتگ ات انت۔دیم پہ دیم ات انت ۔بلے اد ءَ مردمانی زندگی ءُ زند ءِ گْوازینگ ءِ دود ءُ ربیدگ یکے دومی ءَ جتا جتا ات انت
بلوچ آباد ءِ مردماں مدام رسول آباد ءِ مردمان ءَ همے بھتام جت انت ءُ گْوشت اش اے رسول آباد ءِ مردم بے گیرت انت وتی جنکانی کٹ اتگیں مالان ور انت۔بلے
رسول آباد ءِ مردمان بلوچ آباد ءِ مردمانی اے بھتام هچ بر نہ من ات انت پہ همے گپ ءِ سر ءَ باز رند ءَ بلوچ آباد ءِ ءُ رسول آباد ءِ مردمانی وت مں وت جنگ ءُ کوش هم بوت ۔
رسول آباد ءِ مردم وتی جنکانی وانگ ءَ سک
وش ات انت۔ هر وھد ءَ آھاں دل بڈی دئیگ ءَ ات انت آھانی پگر همیش ات کہ مئے پسّگ بوان انت دیما برو انت گوں ایدگہ راجاں هم کوپگ بہ بنت ۔
بلوچ آباد ءِ مردماں همے گوْشت کہ رسول آباد ءَ گیرت ھلاس انت اود ءَ جنک ءُ بچک ھم کوپگ انت ۔بچک ءُ جنک بزان ھور ءَ نند انت ھور ءَ وان انت
بلوچ آباد میتگ ءِ میر ءُ کماش تاج مھمد ات ۔ آئی ءِ جنک جان بی بی یکّیں چک ات ئِے آ یک وانندگیں جنکے ات ریڈیو پروگرام ءَ کار ھم کنگ ءَ ات ۔
میر تاج مھمد وتی جنک ءِ ریڈیو ءَ کار کنگ ءَ وش نہ ات هر وھد ءَ گون وتی جنک جان بی بی ءَ گوشت ئِے تو من ءَ دگنیا ءِ تہ ءَ بنّام کنگ ءَ ئے ۔
برے برے گون وتی جنک ءَ جان بی بی ءَ همے گوشت ئِے تو سهی ئے ملنگ ءِ جنک سالے پیسر چہ لوگ ءَ تتکگ ءُ سور کتگ ئِے
من ھم ترس ءِ آماچ آں تو ھم همے پیم کن ئے من ءَ دگنیا ءَ بنام ءُ کم شرپ کن ئے ۔چہ اے گپاں پَد میر تاج مھمد وتی جنک ءَ گؤش ایت من ترا ریڈیو ءَ کار ءَ نئیل آں اگاں رو ئے من ءَ بہ کش منی کنٹ ءَ سر گوز بہ کن برو
بلے جان بی بی وتی پت ءِ ھبراں گوش نہ دار ایت ریڈیو ءَ پروگرام ءَ روت ۔
جان بی بی ریڈیو سر ھال ءَ اے ھم گوش ایت اے زند سک وش انت اد ءَ ھر مردم ءَ ھق ھست آ وتی زند ءَ وتی تب ءَ بگْوازین ایت
بلوچ آباد ءَ نشہ ھم ھست اَت ۔ادب ءُ اکلاک ءِ ھم کمی ات
بلوچ آباد ءِ یکیں جنک جان بی بی برے برے همے راہ ءَ ریڈیو پروگرام ءَ شت بزان راہ آ بے ادبیں مردماں کلاگ بست کم شرپ کت ۔
جان بی بی آھاں بد رد کت ۔
جان بی بی همے وئیل ءَ ھم سک دل پدرد ات ۔بلوچ آباد ءِ نوجوان هر وھد ءَ دمک ءَ نشتگ اَت انت هر کس ئِے راہ ءَ گوْست آئی ءَ را کلاگ بست کم شرپ ءُ بے ازت کت ۔
ھلک ءِ کماش بزان میر تاج مھمد وتارا چہ بُن پیرک ءَ بلوچ آباد ءِ کماش منّ ایت ۔وتی ھلک ءِ مردمانی سر ءَ آئی ءِ باور ھم سک گیش ات۔
ھلک ءِ مردم ہر وھد ءَ کماش تاجل ءَ شرپ ءُ ازت دئیگ ءَ ات انت ۔
کماش ءِ ھر گپ ءُ ھبر ھم زرت اش ۔
بلوچ آباد ءِ میاں استمانی سر ءَ کار کنوک هدا بکش سناٹا ات ۔
