شال: فیروز بلوچ ءِ نام ءَ مپتی کتاب یکجاہ کنگ بیتگ اَنت

دی بلوچستان پوسٹ

چاگردی رسانکدراں شنگ بیتگیں ھالانی رد ءَ مروچی بلوچستان مزن شھدربرجاہ ءَ فیروز بلوچ ءِ نام ءَ مپتی کتابانی یکجاہ کنگ بندات کنگ بیتگ اَنت –

ایر کنگ بیتگیں بک اسٹال ءَ بازین مردم اتکگ ءُ کتاب اش داتگ اَنت، کتابانی تہ ءَ بلوچی ءُ دگہ دری زبانانی ھوار بیتگ اَنت –

کتاب جتا جتائیں نودربراں آؤرتگ ءُ جم کرتگ اَنت، نودربرانی گوشگ اِنت کہ اے کتاب بلوچستان ءِ جتا جتائیں کتابجاھاں ایر کنگ بنت –

آیانی گوشگ اِنت بلوچستان ءِ بازیں جاھاں اود ءَ وانوکیں مردماں کتاب وانگ ءَ دز نہ کپ اَنت کہ اود ءِ وانوکاں جوانیں آسراتی اَنت –

ایشی ءَ ھم بہ وان اِت کہ فیروز بلوچ ءِ بیگواھی ءُ آئی ءِ کھول ءِ زھرشانی-

ھمے درگت ءَ ڈاکٹر مھرنگ بلوچ ءَ وتی چاگردی رسانک ٹویٹر ءَ گوشتگ کہ فیروز بلوچ ءِ نام ءَ اے اولی بک اسٹال ءِ جنگ بیتگ کہ فیروز ھمے کاروان ءِ بھرے بیتگ –

مھرنگ بلوچ ءَ گْوشت کہ فیروز کتابانی دوست داروک ءُ وانوکے بیتگ ھمے کتابانی نام ءِ سر ءَ فیروز بیگواہ کنگ بیتگ بلے آئی ءِ بنھِشت ایر کرتگیں کاروان انگت ءَ منزل ءِ نیمگ ءَ روان اِنت –

بساک ءِ نودربراں گْوشت کہ فیروز ءِ نام ءَ کتابانی یکجاہ کنگ مروچی بلوچستان شھدربرجاہ ءَ بیتگ ءُ باندا بی ایم سی ءَ ءُ پونشی آئی ٹی شھدربرجاہ ءَ ایر کنگ بیت اِنت –
زانگ بہ بیت فیروز بلوچ بیست ءُ نُھ مئی دوھزار ءُ نوزدہ ءَ قلات ءِ ھند ءَ آوار جنگ ءُ بیگواہ کنگ بیتگ –