وڈھ ءَ دگ ءِ وئیل ءَ دو مردم ٹپی

بلوچستان ءِ دمگ وڈھ اورناچ ءِ کراس ءَ دگ ءِ وئیل ءَ زالبولے ءَ ھوار دو مردم ٹپی بیتگ اَنت –

دی بلوچستان پوسٹ

گیشیں ھالانی رِد ءَ وڈھ اورناچ ءِ چار راہ ءِ سر ءَ گاڑی ءِ وئیل ئِے آماچ بوتگ، وئیل آماچ بوتگیں گاڑی ءَ چہ دو مردم ٹپی بوتگ، ٹپی بوتگیں مردمانی تہ ءَ زالبولء ھم ھوار اِنت –

وئیل ءَ پد ھما دمان ءَ 1122 ٹیم ءَ وت ءَ وئیل جاہ ءَ سرکتگ ءُ ٹپی بوتگیں مردم درمان کُتگ ءُ پہ گیشیں درمانی ءِ ھاتر ءَ ھزدار ڈی ایچ کیو ھسپتال ءَ سرکنگ بیتگ اَنت –

زانگ بہ بیت بلوچستان ءِ گیشتریں ھند ءُ دمگاں دگانی وئیل دیم ءَ آیگ ءَ اَنت کہ آیانی تہ ءَ گیشتریں سوب دگانی پُرشت ءُ پروشی ءُ ترند رؤکیں گاڑیانی سوب گوشگ بیگ ءَ اَنت –

ھمے وڑ ءَ گوستگیں روچ ءَ بلوچستان یوتھ اینڈ سول سوسائٹی ءِ نیمگ ءَ شنگ بیتگیں درشان ءِ تہ ءَ گوشگ بیتگ کہ بلوچستان ءَ ھمے سال ءِ اکتوبر ءِ ماہ ءَ داں دگ ءِ وئیلاں یک سد ءُ بیست ءُ ھپت مردم بیران ءُ یک ھزار ءُ سَے سد ءُ ھشتاد مردم زدگ بیتگ اَنت –