بلوچستان ءَ دگ ءِ وئیلاں بیست مردم ٹپی

بلوچستان ءِ جتا جتائیں دمگاں ھور رچگ انت وھدیکہ ھمے میان ءَ جتا جتائیں دمگ مستونگ، منگچر،ءُ شال ءَ دگ ءِ وئیلاں بیست مردم ٹپی بوتگ اَنت –

دی بلوچستان پوسٹ

گیشین ھالانی رِد ءَ مستونگ ءِ نزیک ءَ دگ ءِ وئیل ءَ چک زالبولاں ھوار دوازدہ مردم ٹپی بوتگ اَنت –
ایدھی ءِ رِد ءَ شال ءَ داں کراچی ءَ رؤکیں مساپر کوچ وئیل ءِ آماچ بوتگ، وئیل ءِ سوب ءَ کوچ ءَ سواریں چُک زالبولاں ھوار دوازدہ مردم ٹپی بوتگ اَنت –

ٹپی بوتگیں مردمانی تہ ءَ علیم ء غلام سرور، امجد محمود، نثار احمد ء علی، سعیدہ بانو، نور حسن، شاہ زیب، نثار احمد، محمد ناصر ولد قیوم، محمد طارق،ناصر لوگی حسیبہ فاطمہ، مبشر نور ء حاجی بخش اوراحمد ء علی ھوار انت –

کوچ سواریں وئیل آماچ بوتگیں مردم ھسپتال ءَ سرکنگ بوتگ انت –
مستونگ ءِ تہ ءَ دگہ وئیلے شھدگ ءِ سر ء دیم ءَ اتکگ کہ ھور ءِ سوب ءَ ٹرالر گاڑی ءِ چپی بوتگ، وئیل ءَ دو مردم زدگ بوتگ اَنت –

ھمے وڑ یک دگہ وئیلے مستونگ ءَ ولی خان لیویز تھانہ نزیک ءَ دیم ءَ اتکگ کہ ٹرک ءُ ٹریکٹر ءُ گاڑی ءَ ڈیک وارتگ، ڈیک ورگ ءِ سوب ءَ سَے مردم زدگ بوتگ اَنت –

دومی نیمگ ءَ منگچر ءَ ٹرک ءِ چپی بوگ ءَ دو مردم زدگ بوتگ اَنت ـ وھدیکہ شال ءَ سریاب دگ ءِ سر ءَ بس ءَ موٹر سیکل سوارے ءِ ڈیکر کتگ، چریشی ءَ سینکل سوار ٹپی بوتگ –