نبشتانک: منی پِت سرمچارے
نبشتہ کار: لبران بلوچ
دی بلوچستان پوسٹ
سمّل وتی اسکول ءَ گوں دزگوھاراں نشتگ اَت لیب کنگ ءَ اَت کمے مُدّتے ءَ پد لیب ھتم کُت اِش ءُ ساھگے ءَ نشت اَنت آپ وارت ءُ دم اش بالادت سارتیں گیسارت کش اِت اِش اناگاہ ءَ سمّل ءِ دزگوھاراں یکے دومی ءَ گوں جُست کنگ بندات کُت کہ تئی پِت چے کنت درساں یک یک ءَ پسہ دیان کُت یکے ءَ گُشت منی پِت ماشٹرے یکے ءَ گُشت منی پِت ڈاکٹرے یکے ءَ گُشت منی پِت ءَ را ھلک ءَ دُکانے ھست ھمے پیم ءَ سمّل ءِ باریگ اَتک ءُ سمّل ءَ گُشت منی پِت سرمچارے گوں اے گپ ءَ سمل ءِ دزگوھار ھیران بوت اَنت چیا کہ سمّل ءِ دزگوھارانی اُمر اے نہ اَت سرپد بباں بلے ڈاکٹر ءُ ماشٹرانی نام ءَ پہ جوانیں سرپدی ھست اِت اِش ءُ سمل ءَ چپ ءُ چاگرد کُت اِش ءُ جُست کُت اِش سرمچار چے اَنت ءُ چے کار کن انت؟ سمّل ءَ ھمے پسہ دات شمئے پِتانی وڑیں انسان اَنت بلے منی پِت پہ شما درساں جنگ ءَ اِنت۔
پد ءَ سمل جست اش کُت تئی پِت مئے واست ءَ جنگ ءَ اِنت گوں؟ سمّل ءَ گُشت ھو منی پِت پہ درساں جنگ ءَ اِنت دانکہ ما شُما آجو بہ بہ ایں۔
پد ءَ دزگوھاراں جُست کُت سمّل آجوئی چی ءَ گوش اَنت؟ تئی پِت پہ مئے درسانی واست ءَ لوٹگ ءَ اِنت ئِے؟ سمّل ءَ پسہ دات آجوئی ءَ انگت من وت نہ زاناں بلے ابّا ءَ من ءَ گوشتگ اَت اے زمین مئیگ اِنت ایشی ءِ سر ءَ مئے ھک اِنت بلے مارا مئے ھک دیگ بوگ ءَ نہ اِنت ابّا ھمے واست ءَ جنگ کنگ ءَ اِنت ایشاں پچ بہ گپت ئِے۔
بانڑی ءَ سمل جُست کُت تئی پت کجا اِنت لوگ ءَ نہ انت جنگ کنگ ءَ انت کجا نند ایت چے وارت ؟ سمّل ءَ پسہ دیگ ءَ پیسر کمے بچکند اِت ءُ گوں چچّی دپ ءَ ھمے گْوشت تو مھناج مکتار ءِ ھمے سوت نہ اشکتگ” کوہ منی پناہ گاہ اَنت سنگ ءُ ڈوک سرجاہ انت کَے گوش ایت من تھنا آں “ءُ ھیر جان باکری والا ھمے سوت نہ اشکتگ
“ما تئی نام ءَ کہ وھدے وت وتا شوھاز اِتگ
درچکاں زگریں شِیر شانتگ کوھاں بینگ شنز اِتگ”
بانڑی ءِ ارس گلگل بیت اَنت ءُ آکری جست ئِے کُت سمّل جنگ ھرکس کنت یا وت مر ایت یا دگراں کُش ایت گڑا پت گوں کئیا جنگ کنگ ءَ اِنت؟
سمّل ءَ جلدی پسہ کُت گنوک اے نہ مِر اَنت اے دائم ابدمان بنت نمیران بنت ایشاں شھید گْوش انت آ کہ کُشگ بنت آ مُردار بنت آ رستر انت ڈونڈّوار انت پلیت انت بلے مئے شھید دانکہ جھان ھست اِنت ایشانی نام زندگ اِنت نام ء گروک اِش بیت ءُ ابا ءَ من ءَ گوشتگ اَت تھنا من نہ آں زمین ءِ واست ءَ باز جنگ ءَ بوتگ بازیں انگت جنگ کنگ ءَ اِنت آ کہ جنگ کنگ ءَ بوتگ اَنت آئیانی جند مارا چے گستا اِنت بلے پکر ءُ مھکمی انگت مئے تھ ءَ زندگ اَنت ھست اَنت ءُ ابا ءَ اے اُوں من ءَ گُشتگ اَت اے راہ ءِ تھ ءَ من اُوں ترا چے جتا بیاں منی تیر سُپتگیں بالاد تئی چمانی دیما بہ بیت بلئے ترا گریوگی نہ انت نزور بوگی نہ اِنت پرچاکہ تئی ابا سرمچارے-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