هدا بکش سناٹا چہ کماش تاج مھمد ءَ دل پْروش ات ۔آئی ءِ ھلک ءِ کماش تاجل ءِ مدام همے گْوشت تو ھلک ءِ وانگ جاہ ءِ زر ءُ پنڈاں ور ئے پہ همے گپ ءِ سر ءَ ھدا بکش سناٹا ءُ کماش تاج مھمد ھر وھد ءَ دپ نُک/ سرو پنڈال ات انت ۔
میر تاجل ءَ ھدا بکش ءَ همے شگان هم جت کہ تئی پیرک ءَ نندگ ءَ جاگہ نہ بوتگ منی پیرگ ءَ جاگہ داتگ تو نی اتکگ ئے منی گون ءَ دپ جاکی کن ئے پہ اے گپان میر تاجل ءَ بازیں رند ءَ ھدا بکش سناٹا ءَ کشگ ءِ ھم بیھار دات۔
میر تاج مھمد ءِ وتی جند ءِ یکیں جنک بزان جان بی بی مدام ھلک ءِ میاں استمانی سر ءَ کار کنگ ءَ گوں سناٹا ءَ ھم کوپگ ءُ ھم گْرنچ ات ۔
جان بی بی ھدا بکش ءَ اے هم گوش ایت کہ من زان آں بلوچ آباد ءِ وڑیں ناسر پدیں میتگ ءَ جنین آدم اُستمانی ھلاپ بنت کار کنگ سک گْران انت ۔
جان بی بی ریڈیو ءَ یک پروگرامے ءَ جنینانی مرگ ءِ کچ ءُ ھساب گرگ ءَ بازین نادْراہ جاهاں جست ءُ پرس کت داکتراں همے گْوشت کہ جنین گیشتر چک ءُ مات بئیگ ءِ وھد ءَ مرگ ءَ انت ۔
گیشتری مرگ ءِ سوب بزان کسان سالی ئیں سور پدر بیت ۔چک ءُ مات بئیگ ءِ وھد ءَ مرتگیں جنینانی گیشترین کچ بلوچ آبادئیگ انت پرچہ کہ اود ءَ جنین چکاناں کسان سالی ءَ سور دئے انت ۔
بلوچ آباد ءِ چاگرد ءَ آ شرپ بچکیں چُک ءَ رسگ ءَ ات آ جنک ءَ رسگ ءَ نہ ات ۔آ گچینیں ورگ بچکیں چکان ءَ دئیگ بئیگ ءَ ات انت چاگرد ءِ تہ ءَ جنینانی مرگ ءِ گیشتریں یک سوبے کم ورگی ھم هست ات
ھدا بکش ءِ میاں استمانی سر ءِ گپ ءُ تران کنگ ءِ سوب ءَ تاج مھمد چاگرد ءِ دراهیں چست ءُ ایرانی زمہ وار من ایت ۔
ھدا بکش سناٹا چہ اے گپ ءَ بْرانز گیپت تاج مھمد ءَ همے پّسو ءَ دات کہ دگنیا آزمان ءَ سر انت بلے مئے چاگرد ءُ مئے میتگ ءِ مھلوک انگت پہ دود ءُ ربیدگ ءِ بند ءَ ھلاس نہ بنت پمیشکہ ما چہ ایدگہ راجاں پشت کپتگ ایں۔
ھدا بکش جان بی بی ءَ اے گوش ایت من انگت ءَ وانگ ءُ وانگ جاہ ءِ ھبراں کنگ ءَ آں مئے میتگ ءِ مردم منی کوش ءِ رند ءَ انت من اگاں اے چاگرد ءِ تہ ءَ جنینانی آزادتی ءِ ءُ کم سوری ءِ ھبر ءَ بہ کن آں من زان آں من ءَ مھلوک
کشگ ءَ پشت نہ گیج ایت ۔بزاں بلوچ آباد ءِ ناسرپدیں مردم ھرچ ھبر ءِ اوپار ءَ برت کت کن انت جنینانی آزاتی ءِ اوپار ءَ برت نہ کن انت ۔
بلوچ آباد ءِ دود ءُ ربیدگ ءَ زمہ واری جنینانی سر ءَ ات مردان ءَ گیشتر گوں دود ءُ ربیدگ ءَ کار نیست ات ۔
برے برے ھلک ءِ میاں استمانی باوست ءَ پاد اتکگیں ھدا بکش وتی کار ءَ دل پروش بئیگ دست کشگ ءِ کوششت کت ۔همے ھبرانی سر ءَ جان بی بی آئی ءِ سر ءَ بْرانز گیپت ءُ همے شگان جت کہ پہ چشین نیکین کار ءِ واست ءَ تئی وڑیں لگوریں مرد ھچ کت نہ کنت ۔
