نبشتانک: زندان ءُ لشکری
نبشتہ کار: شیھک شاہ
دی بلوچستان پوسٹ
من بازار ءَ روگ ءَ اِت آں اناگت ءَ یکے ءَ گوں ترندی ءَ منی سر ءَ آسنے جت ءُ من بے ھوش بوت آں ءُ ھچ سد ءُ سما نہ کت وھدے من چم پچ کُرت اَنت داں گِنداں من کوٹی ءِ توک ءَ آں منی دیم پہ دیم ءَ تُپنگی مردے میلانک انت ءُ کُرشی ءِ سر ءَ نِشتگ دگہ یکے چپی کش ءَ اوشتاتگ آئی ءَ ھم تُپنگے گوں انت ءُ دگہ یکے آئی راستیں کش ءَ چوں مینڈی ئیگ دپوکہ (بزاں چادر ئِے پتاتگ ءُ )منی سر ء بان ءَ اوشتاتگ۔
من جُست کُت شُما چونین اِت؟
من ءَ پرچا اِد ءَ آؤرتگ اِے جاگہ کُجام اِنت؟ گُشت ئِے سَبر کن مزنیں ساھب کیت ساھب ھمے گپ ءَ گوں رس اِت جُست ئِےکُت بیٹا آپکا نام؟ من زانت کہ نام ءِ جُست ءَ اِنت من گُشت دیدگ پد ءَ یک جُستے ماں اردو ءَ کت ئِے۔
من گُشت اردو نزاناں گُڑا کند اِت ئِے ءُ من ھمینچُک ءَ سرپد بوت آں کہ گُشت ئِے بلوچ ہو ایسی لئے انپڈ( بلوچے ءِ ھمے واستا بے المے ءِ من ھچ نہ گُشت۔
پد ءَ بلوچی ءَ گوں گپ ئِے جت
کُجام پارٹی ءِ مردُمے یے؟ کمانڈر کہ اِنت؟کُجام ءُ کجام جنگ ءَ گون بوتگے ئے ؟دُرستانی جواب ءَ بہ دے ترا یل دیاں من ھیران بوتاں پارٹی کمانڈر جنگ ءُ پدا من من گُشت ساب من بےگُناھے آں ءُ ایشانی بارواہ ھچ سرپد نہ آں گُڑا دبوکہ والا مرد ءَ گُشت۔
”سر میں نے اپنے آنکھوں سے اس کو سرمچاروں کے ساتھ دیکھا یہ بی ایل ایف کا بندہ ہے”
(واجہ من گوں وتی ٹیلگاں اے سرمچنڈانی ھمراھی ءَ دیستگ ءُ اے بی ایل ایپ ءِ مردم انت)
پد ءَ ساھب ءَ گُشت بی ایل ایپ ءِ مردمے ئے؟من گُشت من ھچ نزاناں گُڑا ساھب گوں وتی ھمراھاں شُت۔
پد ءَ دگہ دو مردم آتک ءُ وتی تُپنگ کمو چہ من گِستا اِیر اِش کُت اَنت منی دست اش گوں زمزیلاں ترند ٹٹات اَنت ءُ بست اَنت اش۔
من ءَ سک جت اِش من سک کوکار کُت اِے زالماں من ءَ انگت یلو نہ دات من بےھوش بوت آں، وھدے ھوش کُت داں منی سرجمیں جان چہ ھون ءَ میچل اِتگ من آپ لوٹ اِت یکے ءَ وتی آنجگ پچ کُت منی سر ءَ مِشت ئِے ءُ گُشت۔
“یہی ہے ہمارے پانی پی لیجئے”
