ورنائیں نودربر وتی پِت ءِ پجیگ ءَ بیگواہ کنگ بیتگ، رند ءَ کماش یل کنگ بیتگ۔
دی بلوچستان پوسٹ
بولان میڈیکل کالج ءِ نودربر نبی بخش بلوچ ناشناسیں مردماں چہ پنجگور ءِ دمگ ءَ بیگواہ کُتگ ۔ نودربر کرونا ءِ سوب ءَ وتی موکلانی گوازینگ ءَ پنجگور ءَ اتکگ بیتگ۔
ھالانی ردءَ نبی بخش پنجگور وشبود ءَ جھمنند اِنت کہ چہ پنجگور ءِ ھنکین گرمکان ءَ چہ آئی ءِ پِت ماسٹر عبدالرزاق ءِ ھواری ءَ سلاہ بندیں مردماں بیگواہ کُتگ اَنت، رند ءَ آئی ءِ پِت وئیل کنگ بیتگ وھدیکہ نودربر داں انگت ءَ بیگواہ اِنت۔
دمگی واکدارانی نیمگ ءَ چہ داں انگت اے درگت ءَ ھچ سرپدی دیگ نہ بیتگ۔ زانگ بہ بیت چہ ایشی ءَ پیش ھم بلوچستان ءِ جتائیں دمگاں ھمے پئیمیں وئیلانی تہ ءَ ورناہ زور بیگواہ کنگ بیتگ اَنت کہ ایشانی تہ ءَ پاکستانی لشکر ءُ چیریں گلانی کارمند چہ کھولانی نیمگ ءَ نامینگ بیتگ اَنت وھدیکہ بازیں وئیلانی تہ ءَ ھمے گلانی نام ءَ ایف آئی آر نبشتہ کنگ بیتگ اَنت۔
گوستگیں روچاں بیگواھیں نودربر فیروز بلوچ ءُ ماجد بلوچ ءِ کھول ءِ نیمگ ءَ شال پریس کلب ءِ دیمءَ زھرشانی کنگ بیتگ اَت۔فیروز بلوچ 29 مئی 2020 ءَ شال ءَ چہ پنجگور ءَ روگ ءِ وھد ءَ مساپری ءِ نیام ءَ قلات ءِ ھند ءَ سلاھبندیں مردماں بیگواہ کُتگ اَت ھمے وڑ ءَ بلوچستان یونیورسٹی ءَ کمپیوٹر سائنس ءِ نودربر ماجد 31 مئی 2020 ءَ قلات ءَ چہ آئی لوگ ءَ بیگواہ کنگ بیتگ اَت ۔
ماجد ءِ کھول ءِ رد ءَ پوجی ءُ سادگ پُچ پوشیتگیں کارمنداں 31 مئی ءِ شپ ءَ آیانی لوگ ءَ بیڑ بُرتگ ءُ لٹ ءُ کُٹ کنان ءَ ماجد وتی ھمراہ بُرتگ کہ چہ ایشی ءَ پد آئی درگت ءَ ھچ وڑیں اھوال نہ رس اِتگ۔