چین ءُ پنجاپ ٹٹ جنگ ءَ بلوچستان ءَ وتی زوگری ءَ مھکم کرت نہ کن اَنت – بشیر زیب بلوچ

دی بلوچستان پوسٹ

چین ءُ پنجابی زوراک بلوچ آبادیانی سر ءَ ٹٹ جنگ ءُ بند کنگ ءَ بلوچ ڈیھ ءِ سر ءَ وتی زورگری ءُ جاڑیگ بیگ ءَ دراج کش دات نہ کن اَنت – اے گپانی درشان بلوچ لبریشن آرمی ءِ سروک بشیر زیب بلوچ ءَ پشمبے ءِ روچ ءَ چاگردی رسانکجاہ ٹوئٹر ءَ کرتگ اَنت –

بشیر زیب بلوچ ءَ اے گپانی درشانی بلوچستان ءِ تیاب دپی شھر گوادر ءِ کش ءَ گوراں ٹٹ جنگ ءِ پشدر ءَ کرتگ اَنت –

آئی ءَ دیمتر ءَ گْوشت کہ ما بلوچ (فدائین) جوانیں منّوک ءُ رندگیر اِنت – ءُ دنیا ءِ کجام ھم زور ءُ دست اے زانت ءُ پگر ءِ دیم ءَ اوشتات نہ کنت –

زانگ بہ بیت بلوچ لبریشن آرمی ءَ گوستگیں سال ءَ گوادر ءِ پنچ استار ھوٹل “پرل کونٹینینٹل نشانگ کرتگ اَنت – گل ءِ جارکش جیئند بلوچ ءَ اُرش ءِ زمہ واری منّ اِتگ اَت ءُ گوشتگ اَت اے اُرش مجید بریگیڈ ءِ چار فدائیناں کرتگ –

درشان ءِ تہ ءَ گیش گوشگ بیتگ اَت اے اُرش بی ایل اے کلانیں رھشون شھید جنرل اسلم بلوچ ءِ پگر ءِ رندگیریانی بھر اِنت کہ بلوچستان ءِ سرجمیں آجوئی ءَ داں زوگر ءَ سرپدی نہ بیت ءُ چین ءَ ھوار دراھیں دری زرکار ءُ آؤکیں مردم بلوچ ڈیھ ءِ مڈی ءُ زر ءِ پُلپھانچی ءُ بلوچستان ءِ سر ءَ زورانسری زورگری ءَ ھچ رنگ ءَ اجازت نہ دنت ءُ اشانی سر ءَ دیم ءَ گیشتر اُرش برجاہ مان اَنت –

زانگ بہ بیت پاکستانی واکدارانی نیمگ ءَ گوادر ءِ کش ءُ گوراں ٹٹ جنگ ءِ گپ تنی وھدی دیم ءَ نیاتکگ اَنت ءُ بلوچ سیاسی ءُ چاگردی مردمانی نیمگ ءَ زھرشان درشان کنگ بیگ ءَ اِنت –