دی بلوچستان پوسٹ
بلوچستان ءِ تہ ءَ پوجی لشکر کشی، ھزاراں بلوچ پرزندانی شھیدی ءَ گوں بندات بیتگ ءُ روچ ء مروچی ءَ داں یکشل ءَ برجاہ انت- ماما قدیر بلوچ
بلوچستان ءِ بنجاھی شھر شال ءَ وائس فار بلوچ مسنگ پرسنز ءِ بنجل ءَ مروچی چار ھزار ءُ یک سد ءُ پنجاہ ءُ پنچ روچ سرجم بوتگ –
چہ شال ءَ غلام محمد دستگیر ءَ ھوار دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان اِتگ ۔
ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ باوست کنان ءَ گوشتگ کہ بلوچ راج ءِ گم سکی ءَ سوری ءِ گندگ ءَ پد کزا یک سنگدلیں انسانے وتی ارساں داشت بہ کنت بلے اے بلوچ راج انت کہ انچو درد ءِ سگگ ابید اوپار کنگ انت ۔
آئی ءَ گوشتگ کہ ھمے اوپار ءِ پشدر ءَ لھتے سودابازی کنگ ءَ اِنت، زوراکی سگگ بلوچانی لاچاری انت پرچاکہ ایردستیں راج ابید ء اشی ءَ دگہ ھچ کرت نہ کنت ۔
ماما قدیر بلوچ ءَ دیمتر ءَ گوشتگ کہ بلوچستان ءِ تہ ءَ پوجی لشکر کشیاں ھزاراں بلوچ پرزندانی شھیدی ءَ گوں بندات بوتگ روچ مروچی یکشل ءَ برجاہ انت -بلوچستان ءِ تہ ءَ انسانیت ءِ سوز پالیسیاں چہ ریاستی رسانکدراں ھچبر سر چست نہ کرتگ ءُ نہ چارتگ ءُ ناکہ اے درگت ءَ ھیال ءُ پگر کُتگ کہ بلوچانی سر ءَ پرچا انچو زوراکی کنگ بوگ ءَ انت ۔