میانی اُستمانی انسانی ھکانی روچ، این ڈی پی ءِ چیردستی ءَ دیوان

دی بلوچستان پوسٹ

نیشنل ڈیموکریٹک پاٹی ءِ بنجاھی جارکش ءَ گْوشت کہ مروچی انسانی ھکانی میان اُستمانی روچ ءِ درگت ءَ دیوان کنگ بیتگ –

دیوان ءَ این ڈی پی ءِ بنجاھی پتر ءِ باسک چنگیز حئی بلوچ، نعمت شاہ بلوچ، ثناء بلوچ، شال ھنکین باسک صغیر بلوچ ءُ چاگردی باسک خالدہ بلوچ ءَ تران کرتگ –

تران کنان ءَ آیاں گوشت کہ مروچی ءِ روچ ھما دراھیں زیردست ءُ زلم آماچیں مھلوکانی روچ اِنت کہ ھما راجانی انسانی ھک بدیں رنگے ءَ لگتمال کنگ بیتگ اَنت ءُ بلوچ ھما بدبھتیں راجاں چہ یکے –

بلوچستان ءَ انسانی ھکانی پادمالی نوزدہ سد ءُ چِل ءُ ھشت ءَ بندات کنگ بیتگ اَنت کہ روچ ء مروچی ءَ برجاہ اَنت – اے وھداں بلوچستاں ءَ ھزاراں پُسگ بیگواہ اَنت ءُ ھزاراں شھید کنگ بیتگ اَنت بلے بلوچ راج ءَ وتی سر ءَ انسانی ھکانی پادمالیانی سر ءَ بے تواری ءُ ندارگ نہ چار اِتگ، بلوچ راج ءَ وھد ءَ اے انسانی ھکانی ناگیگیں پادمالیانی بگیری ءَ جنگ کنان کرتگ ءُ کنگ ءَ اِنت –

آیاں تران کنان ءَ گْوشت کہ مروچی گوادر ءَ ٹٹ ءَ کنگ انسانی ھکانی ناگیگیں لگتمالی کہ اود ءَ ھزاراں آبادیں بلوچ دمگاں زندانانی بند کنگ ءِ بروبری اِنت –

زالم ھروھد ءَ زرداریں زمین ءِ سر ءَ وتی زُلم ءُ زوراکیاں برجاہ دار ایت ءُ بلوچستان زرداریں زمینے ءِ واھند اِنت بلے اے زرداریں زمین ءِ واھند بلوچ راج ءِ سر ءَ بدیں رنگے ءَ زُلم ءُ زوراکیانی تہ ءَ گوزگ اِنت بدبھتی ءَ جھان ءِ مھلوک اے زُلمانی بگیری ءَ توار چِست کنگ ءَ نہ اِنت ءُ نانکہ میان اُستمان ءَ ھچبر بلوچستان ءَ انسانی ھکانی ناگیگیں جاورھالانی بگیری ءَ نانکہ گپ جتگ بلے بلوچ راج نا اُمیت نہ اِنت ءُ وتی ھکانی واستا جد ءُ جھد برجاہ داشتگ –

تران کنان ءَ گڈسر ءَ گْوشت کہ بلوچستان ءِ مھلوک ءَ راجدوستیں راجداری ءَ وت ءَ مھکم کنگی اِنت پرچاکہ نیشنلزم ءِ زانت ءُ زانش مئے رکگ ءِ سوب اِنت، بلوچ راج ءَ راجی راجداری ءِ نیمگ ءَ آیگ لوٹ ایت ءُ یک راجدار ءُ زانتکاری ءِ رنگ ءَ وت ءَ جنجالاں درکپگی اِنت –