نوشکی ءَ یک ورنایے بیگواہ

دی بلوچستان پوسٹ

سر بیتگیں ھالانی رد ءَ نوشکی ءَ پاکستانی پوج ءَ یک ورنایے آوار جتگ ءُ برتگ-

رسانکدری ھالانی رد ءَ دو روچ ءَ پیسر پاکستانی پوج ءَ نوشکی ءِ بازار ءَ یک ورنایے ھما وھد ءَ آوار جتگ ءُ برتگ کہ آ وتی ھمراھانی ھمراھی ءَ بازار ءَ نندوک بیتگ –

آوار جنگ بیتگیں ورنا ءِ پجار ریاض جمالدینی ءِ نام ءَ زانگ بیتگ –

زانگ بہ بیت چریشی ءَ پیسر بزاں سال دو ھزار ءُ سیزدہ ءَ پاکستانی پوج ءَ ریاض جمالدینی ءِ برات عامر آوار جتگ ءُ برتگ اَت پد ءَ آئی ءِ لَٹ ءُ کُٹ کرتگیں جون چگل داتگ اَت –

بلوچستان ءَ گار ءُ بیگواھیں مردمانی واستا کار کنوکیں گل وائس فار بلوچ مسنگ پرسنز ءِ رد ءَ بلوچستان ءَ اے وھد ءَ بازین مردمے بیگواہ اِنت کہ چریشانی تہ ءَ بلوچ نودربر ءُ جتائیں تکاں بندوکیں مردم ھوار اَنت –

گل ءِ بھتام اِنت بلوچستان ءَ گار ءُ بیگواہ کرتگیں مردمانی بیگواھی ءَ پاکستانی چیریں ادارہ ھوار اَنت –

نوشکی ءَ آوار جنگ بیتگیں ریاض ءِ درگت ءَ پاکستانی پوج ءِ نیمگ ءَ آوار جنی ءِ ھال شنگ نہ بیتگ اَنت –