کلات: تیل ءُ گیس ءِ کمپنی ءِ بگیری ءَ مھلوک ءِ زھرشانی

دی بلوچستان پوسٹ

کلات گیاوانکوہ ءُ ھربوئی ءِ جھمنندیں مردماں پی پی ایل کمپنی ءِ بگیری ءَ زھرشانی روانک کش اِتگ ءُ کمپنی ءِ ھلاپ ءَ اوگام جنان ءُ تاوانانی پُرکنگ ءِ لوٹ اِش کرتگ –

سر بیتگیں ھالانی رد ءَ گیاوانکوہ ءُ ھربوئی ءِ جھمنندیں مردماں زھرشانی کنان ءَ گْوشتگ کہ مئے زھرشانی پی پی ایل کمپنی ءِ ناوشیں کارانی بگیری اَنت – آیاں گوشت کہ ما کلات گیاوان کوہ ءَ کوہ ھربوئی ءِ جھمنند اِنت ءُ مئے زمینانی سر ءَ تیل ءُ گیس ءِ شوھاز کنگ پی پی ایل ءَ شش سال ءَ پیسر بندات کرتگ ءُ زمینانی واھند ھچ رنگ ءَ جست کنگ نہ بیتگ اَنت ءُ مئے آبادیں زمینانی سر ءَ دگ جوڑ کرتگ ءُ مئے ڈگارانی بند تاوان داتگ اِنت اش ءُ درچک گُڈگ بیتگ اَنت ءُ مارا تاوان دیگ بیتگ ءُ مئے تاوان پُر نہ بیتگ اَنت –

آیاں گوشت مئے دمگ سک پَشتکپگیں دمگانی تہ ءَ ھوار اِنت وانگ، جانسلامتی، دگ ءُ دگہ بندکی اژدری زلورتیاں زبھر اِنت – کمپنی ءَ کار کلات ءِ بازیں جاھاں بندات کرتگ ءُ ھر روچ مارا نندگ ءِ مھلت دیگ ءَ اِنت ءُ دور دور ءَ نندوکیں مردم کمپنی ءِ گشتگیں مسامی روچ ءَ کاینت پد ءَ کمپنی ءِ زمہ وار ٹپ اَنت –

آیاں مزنیں واکداراں لوٹ کرتگ ءُ گوشتگ کہ مئے تاوان پُرکنگ بہ بنت اگاں ناں ما دیمتر ءَ زھرشانی کن ایں –