تو چہ هما مردماں ھچ گهتر نہ ئے آ بیست ءُ یکومی کَرن ءَ دود ءُ ربیدگ ءِ واست ءَ مرتگ انت ۔
جان بی بی اگاں ریڈیو پروگرام ءَ چہ پد لوگ ءَ اتک بزان آئی ءِ پت ءِ نرونڈ ءُ کپ ات همے گوشت ئِے تو منی ازت ھراب کتگ منی ازت ءِ ترا ھچ ھیال نیست انت ۔
من ءَ میتگ ءِ مردم شگان جنَگ ءَ انت کہ گوں میر تاجل ءَ آئی جنک دارگ نہ بیت ۔
اے ھم گوشت ئِے منی زندگی ءِ مستریں ردی همیش انت کہ من ترا پہ کراچی ءَ بْرات ءِ لوگ ءَ راہ دات ۔منی کم اگلین برات ءَ ترا وانگ جاه ءَ دات ۔ نی تو منی ازت ءِ ھچ ھیال داری ءَ نزانگ ءَ ئے ۔
بلوچ آباد ءِ میتگ ءَ مرد ءُ جنینانی جیڑہ پیدا بوت ھدا بکش سناٹا مردان ءَ بَد رد کت
بلے مردمان همے گپ ءِ سر ءَ ھدا بکش بد ءُ رد کت همے گپ ءِ سر ءَ سبزل نامیں مردے گوں ھدا بکش ءَ جنگ بوت ھدا بکش جنَگ ءُ کم شرپ کنگ بوت ۔ ھدا بکش ءَ هر کس ءَ گوشت مئے لوگ ءِ جیڑہ انت بلے ھدا بکش همے گؤشت اے لوگ ءِ جیڑہ نہ انت بلکہ چاگرد ءِ جیڑہ انت ۔
ھدا بکش ءُ سبزل ءِ جیڑہ میر تاج مھمد ءِ کر ءَ برگ بوت بلے میر تاج مھمد ءَ سبزل ءِ لوگ ءِ جیڑہ ءَ ھدا بکش ءَ گوں دست مان کنگ ءَ کم شرپ ءُ کم ازت کنگ بوت ۔
میر تاج مھمد ءَ پہ اے جیڑہ پیداگ کنگ ءَ ھدا بکش ءَ یک برے پد ءَ همے سکین دات کہ وت ءَ را شر بہ کن اے جنینانی ھق ءُ وانگ جاہ ءِ پچ بئیگ اے دراهین گپ بے سریں گپ انت۔ایشانی رند ءَ مہ کپ ۔
چہ اے کاراں دست نہ کشگ ءَ میر تاجل ءَ یک برے پد ءَ ھم کوش ءِ بیھار دات
ھدا بکش میر تاجل ءَ همے گُش ایت منی ھیال ءَ تو منی کشگ ءِ گپ ءَ جن ئے چہ ھدا ءَ بہ ترس ھدا ءِ لٹ بے آواز انت۔
اے گپ اے پسو ءَ میر تاج مھمد کند ایت من ھدا ءِ واستہ ءَ ھر وھد ءَ نیکیں کار کتگ ۔ھلک ءِ تہ ءَ منی نیکیں کار سک باز انت من دل جم آں منی اللہ چہ من ءَ وش ءُ رازیگ انت
ھدا بکش سناٹا همے گش ایت تو ھلک ءِ میر ءُ کماش ئے ھلک ءِ مردم دراہ تئی گون ءَ انت ۔
بھلے اللہ ھچبر تئی گون ءَ نہ انت۔
سبزل جنین ءَ وتی پمیشکہ سھب ءُ بیگاہ ءَ جنَگ ءَ انت ۔آئی ءَ سئے جنکیں چک پیداگ کتگ ۔پرچہ بچک پیداگ نہ کتگ جنک ءُ بچک ءِ پیداگ کنگ اللہ ءِ کار انت جن ءِ کار نہ انت کہ ھدا بکش جنین ءَ کم شرپ کنگ ءَ مات ءِ لوگ ءَ روگ ءُ سون ءِ دئیگ ءِ بیهار ءَ دیگ ءَ انت ۔چک ءِ بچک بیگ ءُ جنک بیگ ءَ سائنس ھم همے گش ایت جنین ءِ ھچ دست مان نیست
اے گپانی کنگ ءَ پد میر تاجل ءَ وتی میتگ ءِ مسیت ءَ ھمے جار جت ءَ ھر کس ءَ ھدا بکش سناٹا دیست آئی بہ کش ایت ۔