من زانت کہ زندان ءِ تہ ءِ جلاد تریں پوجی اَنت پد ءَ ساھب آتک من آپ لوٹ اِت گُشت ئِے وتی دُراھیں گپاں بہ جن ترا آپ ناں دُرست رس اِیت من گُشت من بےگُناھے آں،ھچ نہ کُتگ پد ءَ گُشت ئِے چے ءَ وت ءَ را بزگ کن ئے زاناں لٹ ءِ ورگ انچُش وش اِنت گُڑا ساھب ءَ آپ لوٹا اِینت من کہ آپانی گلاس دپ ءَ بُرت یک مردے ءَ منی آپ ءِ گِلاس ءِ تہ ءَ دامچراگ ءِ وائرے مان کُت من ءَ کرنٹ اش دات من گوں کرنٹاں پد ءَ بےھوش بوتاں پد ءَ ساھب ءَ گُشت تئی مات نادراہ اِنت تئی کستریں برات ویلے ءِ آماچ بوتگ ءُ نادُراہ جاہ ءَ بُرتگ اِش تئی پت چہ گماں بےھوش اِنت تئی گُھار گنوک اِنت وتی کُتگ اِیں کاراں مَن ترا یلہ دیاں بلے من زانت اِے دُرست دروگ اَنت منی ٹارچری(لٹ ءُ شاپ) ءِ واستا کنگ ءَ اَنت اِش ۔
پد ءَ گُشت اش اگاں یک ساھتے ءِ توک ءَ تو وتی گپ نہ مَن اِتاں تئی مات ءُ گُھاراں پت ءَ براتاں دُراھیناں چِست کناں کاراں اِد ءَ من منی گپ پد ءَ ھما اِت اَنت۔
گُڑا جُست اش دلیپ شِکاری ءِ گوما کدی ھم دیوان بیتگ ئےڈاکٹر اللہ نزر کُجام کوہ ءَ اِنت ؟ترا چنچُک ماہ بیت کہ تو چہ ڈاکٹر اللہ نزر ءِ کِرا چہ آتکگ ئے؟ءُ ڈاکٹر اللہ نزر ءِ کیمپ (بنجل) ءَ چونیں سِلاہ ھست آئی ءِ ھمراہ چِنچُک اَنت کُجام ٹیمب ءَ گاٹ (سنگر نندانک)بدل بنت کیمپ ءِ کُجام نیمگ ءَ گاٹ (سنگر گپتگیں)اِنت؟ من ھیران بوتاں من چہ جِندے لوگ ءَ چہ ڈن وتی ھمساھگانی میتگ ءَ تنیگا نہ شُتگ آں ، اِے من ءَ ڈاکٹر اللہ نزر ءُ دلیپ شکاری ءِ جُست ءَ کنگ ءَ اِنت من پد ءَ گُشت من ھچ نزاناں من ءَ گوں پارٹی ءَ ھچ تھلک (سیادی) نیست گُڑا اِشاں منی دست گوں سانکلاں بست اَنت من ءَ ٹنگ اِت اِش شپ ءُ بگر داں سُھب ءَ من انچُش پد ءَ بے ھوش بوت آں وھدے ھوش کُت پد ءَ ھما جُست-
انچُش سَما بوھگ ءَ اَت من گنوک بوھگ ءَ آں نزاناں نوں چے بوھگ ءَ اِنت ماھے ءَ داں ھمے وڑ ءَ لٹ ءُ کُٹ اِش کُت پد ءَ من ءَ آؤرت اِش جاھے ءَ یل ءَ اِش دات منی سر ھچ پر بوھگ ءَ نہ اَت یک سینکل والاھے آتک من ءَ دیست ئِے اوشتات ءُ جُست ئِے کُت؟-
من نزاناں من چے پسو دات دومی روچ ءَ ھوش کُت داں من ھسپتال (نادراہ جاہ) ءَ آں منی مردم منی کِرا نشتگ اِت اَنت ءُ منی سر ءَ سمارگ ءَ اِت انت ءُ من ءَ تسلہ دیگ اِت انت ءُ ھمے گوشت اِش کہ ناکو تھاری ءَ پد روژنائی یے الم کیت تو باز لٹ ءُ کٹ پُج اتگ ءُ ایشانی جست الم بے گھاراں (بے ضمیر ءَ) بنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