انسانی ھکانی میان اُستمانی روچ ءِ درگت ءَ کراچی ءَ زھرشانی

دی بلوچستان پوسٹ

دَہ دسمبر ءَ میان اُستمانی انسانی ھکانی روچ ءِ درگت ءَ سندھ ءِ بنجاھی شھر کراچی ءَ زھرشانی ءُ روانک –

کراچی ءَ وائس فار سندھی مسنگ پرسنز ءُ چاگردی مردمانی نیمگ ءَ یک زھرشانی روانکے کشگ بیتگ، اے روانک ءَ سدانج کچ ءَ بلوچ ءَ سندھی بیگواھیں مردمانی کھول، زالبول ءُ چک ھوار بیتگ اَنت –

روانک ءَ بھر زورکیں مردمانی دستاں نبشتگیں تاک ءُ بیگواھیں مردمانی اکس چِست کنگ بیتگ اَنت ءُ انسانی ھکانی میان اُستمانی گلاں لوٹ اش کرتگ کہ دوستگیں مردمانی یلہ کنگ ءَ توار چِست بہ کن اَنت –

وائس فار سندھی مسنگ پرسنز ءُ چاگردی باسکانی نیمگ ءَ برجم کرتگیں زھرشانی ءَ چہ بلوچستان ءَ بیگواھیں ڈاکٹر دین مھمد ءِ جنک سمی بلوچ، نودربر رھشون شبیر ءِ گوھار سیما بلوچ ءُ انسانی ھکانی باسک راشد ھسین ءِ برات زتک ماہ زیب بلوچ ھوار بیتگ اَنت –

ھمے وھد ءَ آیاں گوشت کہ بلوچستان ءَ انسانی ھکانی لگتمالی دارگ بہ بنت –
آیاں گوشت کہ مئے دوستگیں مردم سالانی سال چہ بیگواہ اَنت ما وتی کسانی دگانی لوٹانی تہ ءَ گوازینتگ بلے ھاکماں بلوچ انسان گندگ ءَ نیاینت –

آیاں گوشت کہ ما ھروھد ءَ گوشگ ءَ ایں اگاں مئے دوستگیں مردم شمئے دشمن اَنت آیاں وتی آمیدگساں پیش بہ کن اِت اگاں شمارا وتی آمیدگسانی سر ءَ اوست نیست گڑا اے ملنڈی ءَ بند بہ کن اِت –

آیاں گوشت کہ مروچی مئے مات دگانی سر ءَ چہ تر ءَ انساپ ءِ لوٹ ءَ دراتکگ اَنت اے وڑ مہ بیت کہ ما شمئے گٹ ءَ بہ گریں بہ گوش ایں مئے دوستگیں مردم کج اَنت –