بلے ھدا بکش ءُ جان بی بی ءَ پہ همے نیکین کار ءِ واست ءَ وتی جھد برجاہ داشت ءُ دست نہ کَش ات ۔
ھدا بکش ءَ میتگ ءِ جنکانی وانگ جاہ ءِ جوڑ کنگ ءِ کار بندات کت بلے ھلک ءِ کماش میر تاج مھمد اتک ءُ کار اوشتارینت ،کار کنوکاناں همے گشت ئِے اے زمین منیگ انت من وتی زمین ء َپہ وانگ جاہ ءِ واس ءَہ نہ دے آں مئے میتگ ءِ مردم وانگجاه نہ لوٹ انت ۔اے ھدابکش سناٹا ءَ شمارا آؤرتگ ایشی ءِ سر ھراب انت ایشی ءِ گپ ءَ مہ زور ات ۔
ھدا بکش باز ھراب گُشگ ءُ کم شرپ کنگ بوت بلے چہ اے کار ءِ کنگ ءَ وتی دست نہ کش ات
دیمتر ءَ ھدا بکش جان بی بی ءَ همے ھال ءَ دات کہ مئے میتگ بزان بلوچ آباد ءَ مولا داد ءِ جنک ءِ سور بئیگ ءَ انت بلے جنک ءِ امُر کساس دوازدہ سال انت ۔اے اُمر سور ءِ امُر نہ انت اے جنک ءِ سور ءِ اوشتارینگ ءِ توجیلے ساز انت ۔
جان بی بی ھدا بکش ءَ همے گُش ایت کہ ما اے سور ءَ داشت کت نہ کن ایں اگاں ما اے سور ءَ بہ دار ایں مئے میتگ ءِ مردم مارا رذوا ءُ بد کن انت۔
سوشل میڈیا ءَ ھم مارا بے سر ءُ بے پادیں بھتام جن انت بنام ء جهان کن انت ۔
پدا جان بی بی ءُ ھدا بکش سناٹا همے مشورہ کن انت کہ سوشل میڈیا ءَ وتی چاگرد ءِ دیمروئی ءُ میاں استمانی ھلاپ ورزی ءِ بگیری ءَ کار مرز کن آں
اے ترس آھانی دل ءِ تہ ءَ ھست ات کہ ملھوک باریں مارا چی چی گش ایت ۔
دیمتر ءَ جان بی بی ءُ ھدا بکش سناٹا یک تامرے جوڑ کن انت کہ مئے میتک چہ بنکی ھق ءَ زبهر انت بلے مئے میتگ ءَ نی کسان سالیں چکی یے سور بئیگ ءَ انت آئی ءِ امُر انگت دوازدہ سال زانگ بیت ۔
اے تامر ءِ شنگ بیگ ءَ رند میتگ ءِ مردم وتی میر تاج مھمد ءَ ھال دے انت تئی جنک ءَ سوشل میڈیا ءَ یک تامرے مولا داد ءِ جنک اے کسان سالی ئیں سور دیگ ءِ بگیری ءَ شنگ کتگ
چہ اے گپ ءِ اشکنگ ءَ میر تاج مھمد وتی جنک جان بی بی ءِ سر ءَ زھر بیت
مولا دادا ءُ سالونک ءَ ایس ایچ او دزگیر کن انت ۔
میتگ ءِ مردم میر تاج مھمد ءِ کر ءَ کاینت همے ھال ءَ دے انت کہ مئے سالونک برگ بوتگ میر تاج مھمد ایس ایچ او ءَ ٹیلپون کنت جست کنت تو میتگ ءِ سالونک چست کتگ برتگ ۔ اے ھم همے گُش ایت تئی جنک ءَ سوشل میڈیا ءَ گشتگ کہ مئے میتگ ءَ جنکین زھگانی کسانی ءَ سور بیگ ءَ انت ۔مارا همے ھگم دئیگ بوتگ کہ سالونک ءَ دزگیر بہ کن ات ۔
چد ءُ پد میتگ ءِ میر تاج مھمد ھدا بکش سناٹا ءَ دزگیر کنت کہ تو سوشل میڈیا ءَ وانگ جاہ ءُ جنکانی سور دئیگ ءِ واست ءَ تامر جوڑ کن ئے ءُ شنگ کن ئے ۔مئے میتگ امریکہ ءُ ایدگہ ملک نہ انت ما آھانی وڑ ءَ بہ کن ایں ۔مئے بلوچ راج ءَ یک دود ءُ ربیدگے ھست انت ۔
