بلوچستان نوکیں آبادکارانی آماچ اِنت – این ڈی پی

دی بلوچستان پوسٹ

نیشنل ڈیمو کریٹک پاٹی ءِ بنجاھی جارکش ءَ گوادر ءَ ٹٹ جنگ ءَ اے پدر کنت کہ بلوچستان ءِ سرڈگار اسلام آباد ءِ واستا بس جاڑیگ کنگ ءِ والینگے ءُ گوادر ءِ ٹٹ جنگ ءَ ھمے سما بیت بلوچستان اسلام آباد ءِ ملکیت اِنت –

آئی ءَ گْوشت کہ یک راجے ءِ پجار کنگی اِنت گڑا آئی ءِ مڈی ءُ سیمسراں پروش اَنت ءُ آ راج ءِ مڈی ءُ گواچنیاں جاوراں ڈنی مردمانی دست ءَ دے اَنت اے وھد ءَ بلوچستان ءَ نوک آبادکارانی آماچ اِنت پرچاکہ گوادر ءَ ٹٹ ءَ کنگ بس ایوک ءَ زورامندیں چین ءِ وشھال کنگ سوبمند کنگ اِنت، سی پیک بلوچستان ءِ پُلپھانچانی نام اِنت بلوچ راج ءَ سی پیک ءِ وڑیں پُلپھانچیں بند ساچی رد کرتگ اَنت پرچاکہ اے وڑیں نام گپتیں پروجیکٹس آسراتاں بلوچ راج الکاپ ءَ سرپد اِنت ءُ گوادر ءِ شھر ءَ ٹٹ ءَ کنگ ھمے کارانی یک بندے –

جارکش ءَ گوشت کہ سی پیک ءِ سوب ءَ ھزاراں بلوچ دزگیر کنگ ءُ بیگواہ کنگ بیتگ اَنت کہ مروچی آیانی ھچ ھال نیست ءُ چریشاں ابید لَکانی بلوچ زورانسری میتگاں لڈینگ بیتگ اَنت پرچاکہ گوادر ءَ ھوار مکران ڈویژن ءَ نوکیں مھلوک ءِ آرگ ءِ وڑیں شوربندیاں آرگ، بلوچستان ءَ نوک نہ اَنت، راجدپتر ایشی ءِ راستی وھدیکہ ذولفقار علی بھٹو سر وزیر بیتگ ھما وھد ءَ بلوچ راج ءِ سر ءَ زُلم ءُ زوراکی کنگ بیتگ اَنت پوجی لشکر کشی سر ءِ زور ءَ بیتگ اَنت ءُ مروچی ءِ وھد ھما وھد ءِ کارپداں پیش دارگ ءَ اِنت وھد مٹ بیگ اِنت بلے بلوچ راج ءِ سر ءَ زُلم ءُ زوراکی ءُ پُلپھانچی برجاہ اَنت –

آئی ءَ گوشت کہ بلوچ راجدار راجدوستی ءِ ٹاہ دیوکانی وھد ءَ ھست ھوش بہ کن اَنت ءُ بلوچ راجدوستی ءِ راستیں رھشونی ءَ بہ کن اَنت بلوچ راج ءِ ھمراھداری ءَ بہ کن اَنت ءُ گوادر ءِ ٹٹ ءَ کنگ ءَ ایر بہ جن اَنت –

ھمے وڑ ءَ سردار آختر مینگل ءَ ھم گوادر ءِ ٹٹ ءَ کنگ ایر جتگ ءُ چاگردی رسانکجاہ ٹوئٹر ءَ گْوشتگ کہ گوادر ءِ ٹٹ کنگ بلوچانی کمتری پیشدارگ ءُ بلوچ زر ءِ سر ءَ زوریں زورگری اِنت ءُ اشی ءِ ھچ منّوک نہ اِنت ءُ اشی ءَ سوبمندی ءَ نیل اِنت –