کیچ ءَ بی آر سی ءِ نودربراں استادانی نہ بوگ ءِ پشدر ءَ زھرشانی

دی بلوچستان پوسٹ

سر بیتگیں ھالانی رد ءَ مروچی کیچ ءِ بنجاھی شھر تربت ءَ بی آر سی وانگجاہ ءِ نودربراں استادانی نہ بوگ ءِ سر ءَ زھرشانی کرتگ، زھرشانی ءَ نودربراں ھوار بی ایس او مینگل ءُ بی ایس او پجار ءِ باسکاں بھر زرتگ –

زھرشانی ءَ نودربراں گْوشت کہ بی آر سی ءِ پرنسپل ءِ بے رویشیں کار، وانگجاہ ءِ فیسانی گیش کنگ ءُ ھاسٹل ءُ دگہ آسراتیانی نہ بوگ ءِ ھساب ءَ اِنت –

آیاں گوشت کہ مئے لوٹ سرجم بیگ ءَ نہ اَنت ءُ ھمے لوٹانی تہ ءَ وانگ جاہ ءِ گیشیں استادانی زلورت ءَ ابید ھم ھمے استاد کَشگ بیگ ءَ اَنت –

زھرشانی کنوکاں دگ بند کرتگ ءُ دگ ءِ سر ءَ نندانک جتگ ءُ نشتگ اَنت آیاں گوشت کہ استاد ابید ءِ سوب ءَ کشگ بیگ ءَ اَنت ءُ اشانی ھواری ءَ آ ترسینگ ھم بیگ ءَ اَنت –

ھمے وڑ ءَ مکران ھائی کورٹ بار ایسوسی ایشن ءَ ھم استادانی گون ءَ ھمگرنچی کرتگ ءُ مروچی آمیدگس ءَ پیش نہ بیتگ اَنت –

زھرشانی ءَ لس مھلوک ءَ بھر زرتگ ءُ لوٹ کرتگ ءُ گوشتگ کہ نودربرانی لوٹ سرجم کنگ بہ بنت ءُ بی آر سی رکینگ بہ بیت –

آیاں گوشت کہ استادانی گیشیں ڈیوٹی ءَ دیگ ءَ ابید ھم آیانی گون ءَ انساپ بیگ ءَ نہ اِنت –

زھرشانی ءَ بھر زوروکیں نودربراں دمگ ءِ واکداراں چہ لوٹ کرتگ ءُ گوشتگ کہ مئے توار ءَ اش کنگ ءُ مارا انساپ دیگ ءَ ھوار پرنسپل ءِ بگیری ءَ گامگیج ھم بہ زور ایت –