ھدا بکش سناٹا ہمے گش ایت مئے سالے ءَ باریں چنچک جنین زھگ مات بیگ ءِ وھد ءَ مرّگ ءَ انت ایشانی مزنیں سوب کسان اُمر ءِ آروس ءُ سور انت ۔ءُ ایدک ءَ وتئی جنکیں چک ءِ کسانی ءَ بہ تھرپار کر ءَ سور داتگ چل سال انت نہ گند ایت ئِے باریں مرتگ یا زندگ انت ۔
میر تاج مھمد وتی جنک جان بی بی ءَ ھم همے گش ایت تو من ءَ بنام کتگ سوشل میڈیا ءَ ۔بلے جان بی بی همے پّسو ءَ دات ابا من انسان ءُ مردم گری ءِ واست ءَ کار کنگ ءَ آں من ترا پہ اے نیکین کار ءِ کنگ ءَ سوب مند کنگ ءَ آں ترا کم شرپ ءُ کم گند کنگ ءَ نہ آں ۔
جان بی بی ءِ پت جان بی بی ءَ گش ایت کہ تئی سوشل میڈیا ءَ شنگ بوتگیں تامر ءَ چہ پد تئی ناکو ءَ کلوہ کتگ من جان بی بی ءَ وتی نشار نہ کن آں ۔منی ھیال ءَ من بنام ءُ کم گند بئیگ ءَ آں وتی چاگرد ءِ تہ ءَ
جان بی بی وتی پت ءَ همے گش ایت ابا وانگ ءِ کار کنگ اسکول ءِ روگ ائیب نہ انت
اگاں تو زان ئے من ترا کم شرپ کتگ من ءَ موکل بہ دئے من رواں ۔ میتگ ءِ کماش تاج مھمد موکل ئِے دات ۔همے گش ایت کہ تئی روگ ءَ پد من زان آں من ءَ میتگ ءِ مردم همے گش انت کہ تاج مھمد ءَ وتی جنک چہ لوگ ءَ در کتگ بلے پد ءَ زلور بس کن انت
جان بی بی موکل گیپت گش ایت من رواں پدا نیا آں ۔
جان بی بی ءُ ھدا بکش سناٹا ءُ پد ءُ ایدک ءِ چل سال ءَ پیسرسور داتگیں جنک نازُل آئی ءِ شوھاز ءِ جھد ءَ بندات کن انت ۔
ایدک ءِ چل سال ءَ پیسر کم اُمری ءَ تھرپار گون سندھی مردمے ءَ سور داتگ ات بلے زامات ءَ سور ءَ پد نازُل پہ مات ءُ پتاں نیاؤرتگ ۔پمیشکہ ایدک پشومان ءُ پریشان ات روچ ءِ تہ ءَ باریں چنچو رند ءَ نازل ءَ پت یاد کت ۔
جان بی بی ءُ سناٹا نازل ءِ اکس آئی ءِ سانگ ءِ ملک ءُ گس جاگہ ءِ ڈس ءُ نشان زرت تھرپار کر بازیں میتگ ءَ تتک انت پد ءَ نازُل ءِ لوگ ءَ سر بوت انت ۔نازل ءَ بلوچ آباد ءِ میتگ ءِ نام سوج کت آئی ءَ وتی پت ءُ پیرکی جاگہ من ّات ۔
جان بی بی ءُ ھدا بکش ءَ گْوشت ما تئی رند ءَ اتکگ ایں ۔همے گپ ءَ نازل گْریت ءُ گش ایت منی زند ءُ منی وشی نی ھلاس بوتگ انت ۔نی منی پت ءُ مات من ءَ چی کن انت ۔ من ءَ وتی سر ءَ یک گرانیں بارے پھم انت من ءَ بہ اد ءَ داتگ اش منی مرد نشهی یے ھم دگہ جنے ھم گپتگ ئِے من ءَ وتی گلام کتگ ئِے۔
نازل اش پہ دزی کش ات ءُ بلوچ آباد ءِ میتگ ءَ آورت اش میتگ ءِ مردماں ءُ نازل ءِ مات ءُ پتاں نازل دیست سک وش بوت انت ۔چہ نازل ءَ پھلی لوٹ ات اش ۔
بلوچ آباد رسول آباد یکے بوت انت ۔
میر تاج مھمد ءَ هم وتی جنک ءُ ھدا بکش سناٹا ءَ چہ پھلی لوٹ ات ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