گیشکور ءَ پاکستانی پوج ءِ بیڑ برجاہ

دی بلوچستان پوسٹ

سر بیتگیں ھالانی رد ءَ بلوچستان ءِ دمگ گیشکور ءَ پاکستانی پوج ءَ بیڑ برتگ ءُ لشکر کشی بندات کرتگ –

دمگی مردماں ٹی بی پی ءَ گوں گپ کنان ءَ گوشتگ کہ مروچی سھب ءَ پاکستانی پوج ءَ گیشکور ءِ بازیں جاھاں بیڑ برتگ ءُ لشکر کشی بندات کرتگ –

آیاں گْوشت کہ گیشکور ءِ مردم پاکستانی پوج ءَ مُچ کرتگ ءُ پوجی بنجل ءَ برتگ اَنت ءُ ھمے میان ءَ پوج ءَ مارٹر گولہ ءُ بازار ءِ تیرگواری ھم کرتگ –

دمگی مردمانی رد ءَ گیشکور ءَ ھواریں میتگ سُنڈم جاڑین، ڈنڈار ءِ کوھی دمگاں ھم پوج ءَ بیڑ برتگ ءُ لشکر کشی بندات کرتگ –

دمگی مردمانی رد ءَ سُنڈم جاڑین ءَ پوج ءَ مردم گپتگ ءُ لٹ ءُ کُٹ کنان ءَ گیشکور ءَ پوج ءِ بنجاھی بنجل ءَ برتگ اَنت –

آیاں گوشت دمگ ءَ بازیں کچے ءَ پوج جاڑیگ اِنت ءُ دمگ ءِ راہ ءُ در پوج ءَ بستگ اَنت ءُ تنی وھدی دگہ تاوانانی ھال سر نہ بیتگ اَنت –

زانگ بہ بیت گوستگیں روچ ءَ گیشکور ءَ پاکستانی پوج ءِ بنجل ءِ سر ءَ ناشناسیں سلاہ بندیں مردماں اُرش کرتگ اَت ءُ مروچی رسانکدراں شنگ بیتگیں ھالانی تہ ءَ گوستگیں روچ ءَ بیتگیں اُرش ءِ زمہ واری بی ایل ایف ءَ منّ اِتگ –

بلوچستان ءِ لبریشن فرنٹ ءِ جارکش میجر گوھرام بلوچ ءِ شنگ کرتگیں درشان ءِ تہ ءَ گوشگ بیتگ اَت کہ گوستگیں روچ ءَ گیشکور ءَ پاکستانی پوج ءِ بنجاھی بنجل ءِ سر ءَ اُرش کرتگ ءُ پوج ءَ را جانی ءُ مالی تاوان داتگ –

مروچی بیتگیں پوجی بیڑ ءِ بارہ ءَ تنی وھدی پوج ءِ نیمگ ءَ ھال شنگ نہ بیتگ اَنت –

بلوچستان ءَ بندوکیں سیاسی ءُ چاگردی مردمانی گوشگ اِنت کہ گوست ءَ ھم پاکستانی پوج ءِ سر ءَ بیتگیں اُرشانی پُشدر ءَ پوج لس میتگانی سر ءَ بیڑ بارت ءُ لس دست ءُ گوشیں مردماں آوار جنت ءُ لَٹ ءُ کُٹ کنت –