بلوچستان ءَ زوریں بیگواھیانی یکشلی برجاہ اِنت، ھمے ماہ ءَ پنجگور، نوشکی ءُ مستونگ ءَ چہ پِت ءُ چُکے ءِ ھوار پنچ مردمانی زوریں بیگواھیانی وئیل دیما اتکگ اَنت۔
دی بلوچستان پوسٹ
ٹی بی پی پتر ءَ سر بیتگیں ھالانی ردءَ بلوچستان ءِ دمگ مستونگ ءَ چہ پاکستانی لشکر ءَ یک ورناھے گوستگیں روچ ءَ دزگیر کنگ ءَ پد ناشناسیں جاھاں بُرتگ۔
ورناہ رازق بنگلزئی مستونگ ءِ کھنیں دگ قلات ءَ چہ دزگیر کنگ بیتگ کہ آئی درگت ءَ داں انگت ھچ پئیم اھوال دز نہ کپتگ۔
ھندی مردمانی ردءَ پاکستانی لشکر ءِ کارمند ءُ سادگیں پُچ پوشتگیں کارمنداں دزگیر کنگ ءَ پد ورناہ گوں وت بُرتگ۔
یات بہ بیت ھمے ھپتگ ءَ پنجگور ءِ ھنکین گچگ کرک ڈھل ءَ چہ
گوستگیں روچاں پِت وتی چُکے ھمراھی ءَ بیگواہ کنگ بیتگ اَت وھدیکہ پنجگور ءِ ھنکین چتکان ءَ چہ ھم بلیدہ ءَ جھمنندیں نودربر ثناءاللہ بیگواہ کنگ بیتگ اَت۔
ھمے پئیم چہ نوشکی ءَ چہ یک ورنایے لشکری کارمنداں ھما وھد ءَ گپتگ ءُ بیگواہ کُتگ اَت وھدے آ وتی سنگتانی پجیگ ءَ بازار ءَ نندوک بیتگ بیگواہ کُتگیں ورناھے پجار ریاض جمالدینی ءِ نام ءَ بیتگ۔
زانگ بہ بیت چہ ایشی ءَ پیش ھم ریاض جمالدینی ءِ برات عامر جمالدینی 2014 ءَ دزگیر کنگ ءَ پد بیگواہ کنگ بیتگ اَت ءُ پدا آئی ژانگولیں جون دگہ دو مردمانی پجیگ ءَ دزکپتگ اَت۔