نبشتانک: ساجد! ترا چہ پد
نبشتہ کار:نیاز ناز بلوچ
دی بلوچستان پوسٹ
مِرگ سک گران اِنت، ھو مرگ گران اِنت ءُ پد ءَ سک گران اِنت زندگی سک وش اِنت سک تام دار اِنت براہدار اِنت جلواناک اِنت ءُ زندگی چہ زیبائیاں سرریچ اِنت۔
بلے ھمک بنی آدمی زات ءَ زندگی ءِ شیرکنی یےچشگ ءَ چہ پد مَرگ ءِ تھلی ھم گُلاٹگی اِنت۔
مَرگ پہ ھمک آدمی ذات ءَ المی اِنت بلے یک مَرگ ءِ ترا دائمی کشیت ءُ یک مَرگ ءِ ترا دائمی زندگ کنت۔
ھو چہ مِرگ ءَ پد زندگی کنوکیں مردم ھما بنت کہ پہ زمین جیڑ اَنت پہ زمین زندگ بنت ءُ مرگ ءَ ھم پہ زمین امباز اَنت دان جھان ھست اِنت ھست اَنت ابدمان بنت راج دپتر ءِ تاکدیم ءَ-
ساجد جان ھم چہ ھمے ھمبلان، چہ ھمے زمین زادگان یکے ات کہ نمیران بوت زمین گون وتی ھونان رنگیں ءِ کت مدام پنداں ات سپر ات چاگل ات توشگ ات ءُ وشدلی ات ءُ پُر لزتیں بچکند آئی یے زند ءِ ھمراہ ات اَنت،نزانان گون کجام لبزان تئی مھروانی ءَ بہ نویسان ٹلجان! کجام نیادانی کسہ ءَ بکنان؟-
ھما روچگیں کسہ ءَ بکنان کہ سپر دراج ات سک گرم ات گُش ئے آزمان نپت گوارگ ءَ ات ما ھید ءَ چہ میچل اِت ایں دم پُر بوگ ءَ نہ ات کہ آزمان ءَ کسانکیں شینکی ءَ دراھی کتگ ات ءُ تیوگیں آزمان ءَ مانپوشگ ءَ ات پد ءَ ھور بوت گُش ئے دنزی ءَ مئے سر ءَ بور ات ءُ ھور ءَ پد سپر سک وش ءُ پُر لزت بوت۔
ٹلجان! آ شپ ءَ من بے ھیال کت نہ کنان کہ امب ات ءُ دشکتیانی دیوان، وروکائی ات، من ترا پہ بچکند جست کت تو چنچو دانگ وارتگ؟تو بچکند ات ءُ گشت منی دومی اِنت درستان ٹھک دات ءُ گشت تو سک پشت کپتگ ئے۔
ٹلجان! ھما کڈک ءِ توک ءَ شربتانی ڈبہ انگت کپتگ اَنت اگان منی سر ھما کڈک ءَ کپت درائیں ڈبہ آن یکجاہ مچ کنان ءُ نزاران، ھما چل ءِ سرا کمے ننداں ءُ ترا جیڑان کہ تئی واب جاہ ات ھمودا ھما کوڈا سک باز یات پشت کپتگ ھمود ءَ ھما کڈ ءَ منی ارواہ پشت کپتگ ءُ آئی ءِ پد جنگ ءَ من الم روان۔
ٹلجان! ما نزانت تو چو اشتاپ کن ئے، بلے یار تو کمو بجیڑ اتیں ترا چہ پد چنچو تنھائی بیت، نا زیبائی مانیت، نا کرار، نا زندگی یے جلواہ، نا رنگ، نا براہ، نا واھگے پشت کپیت ءُ نا کہ پُر لزتیں بچکند ءِ لنٹانی سرا آتار بیت۔
زیکیں گڈی پون ءَ تو دان سک دیر ءَ گپ جت تو سک ٹھک دات سک گل ات ئے تو چی گشت یار ءُ پدا چی بوت ؟ من نزانت اے تئی گڈی دانک بنت ءُ تو پد ءَ مدامی مارا یلا کنے ءُ روئے ترا تئی نمیرانی مراد بات منی ارواہ ءُ مارا مئے تنہائی ءُ ابیتکی۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