شال ءَ بیگواھیں مردمانی ھاتر ءَ برجاہ داشتگیں زھرشانی ءَ چار ھزار ءُ یک سد ءُ پنجاہ ءُ چار روچ سرجم بیتگ

لھتے ھنچیں مردم ھم بیت کہ آھانی ودی بوگ ءِ وھد ءَ مزنیں بستار نہ دار اَنت، بلے آھانی بیرانی ءَ سرجمیں انسانیت ھون ءِ ارس گریوْیت – ماما قدیر

دی بلوچستان پوسٹ

بلوچستان ءِ بنجاھی شھر شال ءَ پاکستانی گلانی دست ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ یک سد ءُ پنجاہ ءُ چار روچ سرجم بوتگ –

بلوچ نودربر گل ءِ گوستگیں سرکماش میر مھم خان بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ اے دنیاء ءَ ھمک روچ لکّانی ھساب ءَ مردم ودی بنت ءُ ھزارانی کچ ءَ اے دنیاءَ یلا کن انت رؤ انت – الگرد ودی بنت ءُ الگردی ءَ اے دنیا ءَ چہ سپر کن اَنت – آھانی بیرانی ءَ پد کسے ھم آھانی نام ءِ گرگ ءَ ھم ساڑی نہ بنت نانکہ لس مردم آھانی زانگ ءِ ھاتر ءَ پٹ ءُ پول کن انت ءُ نانکہ راجدپتر آھانی منّگ ءَ ساڑی بیت –

آئی ءَ دیمتر ءَ گوشتگ کہ لھتے ھنچیں مردم ھم بنت کہ آھانی ودی بوگ مزنیں بستارنہ دار اَنت بلے آھانی بیران بوگ ءَ سرجمیں انسانیت ھون ءِ ارس گریویت – زندے گوات ءِ سر ءَ ھاموشی بیت ءُ آزمان ءِ سیاھیں جمبر پدردی ارس گوار انت، راجدپتر آھانی دیم ءَ جُک ایت ءُ آھاں سلام ندر کنت آھاں وتی اندر ءَ جاہ دنت اے ھما مردم بنت کہ پُرایمنیں جد ءُ جھد ءِ پیامپر بنت، دنیاء ءَ بدل کن انت، راجے تہ ءَ آشوب کار انت، راجی گلامی ءَ چہ رکگ ءِ ھاتر ءَ راج ءِ رھشونی کن انت –

آئی ءَ گوشتگ کہ ریاست ءِ ناشرکاراں بلوچانی آوار جنی ءَ پد آ شھید کُرتگ ءُ آھانی زانگولیں جون دور داتگ ءُ زوراکی ءِ مسال برجاہ داشتگ، ریاست ءِ داشتگیں ڈیت اسکواڈ دیم ءَ اتکگ انت –

گڈسر ءَ ماما قدیر بلوچ ءَ گوشتگ کہ گوستگیں روچاں مشکے ءِ تہ ءَ ریاستی ڈیت اسکواڈزاں شپانک کُشتگ ءُ آھانی تامر ھم گپتگ ءُ شنگ کرتگ تاکہ مردم سرپد بہ بنت کہ مارا بلوچ راجے کُشت ءُ کوش ءِ درسیں واک دیگ بوتگ انت –