گیشکور ءَ پاکستانی پوج ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ

گیشکور بازار ءَ آرمی بنجل ءِ بنجاھی پانگس ءِ سر ءَ راکٹ ءُ وتکاریں سلاھاں گوں اُرش کُتگ دژمن جانی ءُ مالی تاوان داتگ – میجر گْوھرام بلوچ

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کیچ ءِ دمگ گیشکور ءَ برجاھیں پاکستانی پوج ءِ بنجاھی پانگس ءِ سر ءَ اُرش کُتگ – اُرش ءَ پاکستانی پوج ءَ جانی ءُ مالی تاوان رس اِتگ، سلاہ بندیں مردم درآیگ ءُ رؤگ ءَ سوبین بوتگ انت –

دومی نیمگ ءَ راجی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ سی نومبر دو شمبے ءِ روچ ءِ بیگاہ ءَ مئے سرمچاراں کیچ ءِ دمگ گیشکور بازار ءَ پاکستانی پوج ءِ بنجاھی پانگس ءِ سر ءَ راکٹ ءُ دگہ مزنیں سلاھانی گون ءَ اُرش کتگ-

دیمتر ءَ میجر گْوھرام بلوچ ءَ وتی درشان ءِ تہ ءَ گوشتگ کہ سرمچاراں بنداتی ءَ پوج ءِ دو سنگر مزنیں سلاھانی گون ءَ نشانگ کتگ اَنت ءُ پد ءَ پوج ءِ بنجاھی پانگس ءِ سر ءَ بازیں راکٹے آس داتگ کہ پانگس ءِ تہ ءَ کپتگ اَنت ءُ ھمے وھد ءَ سرمچاراں مزنیں سلاہ ھم کارمرز کرتگ اَنت ءُ دژمنیں پوج ءَ را جانی ءُ مالی تاوان رس اِتگ-

گُڈسر ءَ بی ایل ایف ءِ جارکش میجر گْوھرام بلوچ ءَ وتی درشان ءِ تہ ءَ گوشتگ کہ زورگپتیں بلوچستان ءِ آجوئی ءَ تاں مئے اُرش برجاہ مان انت –