شال ءَ بیگواھیں مردمانی ھاتر ءَ برجاہ داشتگیں زھرشانی ءَ چار ھزار ءُ یک سد ءُ چل ءُ چار روچ سرجم بیتگ

پاکستان ءِ درستیں ادارہ آمیدگس بیت یا رسانکدر ءُ پارلیمنٹ دراہ چیریں ادارھانی ایردست انت – ماما قدیر

دی بلوچستان پوسٹ

بلوچستان ءِ بنجاھی شھر شال ءَ استانی گلانی دست ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ یک سد ءُ چل ءُ چار روچ سرجم بوتگ –

ھزدار ءَ چہ میر سلیم بلوچ، داد محمد زھری، خادم بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ وتی ھیال درشان اِتگ ءُ گوشتگ کہ بلوچستان ءِ تہ ءَ بید سلاہ بندیں مھلوک، نودربر ءُ سیاسی باسکاں ھوار راجداریں گلانی رھشونانی ھم نشانگ کنگ بندات کنگ بوتگ اَنت کہ آ پُرایمنیں جد ءُ جھد کنوکیں بیگواھیں مردمانی ھیرھواہ بوتگ انت –

آئی ءَ گوشگ ات کہ زوراکیں پوج ءَ ھزارانی کچ ءَ بلوچ زورانسری آوار جتگ ءُ بیگواہ کتگ انت کہ آھانی تہ ءَ چُک ءُ زالبول ھم ھوار انت – ھزارانی کچ ءَ بیگواھیں مردمانی تیر سپتگیں زانگولیں جون بلوچستان ءِ جتائیں دمگاں چگل دیگ بوتگ انت –

ماما قدیر بلوچ ءَ گوشتگ کہ پاکستان ءِ درستیں ادارہ رسانکدر بیت شر یا آمیدگس ءُ پارلیمنٹ دُرست چیریں ادارھانی ایردست انت کہ آھاں بلوچ راج یک دژمنیں راجے ءِ وڑ ءَ زاھر کتگ- پاکستان ءِ پارلیمنٹ، آمیدگس ءُ دنیا ءِ درسیں ادارہ ءُ دگہ گلاں اے ناجائزیں آوار جنی ءُ، بلوچ ءِ پُرایمنیں جد ءُ جھد ءِ بگیری ءَ گمراہ کنگ انت –

گڈسر ءَ ماما قدیر بلوچ ءَ گوشتگ کہ اے راست انت کہ بلوچ گار نہ انت بلکیں پاکستانی پوج ءِ کر ءَ انت – پاکستانی ریاست نانکہ اے دمگ ءِ ھاتر ءَ یک سیکورٹی رسک اِنت بلکیں سرجمیں دنیا ءِ ھاتر ءَ ترسناک اِنت –